BenTroieC_1partial.txt

#META#  TextURI         :: BenTroieC
#META#  DEAF            :: http://www.deaf-page.de/bibl/bib99b.php#BenTroieC
#META#  TL              :: Troie
#META#  FEW             :: BenSMaure
#META#  ARLIMA          :: https://www.arlima.net/ad/benoit_de_sainte-maure.html#tro
#META#  Author          :: Benoît de Saint-Maure
#META#  AuthorBorn
#META#	AuthorBornAmb
#META#  AuthorDied
#META#	AuthorDiedAmb
#META#	AuthorFl1
#META#	AuthorFl2
#META#  TextTitle       :: Roman de Troie
#META#  TextSubtitle
#META#  TextVols        :: 5
#META#  TextSubj        :: romance
#META#	TextDom         :: lit
#META#	Translation     :: true
#META#	Collection      :: SATF
#META#	CollectionNo
#META#  TextDescARL     :: vers octosyllabiques à rimes plates
#META#  TextDescVers    :: 8
#META#  TextDateARL     :: 1165
#META#  TextDateAdj     :: 1165
#META#	TextDateMin
#META#	TextDateMax
#META#  EdEditor        :: Constans, L.
#META#  EdPlace         :: Paris
#META#  EdPublisher     :: Didot
#META#	EdVol           :: 1
#META#  EdYear          :: 1904
#META#  EdPages
#META#  MsBase
#META#  MsOther
#META#  MsNum           :: 58
#META#	MsDateARL
#META#	MsDateAdj
#META#	Form            :: v
#META#	Complete        :: partial
#META#	NoWords
#META#	NoLines
#META#	DialAuth
#META#	DialScribe
#META#  ScanURL         :: http://gallica.bnf.fr/ark:/12148/bpt6k5094q?rk=128756;0
#META#  ScanURIOther
#META#  ArkID
#META#  LccnID
#META#  OclcID
#META#  WebAuthor       :: Marielle Del Carmen Caballero Ng
#META#  ORCIDWebAuthor
#META#  WebReviewer     ::
#META#  ORCIDReviewer   ::
#META#  MiscInfo        ::
#META#	CCLicense	    :: CC BY-NC-SA 4.0 International


PageV01P001
# | PROLOGUE
Salemon nos enseigne e dit,
E sil list om en son escrit,
Que nus ne deit son sen celer,
Ainz le deit om si demostrer
Que l'om i ait pro e honor,
Qu'ensi firent li ancessor.
Se cil qui troverent les parz
E les granz livres des set arz,
PageV01P002
Des philosophes les traitiez,
Dont toz li monz est enseigniez,
Se fussent teü, veirement
Vesquist li siegles folement :
Come bestes eüssons vie ;
Que fust saveirs ne que folie
Ne seüssons sol esguarder,
Ne l'un de l'autre desevrer.
Remembré seront a toz tens
E coneü par lor granz sens,
Quar sciënce que est teüe
Est tost obliëe e perdue.
Qui set e n'enseigne o ne dit
Ne puet muër ne s'entroblit;
E sciënce qu'est bien oïe
Germe e florist e frutefie.
Qui vueut saveir e qui entent,
Sacheiz de mieuz l'en est sovent.
PageV01P003
De bien ne puet nus trop oïr
Ne trop saveir ne retenir ;
Ne nus ne se deit atargier
De bien faire ne d’enseignier ;
E qui plus set, e plus deit faire :
De ço ne se deit nus retraire.
E por ço me vueil travaillier
En une estoire comencier,
Que de latin, ou jo la truis,
Se j’ai le sen e se jo puis,
La voudrai si en romanz metre
Que cil qui n’entendent la letre
Se puissent deduire el romanz :
Mout est l'estoire riche e granz
E de grant uevre et de grant fait.
En maint sen avra l'om retrait,
Saveir com Troie fu perie,
Mais la verté est poi oïe.
Omers, qui fu clers merveillos
E sages e esciëntos,
PageV01P004
Escrist de la destrucion,
Del grant siege e de l'acheison
Por quei Troie fu desertee,
Que onc puis ne fu rabitee.
Mais ne dist pas sis livres veir,
Quar bien savons senz nul espeir
Qu'il ne fu puis de cent anz nez
Que li granz oz fu assemblez :
N’est merveille s’il i faillit,
Quar onc n'i fu ne rien n’en vit.
Quant il en ot son livre fait
E a Athenes l’ot retrait,
Si ot estrange contençon :
Dampner le voustrent par reison,
Por ço qu’ot fait les damedeus
Combatre o les homes charneus.
PageV01P005
Tenu li fu a desverie
E a merveillose folie
Que les deus come homes humains
Faiseit combatre as Troïains,
E les deuesses ensement
Faiseit combatre avuec la gent;
E quant son livre reciterent,
Plusor por ço le refuserent.
Mais tant fu Omers de grant pris
E tant fist puis, si com jo truis,
Que sis livres fu receüz
E en autorité tenuz.
Àprès lonc tens que ç'ot esté,
Que Rome ot ja piece duré,
El tens Saluste le vaillant,
Que l'on teneit si a poissant,
A riche, a pro de haut parage
PageV01P006
E a clerc merveillos e sage,
Cil Salustes, ço truis lisant,
Ot un nevo fortment sachant :
Cornelius ert apelez,
De letres sages e fondez.
De lui esteit mout grant parole :
A Athenes teneit escole,
Un jor quereit en un aumaire
Por traire livres de gramaire :
Tant i a quis e reversé
Qu’entre les autres a trové
L’estoire que Daire ot escrite,
En greque langue faite e dite,
Icist Daires dont ci oëz
Fu de Troie norriz e nez ;
Dedenz esteit, onc n'en eissi
Desci que l'oz s’en departi;
Mainte proëce i fist de sei
E a asaut e a tornei.
PageV01P007
En lui aveit clerc merveillos
E des set arz esciëntos :
Por ço qu'il vit si grant l'afaire
Que ainz ne puis ne fu nus maire,
Si voust les faiz metre en memoire :
En grezeis en escrist l'estoire.
Chascun jor ensi l'escriveit
Come il o ses ieuz le veeit.
Tot quant qu'il faiseient le jor
O en bataille o en estor,
Tot escriveit la nuit après
Icist que je vos di Darès :
Onc por amor ne s'en voust taire
De la verté dire e retraire.
Por co, s'il ert des Troïens,
Ne s’en pendié plus vers les suens,
Ne mais que vers les Grezeis fist :
De l'estoire le veir escrist,
Lonc tens fu sis livres perduz,
Qu'il ne fu trovez ne veüz ;
PageV01P008
Mais a Athenes le trova
Cornelius, quil translata :
De greu le torna en latin
Par son sen e par son engin.
Mout en devons mieuz celui creire
E plus tenir s'estoire a veire
Que celui qui puis ne fu nez
De cent anz o de plus assez,
Qui rien n'en sot, iço savon,
Se par oïr le dire non.
Ceste estoire n’est pas usee,
N'en guaires lieus nen est trovee :
Ja retraite ne fust ancore,
Mais Beneeiz de Sainte More
L'a contrové e fait e dit
E o sa main les moz escrit,
Ensi tailliez, ensi curez,
Ensi asis, ensi posez,
Que plus ne meins n'i a mestier.
PageV01P009
Ci vueil l'estoire comencier :
Le latin sivrai e la letre,
Nule autre rien n'i voudrai metre,
S'ensi non com jol truis escrit,
Ne di mie qu'aucun bon dit
N’i mete, se faire le sai,
Mais la matire e ensivrai.
# | RESUMÉ DU POÈME
Dirai vos donc e a bries moz
De queus faiz iert li livres toz
E de quei i voudrai traitier,
Sempres ici al comencier
Vos parlerai de Peleüs,
Qui bien vesqui cent anz e plus.
Gente femme ot, dame Thetis :
Ensi ot non, ço m’est avis.
D'icez dous fu Achillès nez,
Qui mout fu proz e renomez.
PageV01P010
Adonc vos redirai après
Coment Jason e Herculès,
Par engin e par traïson,
Alerent querre la Toison ;
Com Medea par son saveir
La lor fist conquerre e aveir.
Puis dirai par quel acheison
Il craventerent Ylion
E tote Troie, en iceus anz
Que ancor n’esteit guaires granz ;
Com Laomedon fu ocis,
Qui reis e sire ert del païs.
Si orreiz com faitierement,
Après icest destruiement,
La refonda Prianz li reis,
Qui mout fu sages e corteis;
Com el fu grant, com el fu lee
Et de quel gent el fu poplee ;
Com li conseil furent puis pris
A dant Hector e a Paris
De querre Esiona lor ante;
PageV01P011
Come Antenor, le riche cante,
L'ala en Grece demander.
Après orreiz dire e conter
Com danz Paris en espleita,
Qui dame Heleine en amena,
E com li temples fu brisiez,
Ou mil homes ot detrenchiez;
Les noces e l'assemblement,
Cui comparerent mainte gent.
Après orreiz les prophecies,
Que pas ne voustrent estre oïes
Ne creües ne tant ne quant,
Dont puis mesavint a Priant;
Qu’Agamennon e Menelaus,
E Telamon e Aïaus,
Palamedès e Ulixès,
Li dus d'Athene e Achillès,
PageV01P012
E cent riche rei e preisié
Vindrent sor Troïens irié
Par mer o navei grant e fier :
Onc mais tant riche chevalier
Ne furent josté ainz ne puis,
Ensi com j'en l'estoire truis.
Le nombre orreiz de la navie
E coment el fu establie ;
Les facons e les contenances,
Les mors, les teches, les semblances
Des reis, des princes, des danzeles
E des dames e des puceles.
S'orreiz parler d’un grant concire
E al quel om livra l’empire
E la seignorie de toz;
E com danz Achillès li proz
Ala en Delfon al respons,
La ou il vit les visions ;
E com Calcas o lui s’en vint.
PageV01P013
Qui dist puis quant qu'il lor avint ;
E come Agamennon li reis
Sacrefia veant Grezeis
Por l’orage faire cesser
Qui lor toleit mer a passer.
Après orreiz de Tenedon
Coment fu pris e coment non;
L’eirre que fist danz Achillès
E Telephus. fiz Herculès,
Sor ceus de Mese, qu'il venquirent,
E coment il se combatirent ;
Com Telephus ot le païs,
Quant reis Teütrans fu ocis.
Puis vos dirai come Ulixès
E sis compainz Diomedès
Alerent porter le message
E requerre dreit de l’outrage
Qui en Grece aveit esté faiz,
E les rampoignes e les laiz
Qu'il oïrent que dit lor fu,
E quant qu'il i ot respondu ;
E com Palamedès revint,
PageV01P014
Cil qui l'empire ot puis e tint.
Après orreiz com faitement
Josterent Greu lor parlement,
Com li conseil furent doné
D’aler aseeir la cité ;
S’orreiz des riches reis parler,
E l'un après l’autre nomer,
Qui la vindrent vers Greus guarnir
E les batailles maintenir;
Com les nes furent establies,
La grant estoire e les navies ;
Coment Proteselaus li proz
Corut o cent nes avant toz ;
Com li autre vindrent après
O cent mil chevaliers e mais ;
Des Troïens, quis recoillirent
E qui les porz lor defendirent;
Com par force e par estoveir
S'i logierent sempres le seir.
S’orreiz com Troie fu asise.
Que de dis anz ne fu puis prise,
E la rnerveille e la dolor,
La bataille e le fier estor
PageV01P015
Ou Hector ocist Patroclus
E bien mil chevaliers e plus;
E s'orrez come il fu navrez
E chierement puis comparez ;
E com fu morz Cassibilant,
Qui sis frere ert e fiz Priant,
E com sor Greus tornast li maus,
Ne fust Telamon Aïaus,
Qui a Hector se combateit,
Quant l'uns l’autre ne conoisseit.
S’orreiz des triues qu’il requistrent,
Qu’il s’entredonerent e pristrent ;
Le duel qu'Achillès demena
De Patroclus que trop ama;
Com Cassandra, la fille al rei,
Remist ceus dedenz en esfrei
Par ses parfonz devinemenz
E par ses prophetizemenz.
Adonc vos redirai après
Com faitement Palamedès
Fu plaignanz de la seignorie,
De la princé, de la maistrie
Qu’Agamennon ot sor Grezeis
PageV01P016
Desor son vié e sor son peis,
La bataille que après vint,
Que mout redura puis e tint,
Dirai en ordre mot a mot,
E ço que chascuns i fist tot ;
Com Greu en orent le peior
Par la force e par la vigor
D’Ector le pro, le merveillos,
Sor toz hardi e vertuos ;
Com li conseil refurent pris
De lui, coment il fust ocis.
Puis orreiz la quarte bataille,
La grant peine e la grant travaille
Que il traistrent o ceus dedenz,
Dont il i ot treis mil sanglenz;
Com faitement li rei poissant
Qui esteient devers Priant
Josterent o ceus cors a cors
Qui plus preisié erent defors;
Coment li reis Thoas fu pris,
Qu’Ector trencha le nes del vis;
PageV01P017
Qu'en voust li reis Prianz puis faire,
Quil comanda rompre e detraire ;
Come Antenor e Eneas
Troïlus e Polidamas
Furent en Chambre de Beautez,
Ou assez furent sermonez
E amonestez de bien faire.
Après porreiz oïr retraire
D’un orage, d’un grant, d'un fier,
Qui les tentes fist trebuchier,
Les tres de paile e et de samiz.
Après reconte li Escriz
Com fu de la quinte assemblee,
Que par grant ire fu jostee.
Si vos dirai tot a devise
Com fu morz li reis de Larise,
Com fu morz Almenis li reis,
Uns des plus hauz de l'ost Grezeis;
PageV01P018
E com fu morz Epistrophus
E sis frere reis Scedius,
E des autres reis set o dis,
Qui mout esteient de grant pris.
Après porreiz oïr retraire
Come i vint puis le Saietaire,
E sa semblance e ço qu'il fist,
E com Diomedès l’ocist.
S’orreiz après de Galatee,
Com por lui sorst aspre meslee :
C'ert li chevaus Hector l’eslit,
Qui son peis valeit d’or recuit;
Come Antenor fu pris le jor,
Dont Troïen orent dolor;
Com la bataille defina,
Que l’endemain recomença
Pesme e cruël, orrible e male,
Dont set mile remestrent pale.
Après orreiz dire e conter
PageV01P019
Com Greu s'en voustrent retorner,
E com Calcas par son saveir
Les fist a force remaneir.
Puis dirai com faitierement
Erent tuit livré a torment
De la puӧr des cors porriz,
Qui n'esteient enseveliz;
Com triues lor covint requerre
Por eus ardeir e metre en terre ;
Com Diomedès i ala
E Ulixès, que mout ama;
Com Dolon les prist en conduit
Endreit hore de mie nuit;
Com la triue fu de treis meis
Mal gré Hector e sor son peis ;
Com li cors furent amassé
E come en furent grant li ré ;
Com refu pris li parlemenz
De ceus defors a ceus dedenz ;
Com Thoas fu quites de joie
Por Antenor le vieil de Troie,
Coment Calcas li devinere
PageV01P020
E li tres sages augurere
Requist sa fille e demanda,
Qui aveit non Briseïda,
Que Troïlus aveit amee,
E com Prianz li a quitee ;
E come Hector e Achillès,
Oiant mil chevaliers e mès,
S'entraatirent cors a cors ;
Mais cil dedenz e cil defors
Ne lor voustrent pas consentir.
Après porreiz avant oïr
Com la fille Calcas la proz
Eissi de Troie veiant toz,
Le duel qu’el fist al desevrer
E com la preia puis d’amer
En l'ost defors Diomedès.
De ço vos traiterai adès,
Come o son pere fu marrie
Por sa mauté, por sa folie,
Des Troïens qu’il ot guerpiz ;
S’orreiz ses responz e ses diz.
PageV01P021
Après dirai le grant tornei,
La grant bataille e le desrei
Qu’Ector i fait, qui toz les veint;
Come il l’ont puis ploré e plaint
De ço qu’il fu griefment navrez ;
S’orreiz la Chambre de Beautez,
Que de labastre fu bastie,
E coment ei fu establie.
Iluec orreiz enchantemenz,
Tresgiez e merveillos e genz,
Si granz com cuers puet porpenser :
Mout le fera buen escouter.
Donc vos dirai la fine amor
E la destrece e la dolor
Que sofri li fiz Tydeüs
Puis por l’amie Troïlus.
Puis orreiz la bataille oitaine,
Que plus dura d’une semaine.
Puis vos dirai la verité
PageV01P022
D’une estrange mortalité
Que en l'ost fu une feiee,
E saveir com fu esmaiee
La femme Hector, Andromacha,
Des forz songes qu'ele sonja;
E le devié e la dolor
Qu’ele fist d'Ector son seignor
Qu’il nen eissist a la bataille :
De part les deus li dist sans faille,
S’il i alot, n’en vendrait vis,
Qu’il i sereit le jor ocis.
Puis vos dirai les granz dolors
Qu’en ot sa mere e ses sorors.
Adonc porreiz oïr avant
Com nel laissa eissir Priant, —
N’en pot aveir de lui consence, —
E com la bataille comence ;
Com li reis de Frise fu pris,
Qui a grant peine en estorst vis;
PageV01P023
Com Troïen orent le jor
De la bataille le peior;
Com li bastart s’i aviverent,
Qui le jor trop i endurerent ;
Come Hector navra Achillès
E com cil le rocist après.
Après orreiz le fier damage
Qu'en orent cil de son lignage ;
Com Troïen sont a duel mis
Par les portaus de marbre bis ;
Com reis Mennon, ço savons nos,
Torna contre Achillès toz sous.
S’orreiz les dueus, les fiers, les granz
Cui d’Ector fait li reis Prianz ,
Paris sis frere e Troïlus,
Eneas e Deïphebus ;
Com fu de lui ensevelir,
Del cors embasmer e vestir.
Parlerai de la sepouture,
Que trop fu riche senz mesure :
PageV01P024
Ja, quant ele vos iert retraite,
Ne direiz mais que tel fust faite.
Après orreiz la descordance,
La tençon, la malevoillance
Que Palamedès comença,
Qui Agamennon desposa :
Par son porchaz e par ses diz
Fu de la princé dessaisiz.
Puis orreiz le complaignement
Que reis Prianz fait a la gent
D’Ector son fil, que Greu ont mort,
E li tolent son regne a tort ;
S’orreiz come il le vait vengier
A l’espee trenchant d'acier :
Mout fist le jor parler de sei,
Tot le pris ot de cel tornei
Del rei Sarpedon le vaillant
E de Telepolon le grant
Vos conterai le fier estor
E qui en ot le sordeior;
PageV01P025
Après porreiz oïr maneis
Come i fu morz li reis Perseis,
Com Troïen estre lor gré
Furent le jor del champ torné.
Adonc porreiz oïr avant
Com faitement le rei persant
En ont en son païs porté,
E come il l'ont plaint e ploré
E enterré a grant hautece.
Puis parierai d’une destrece,
D’une chierté que en l’ost fu,
E come il furent socoru;
De l'aniversaire, del grant,
Que d’Ector fist le rei Priant,
Des sacrefices qu’il i fait
E com danz Achillès i vait;
Come il aama la pucele
PageV01P026
Polixena, que tant ert bele ;
Come il en voust l'ost faire aler,
Tant fu de li sorpris d’amer ;
Qu’en respondi li reis Thoas,
Qui ço ne teneit mie a gas,
Ne nel refist Menesteüs,
Cil qui d’Athene ert sire e dus.
Après orreiz la descordance
E l'ire e la malevoillance
Qu’a ceus de l’ost a Achillès,
Qui jure que ja n’avront mais
Nul jor de lui socors n'aïe :
A ses hommes viee e chastie
Que uns toz sous, por rien qu’il oie,
Ne seit noisanz a ceus de Troie ;
E si porreiz oïr conter
Com laissa armes a porter.
La dozime bataille iert grant,
Que li Livres retrait avant,
Si com Resa, li reis d’Aresse,
PageV01P027
Vers Troïens point e eslaisse.
Puis dirai com Deïphebus
L’ocist, veiant mil Greus e plus,
E com Telamon Aïaus
I ert sor toz come vassaus ;
Coment Palamedès li reis,
Qui sire e maistre ert des Grezeis,
Ocist le jor Deïphebus,
E Paris lui : ne vesqui plus.
Adonc vos dirai a dreiture
Con fu de la desconfiture,
Des paveillons qui furent pris
E del feu qui fu es nes mis,
Come els fussent arses le jor
Tot senz defense e senz retor,
Ne fust Telamon Aïaus,
Qu'i perdié mil de ses vassaus.
Après dirai com faitement
Li fiz Heber, cui Trace apent,
Vint el tref Achillès iriez.
PageV01P028
Toz decoupez e detrenchiez ;
Come il le laidenge e folie,
Por ço que il ne lor aïe ;
Come il chiet morz, veiant ses ieuz ;
E cil par est si pleins d’orguieuz
Qu'il ni guarde ne ne l'en chaut.
S’orreiz com la bataille faut,
Com Deïphebus est plorez
E de toz plainz e regretez,
E reis Sarpedon autresi,
E com li Greu resont marri
De lor prince Palamedès :
Ja hom si grant duel n'orra mais.
Après orreiz del grant concire,
La o josta tot lor empire,
E come Agamennon li reis,
Par l'esguart comun des Grezeis,
Refu esliz a emperere,
Sor l'ost princes e comandere.
Puis orreiz del trezime estor,
PageV01P029
Com Troïlus le veint le jor,
E si refist il l’endemain,
Bien nos en fait Daires certain :
Après i rot triues donees,
Que bien furent aseürees.
S’orreiz coment Diomedès,
Nestor li vieuz e Ulixès
Alerent Achillès preier
Qu’as batailles lor vienge aidier,
Mais n’i porent nul bien trover :
Por ço s’en cuiderent raler.
Mais danz Calcas li devinere
E li tres sages augurere,
Par son sen e par son saveir,
Les a trestoz faiz remaneir.
Après reconte li Escriz
Com rajosta li fereïz,
Li doloros e li mortaus,
PageV01P030
Ou morurent mil bons vassaus,
Ou Troïlus li genz, li proz,
D’ambedous parz les venqui toz;
Come il navra Diomedès
Par mi le cors de plain eslais,
E si come il le rampogna
Por s’amie Briseïda :
Li reproche furent mout lait
E en mainz lieus dit e retrait.
Adonc orreiz com faitement
La fille Calcas se repent
Por ço qu’ele a d’amor boisié,
Fausé e menti e trichié.
Après orreiz le parlement
Que Greu firent comunaument
D’Achillès requerre e somondre,
Mais ne lor voust nul bien respondre :
Desor son vié e sor son peis,
Lor bailla ses Mirmidoneis.
Mais Troïlus, le pro, le sage,
Mout sovent lor i fait damage,
PageV01P031
Sovent lor fait les cors sanglanz :
De c’est Achillès mout dolenz
Et mout ainsos e mout iriez,
Quar trop se veit endamagiez.
Puis dirai le definement
De la bataille e del content ;
Com Troïlus fu desarmez
Dedenz la Chambre de Beautez,
Ou sa mere fist si grant duel
Que morte fust mil feiz son vueil.
Après orreiz come il se claime
De. la fille Calcas qui aime
Son enemi pesme e mortal :
As puceles en dit grant mal.
Après porreiz oïr conter
Come Achillès muert por amer,
Qui conseil ne confort n’en trueve,
Ne n'est si hardiz qu’il se mueve
Ne que il nuise as Troïens.
Adonc orreiz qu'en poi de tens
I rot bataille grant e fiere
PageV01P032
Tel dont trei mil jurent en biere :
Antilogus le pro, le bel,
I geta mort Brun le Gemel.
Donc vos dirai, quant Troïlus
I vint, que Greus ne se tint plus.
Adonc orreiz come Achillès
Ne pot sofrir n'atendre mais :
Armé l'en estut eissir fors
E por mort defendre son cors.
Donc porreiz merveilles oïr
De ço qu'il fist a l'avenir,
Come en l'estor dis e novain
Ocist Troïlus de sa main
Par le grant esforz de sa gent :
Bien vos sera retrait coment.
Tot en ordre dit vos sera
La vie cui meine Ecuba :
Por ses fiz qui sont mort se muert,
PageV01P033
S’orreiz quel engin el porquiert :
En traïson, quar n'en puet mais,
Fait tot detrenchier Achillès.
Li granz esmais e li deshaiz,
E li granz dueus qui en fu faiz,
Vos sera toz contez e diz,
E com chascuns s'en fust partiz,
Ne fust Calcas, qui prist respons
E qui lor fist par ses sermons
Querre Pirron, qui mout fu proz,
Qui d'armes les venqui puis toz.
Donc vient la bataille mortaus ;
S'orreiz coment reis Aïaus
Ocist Paris e Paris lui :
Ensi finerent ambedui.
Retraiz vos iert li dueus Heleine :
PageV01P034
Mais jo ne cuit que rien humaine
Feïst onques si angoissos,
Si pesme ne si doloros.
Le monde orreiz trestot descrire,
E retraire e conter e dire
Coment il est n'en quel mesure,
Ço qu'on en trueve en escriture.
Donc vos iert l'uevre recontee,
Com faitement Panthesilee
Vint a socorre la cité,
Mais sa proëce e sa bonté
Comparerent mout li Grezeis,
Ainz que passassent li dui meis.
De li porreiz oïr conter
Qu'en tot le mont n'ot onc sa per.
Dit vos sera come el define
E la grant eve ou l'om traïne
Son cors a duel e a pechié.
Après orreiz del grant traitié
Que fait Ditis d'ore en avant :
Com l'on traïst le rei Priant;
PageV01P035
Coment li traïtor ovrerent,
Qui la traïson porparlerent,
Qui il furent, come orent non ;
Qui embla le Palladion ;
Com li chevaus fu establiz
E el temple Minerve ofriz ;
Come en fu arse la cité
E Ylion jus craventé,
E Prianz li reis detrenchiez,
Dont fu granz dueus e granz pechiez.
Se orreiz la grant ocision
Et la fiere destrucion :
Ja ne direiz que tel fust faite,
Quant el vos iert dite e retraite ;
S'orreiz quin fu menez chaitis
E ceus qui en estorstrent vis.
La meslee e la contençon
Que refu del Palladion
Vos sera contee par diz,
E com Telamon fu mordriz ;
Come Ulixès, sor cui fu mis
PageV01P036
S'en est de nuit alez fuitis.
S'orreiz com fu rendue Heleine
A son seignor a mout grant peine ;
Com Polixena la pucele,
La fille al rei Priant, la bele,
Fu puis al tombel decolee
D'Achillès, qui tant l'ot amee :
Ço fu granz dueus e grant dolor ;
Puis le comparerent plusor.
Bien est que l'acheison oiez
Por qu'Eneas fu eissilliez ;
Coment li Greu s'en repairierent
E coment il reperillierent ;
Come il alerent a dolor
Coment furent mort li plusor ;
Come Agamennon fu mordriz
E com le venja puis sis fiz
De sa mere demeinement,
Assez orreiz vos bien coment.
Conté vos sera les ahanz
PageV01P037
Que Ulixès sofri set anz ;
D'Antenor, come il espleita
De sa cité, que il fonda.
De Pirrus, le fil Achillès,
Qui assez fu fel e engrès,
Porreiz saveir come il l'en prist
De ses dous oncles, qu'il ocist,
E com rocist lui Orestès
Por sa femme lonc tens après ;
Come Andromacha la vaillant
En remest grosse d’un enfant,
Cui li fiz Hector fist puis rei
Trestot avant qu'il ne fist sei ;
Les songes qu'Ulixès sonja,
Que ja nus hom mais teus n'orra ;
Coment sis fiz Telegonus,
Qui l'aveit quis treis meis e plus,
L'ocist puis par mesaventure,
Ensi com retrait l'Escriture.
Les uevres que ci sont nomees
Sont el Livre si recontees
PageV01P038
Qu'a tote rien iert a plaisir,
E mout les fera buen oïr.
# | LA TOISON D'OR ; AMOURS DE JASON ET DE MÉDÉE.
Peleüs fu uns riches reis,
Mout proz, mout sages, mout corteis:
Par Grece alot sa seignorie
E del regne ot mout grant partie ;
Sa terre teneit quitement
Bien e en pais e sagement.
Icist reis aveit un suen frere,
Fil de son pere e de sa mere :
Eson ert par non apelé ;
En Penelope la cité
Ne sai s'ert reis o cuens o dus,
Quar li Livres ne m'en dit plus.
Icist Eson un fil aveit
Qui Jason apelez esteit,
PageV01P039
De grant beauté e de grant pris
E de grant sen, si com jo truis.
Grant force aveit e grant vertu,
Par maint regne fu coneü;
Mout fu corteis e genz e proz
E mout esteit amez de toz ;
Mout por demenot grant noblece
E mout amot gloire e largece ;
Trop ert de lui grant reparlance,
E tant aveit fait dès enfance
Que mout ert coneüz sis nons
Par terres e par regions.
Quant ço vit li reis Peleüs
Que Jason montot plus e plus
E que chascun jor s'essauçot,
Dotanz en fu, paor en ot
Que tant creüst, que tant montast
Que de la terre le getast,
Et crient que, s'il vit longement,
Qu'il ne l’en laissera neient.
Mout a grant dote Peleüs
Que le regne ne li laist plus ;
Quar, se il s’en vueut entremetre,
PageV01P040
Bien len porra del tot fors metre.
Mout ot vers lui le cuer felon,
Nene faiseit se penser non,
Saveir par com faite mesure
Porreit ja prendre engin e cure,
Come il alast a male voë,
Si que la terre ne fust soë
Ne de rien nel poüst gregier.
Mout se penot de l'engeignier,
Ja seit ço que mout s'en celot
Ne nul semblant ne l’en mostrot.
En icel tens, ço truis lisant,
Avint une merveille grant
En l’isle de Colcos en mer,
Ensi l'oï l’autr’ier nomer.
La ot, ço set l'om, un mouton
Qui tote aveit d’or la toison;
Mais n'esteit rien de cel poëir,
Ne par force ne par saveir,
Qu'il seüst engeignier ne faire
Coment d’iluec le poüst traire.
A rien n'esteit chose seüe
PageV01P041
Coment la Toison fust eüe,
Onques nus hom saveir nel pot;
E sacheiz bien teus la guardot,
Ja de l’aveir n'eüst envie
Nus hom, qui n'en perdist la vie :
Maint s’i cuiderent essaier,
Cui il n'en lut puis repairier.
Peleüs fu de mal porpens :
Ne vit engin ne lieu ne tens
Com faitement poüst ovrer
De son nevo a mort livrer.
Ses nies esteit, mout le dotot :
Mais ne voleit pas ne n'osot
Mostrer ne faire aucun semblant
Qu’il le haïst ne tant ne quant.
Porpensa sei qu'il requerreit
E en toz sens porchacereit
Coment Jason la en alast,
Si que ja mais ne retornast :
Bien set, s'il l'i puet faire aler,
PageV01P042
Ne l’estuet mais de lui doter,
Ne del repairier n’a dotance,
Ainz est de ço bien a fiance
Que la iert sa fin, la morra
Ne ja mais n'en repairera.
Ne demora pas puis un meis
C’une grant feste fist li reis.
Grant fu la cort qu’il ajosta
E grant la gent qu'il assembla :
Assez i ot contes e dus
E chevaliers set cenz e plus,
Jason i fu e Herculès,
Cil qui sostint maint pesant fais
E mainte grant merveille fist
E maint felon jaiant ocist
E les bones iluec ficha,
Ou Alixandre les trova :
Ses granz merveilles e si fait
Seront a toz jorz mais retrait.
Grant e pleniere fu la corz,
E quant ele ot duré set jorz,
S'a li reis Jason apelé,
Oiant toz l'a areisoné :
PageV01P043
« Oies, beaus nies » fait Peleüs,
« Rien que seit vive n'aim jo plus
« Com jo faz tei, ço saches bien,
« Mais mostrer te vueil une rien.
« Mout par ies beaus, proz e hardiz,
« S'ies chevaliers granz e forniz ;
« Mout as gent cors e grant vertu,
« Si t'ies en maint lieu combatu,
«Toz jorz en as victoire eüe;
« Mainte chose t'est avenue,
« Dont tu te puez mout faire liez
« E dont tu ies mout essauciez.
« Nus n'est hui vis de ton aage
« Qui proëce ne vasselage
« Ait envers tei de nule terre :
«Trop par porras ancor conquerre.
« Mout as grant pris e grant valor,
« Mout as conquise grant honor,
« Mais conquerre la puez mout maire.
« S'une chose poëies faire,
« S’esteies si proz ne si os
PageV01P044
« Que tu la Toison de Colcos,
« Que de fin or est senz dotance
« E dont il est tel reparlance,
« Poüsses par nul sen aveir,
« Ne par force ne par saveir,
« Si avreies plus los conquis
« Que hom qui onc fust nez ne vis.
« E saches, sor les deus te[l] jur
« E leiaument t’en faz seür,
« Se tu la Toison puez aveir,
« De mon regne te ferai heir,
« E a mon tens e a ma vie
« T’en liverrai la seignorie :
« De tot seras e maistre e sire ;
« Ja ne voudras penser ne dire
« Cele chose que jo ne face,
« Que bel te seit ne que te place. »
Jason oï que li reis dist
E la pramesse qu'il li fist ;
S’ot les granz biens qu’il li retrait
PageV01P045
Des granz proëces qu'il a fait.
Mout li fu bel e mout li plot,
E mout grant joie en sei en ot ;
Set qu'il a tant force e vigor
E sen e proëce e valor
Que la Toison senz faille avra,
Dès que il s’en entremetra ;
Ja ne sera en lieu si fort,
Ço li est vis, ne l’en aport.
Grant cuer a e grant volenté
D’aler en estrange regné
E de veeir les regions
Dont a oï nomer les nons ;
E mout voudreit faire tel rien
Que l’om li atornast a bien
E dont il essauçast son nom.
La pramesse ot e le gran don
Que sis oncles li prameteit :
Nul mal engin n’i entendeit,
Ainz cuidot bien certainement,
Senz nul autre decevement,
Que por son bien li loast faire;
N’i entendeit mal ne contraire.
Tot bonement li respondi :
« Sire », fait il, « vostre merci.
PageV01P046
« Bien sai e vei, n'en dot de rien,
« Que m'onor volez e mon bien ;
« Haute chose me prametez :
« Granz merciz vos en rent e grez ;
« La irai jo, quant bel vos est,
« Mout volentiers, vez m'en tot prest.
« Ja n’en quier plus lonc sojor faire :
« Se deus me guarist de contraire,
« O mei s'en vendra la Toison :
« Ja n'iert si guardez li mouton. »
A guari se tient Peleüs :
Mander e querre fait Argus.
Engeigniere fu buens provez,
Li plus tres sages qui fust nez :
L'om ne saveit soz ciel son per.
Ne qui si bien seüst ovrer,
Quant li reis l’ot a sei mandé,
Preié li a e comandé
C’une nef seit faite e hastee,
Fort e siglant e atornee
A endurer un fort torment
PageV01P047
E un orage e un grant vent.
Argus respont : « Jusqu’a un meis,
« O, se devient, bien tost anceis,
« Iert si aprestee la nef,
« Nen iert a dire mast ne tref. »
Cil se pena de la nef faire,
Qui mout en sot bien a chief traire :
Bele fut mout e grant e fort,
E bien furent garni li bort.
Ço vuelent dire li plusor,
Mais jo nel truis mie en l’autor,
Que ço fu la premiere nef
Ou onques ot sigle ne tref,
Ne que primes corut par mer.
Cil qu’i osa premiers entrer,
Ço fu Jason, ço est cuidé,
Mais n'en truis mie autorité.
PageV01P048
Cil ot la nef apareilliee.
E bien cloëe e chevilliee
E encordee de funains ;
E governauz i ot e reins,
Veiles, utages e hobens,
E forz chaables e granz drens.
N'i ot rien plus que aprester :
Dès or puet om o li sigier
Par mi la mer a hautes veiles
E au soleil e as esteiles.
La novele fu ja alee
Par Grece et par mi la contree
Que Peleüs li reis faiseit
Une nef faire a grant espleit,
En que Jason deveit entrer,
Qui en Colcos voleit sigler,
Car aveir cuide la toison
PageV01P049
Que de fin or est el mouton.
Li plus pro e li plus vaillant
E cil qui plus erent aidant,
Plus redoté, plus coneü,
En sont dreit a Jason venu :
Ofert, pramis e dit li ont
Qu'ensemblement o lui iront.
E il trestoz les en mercie,
E doucement lor dit e prie
Que, quant il avreit bon orage
E il verreient son message,
Apareillié fussent e prest
De venir la ou la nef est.
Ensi li ont tuit otreié :
Après ont pris de lui congié.
Quant vint contre le tens novel,
Que doucement chantent oisel,
Que la flor pert e blanche e bele,
E l'erbe est vert, fresche e novele ;
PageV01P050
Quant li vergier sont gent flori
E de lor fueilles revesti,
L'aure douce vente soëf,
Lors fist Jason traire sa nef
Dedenz la mer, ne tarja plus.
Argo ot non del non Argus :
Argus l'aveit faite e ovree,
Por Argus fu Argo nomee.
Guarnir la fist Peleüs bien :
Ne lor defailleit nule rien
De quant que lor esteit mestier.
Venu furent li chevalier
E tuit si autre compaignon :
En la nef entrent a bandon.
Ensemble o eus vait Herculès,
Qui parenz ert Jason mout près.
Li venz corut devers la terre,
Qui la nef tost del port desserre ;
La veile ont fait el mast drecier.
Bon vent orent e dreiturier,
Donc comencierent a sigler
Par mi la transe de la mer.
Tant ont siglé a veile pleine.
PageV01P051
Ainz que trespassast la semaine,
Ariverent as porz de Troie
A grant leece e a grant joie :
El havre de Simoënta
Sai bien que la nef ariva.
Fors s'en eissirent ambedui,
Jason e Herculès o lui,
E tuit lor autre compaignon :
Grant joie meinent el sablon.
Lor eve douce ont refreschiee,
Que la mer aveit empeiriee ;
Sor le rivage el bel gravier
Ont fait conreer lor mangier.
Dous jorz aveient sojorné,
Quar auques esteient lassé ;
N’aveient mie grant corage
De faire el païs lonc estage,
Mais mout lor ert e buen e bel
De reposer en lieu novel
E d'auques sojorner lor cors.
Tuit esteient de la nef fors :
Mal ne damage ne faiseient
PageV01P052
En la contree ou il esteient.
Reis de Troie Laomedon
A oï dire que Jason
Ert arivez e Herculès,
E autre chevalier adès
Plus de set cenz, des plus hardiz
E de Grece des plus esliz,
Sont de lor terre ça venu :
Le païs avront confondu,
Les chasteaus ars, prise la preie,
Se il mout tost nes en enveie :
Nes i vueille ja consentir,
Quar granz maus l'en porreit venir.
Laomedon fu de grant sens :
Crienst e dota en son porpens,
Se ceus de Grece consenteit
Ne en nul sen lor amordeit
Qu’il arivassent a ses porz,
Il en sereit honiz e morz ;
Bien en porreit perdre s'onor,
E quant vendreit al chief del tor,
Tost li fereient lait damage.
PageV01P053
Li reis a pris un suen message :
Cuens esteit cil de haut parage,
Pro d'ome aveit en lui e sage,
Son talent li encharge e dit,
E cil l’a bien mis en escrit.
Puis est montez el palefrei,
Dis compaignons mena o sei ;
Tant chevauchierent a espleit
Que al port sont venu tot dreit;
Le seignor ont tant demandé
Que li autre lor ont mostré.
Son message li dist li cuens,
Qui sire e mestre esteit des suens :
« Jason, » fait il, entent a mei :
« Oies que di de part le rei,
« A tei mande nomeement,
« E a ces autres ensement,
« Que tost en eissiez de sa terre,
« Qu’en pais la vueut tenir senz guerre.
« Senz son congié e senz son gré
« Estes en son païs entré :
PageV01P054
« Il ne set pas por quel afaire,
« Mais mout li torne a grant contraire
« Dont vos onques ci arivastes
« Ne que dedenz sa terre entrastes.
« Ne vueut que plus i demoreiz,
« Ainz vueut tres bien que vos sacheiz,
« Tost vos torreit a grant folie.
« Ne vos i aseürez mie :
« Eissiez vos en grant aleüre,
« Qu'om ne vos face autre laidure ;
«S'un sol jor aviëz enfrait
« Le devié que par mei vos fait,
« N'en porreit puis un sol baillier
« Que tot nel feïst detrenchier;
« De vos sereit faite jostise,
« Ja n'en sereit raençon prise. »
Jason oï la desfiance,
Grant duel en ot e grant pesance :
« Par Deu, » fait il, « seignor Grezeis,
« Grant honte nos a fait li reis,
« Qui de sa terre nos congiee,
« E ço nos mande e nos deviee
PageV01P055
« Que demain n'i seions trové.
« Nos deüssons estre honoré
« Par lui e par la soë gent,
« Mais de tot ço n’a il talent :
« Mauvaisement nos i honore ;
« Mais ancor cuit veeir tel hore
« Qu'il s'en repentira mout chier.
« Vassaus, » fait il al messagier,
« Dire poëz a vostre rei
« Que, par les deus de nostre lei,
« Quant nos ici preïmes port,
« Damage, orgueil, honte ne tort
« Ne volions faire en sa terre,
« Ne n'avions talent de guerre ;
« E s’il en Grece fust venuz,
« A grant joie fust receüz:
« Il n’en fust mie congeez,
« Anceis i fust mout honorez.
« A mainz sera ancor retraite
« Ceste honte qu'il nos a faite,
« A teus cui mout en pesera :
PageV01P056« Ço cuit, ja faille n’i avra. »
Herculès a dit al message :
« Vassal, le port e le rivage
« Guerpirons nos hui o demain,
« Mais d’une chose faz certain
« Laomedon vostre seignor :
« Jusqu'a treis anz verra tel jor
« Qu’en cest païs ariverons,
« Que ja congié ne l'en querrons,
« Ne ja por vié ne por manace,
« O li seit bel, o li desplace,
« N'i laisserons a sojorner.
« Enoier nos deit et peser
« De la honte qu'il nos a fait.
« Meü devreit aveir tel plait
« Qui li tornast a deshonor,
« Ainz que venist al chief del tor,
« E dont toz jorz se poüst plaindre :
« Si fera il, ne puet remaindre. »
Li messages fu mout corteis :
« Par Dieu », fait il, « seignor Grezeis,
« Laide chose est de manacier
PageV01P057
« Jo ne ving pas a vos tencier :
« Mon message vos ai dit bien,
« Ne cuit qu'i obliasse rien;
« Jo n'en ai plus o vos que faire,
« Dès or me metrai el repaire :
« Se il vos plaist, vos en ireiz,
« E, s’il vos plaist, vos remandreiz ;
« Mais, ço sacheiz, jo loëreie
« Que vos meïsseiz a la veie. »
A tant s’en part, si s'en retorne,
E cil remestrent trist e morne.
Une chose puet om saveir :
S’il en eüssent le poëir,
Ja de la terre nen eississent
Desci que damage i feïssent ;
Mais poi sont gent al comencier :
Iço le lor a fait laissier.
N'i oserent plus remaneir :
En lor nef entrent vers le seir,
Fortment siglerent e nagierent,
De la contree s'esloignierent.
PageV01P058
Mout regrete sovent Jason
Ço que lor fait Laomedon
A lui et a ses compaignons.
Tant ont tiré as avirons
Et tant siglé as pleines veiles
E a la lune e as esteiles,
Qu'il ariverent en Colcon.
De la nef est eissuz Jason,
Herculès e si compaignon.
Sor le rivage, el bel sablon,
Vestirent lor cors gentement :
Riche furent lor garnement
De dras de seie a or brosdez,
De gris e d’ermine forrez ;
Li plus povres ot vesteüre
Riche e bien faite a sa mesure.
Une cité ot iluec près,
Que l’om clamot Jaconitès :
Bele ert e grant e fort e gente,
Tors i aveit bien plus de trente;
Close esteit tote de bon mur
De fin marbre, serré e dur;
PageV01P059
Mout i aveit riches maisons
E granz palais e hauz donjons,
E chevaliers e marcheanz
Riches e sages e mananz ;
Dames i ot mout e puceles,
E borgeises cointes e beles.
Mout fu la cité bien fondee,
E mout fu riche la contree :
De fruiz, d’oiseaus e de peissons
I ot, ço sacheiz, granz foisons.
Bele e riche ert Jaconitès,
Li reis aveit non Oëtès :
Assez aveit riche tenue,
Quar mout ert bien l'isle vestue.
Beaus fu li tens e cler le jor,
Come el termine de pascor,
Jason li proz e Herculès
Et tuit lor compaignon après
Sont venu dreit a la cité :
Gentement furent conreé ;
Bien semblerent bone maisniee,
Quar trop fu bien apareilliee.
PageV01P060
A merveille les esguarderent,
Quant il en la cité entrerent,
Cil des rues e des soliers
Des fenestres e des planchiers,
Et mout par sont en grant d'enquerre
Dont il vienent ne de quel terre ;
Mais cil ne pristrent fin ne cès
Desci qu'il vindrent el palais
Ou Oëtès li reis esteit,
Qui un grant plait le jor teneit.
Devant la sale de la tor,
Fors des arvous del parleor,
Ot une place grant e lee,
De haut mur tote avironee;
Le trait durot a un archier :
La joërent maint chevalier
As dez, as eschès e as tables,
E as autres gieus deportables.
PageV01P061
Assez en i aveit le jor :
Maint bon cheval, maint bon ostor
E maint chier riche guarnement
I poüst l'on veeir sovent.
Par la porte entrent li Grezeis :
Oëtès vait contre eus li reis;
Si baron e si vavassor
Les reçurent a grant honor.
Quant li reis sot qui il esteient,
Ou aloënt e dont veneient,
Honora les de grant maniere
Et mout par lor fist bele chiere ;
La nuit lor fist si bel ostel
Qu’onc puis qu'il murent n'orent tel.
A mangier lor dona assez
E mout les a bien conreez :
Assez i sistrent longement,
Pro i ot claré e piment.
Li reis es chambres enveia,
E si tramist por Medea :
C’est une fille qu'il aveit,
Que de mout grant beauté esteit ;
II n'aveit plus enfant ne heir.
PageV01P062
Trop ert cele de grant saveir :
Mout sot d’engin e de maistrie,
De conjure e de sorcerie ;
Es arz ot tant s'entente mise
Que trop par ert sage e aprise;
Astronomie e nigromance
Sot tote par cuer dès enfance ;
D'arz saveit tant e de conjure,
De cler jor feïst nuit oscure;
S'ele vousist, ço fust viaire
Que volisseiz par mi cel aire ;
Les eves faiseit corre ariere :
Scientose ert de grant maniere.
Sot que li reis la demandot,
Si s’atorna plus bel que pot :
D'une porpre inde a or gotee,
Richement faite e bien ovree,
Ot un bliaut forré d'ermines,
E un mantel de sambelines
PageV01P063
Covert d'un drap outremarin
Qui ses set peis valeit d'or fin.
Quant gentement se fu vestue,
Si est des chambres fors eissue;
Ses puceles mena o sei,
Desci qu'el fu devant le rei.
Trop fu bele de grant maniere
De cors, de façon e de chiere.
Bendee fu d'un treceor,
Onques nus hom ne vit meillor ;
A ses cheveus esteit orlaz.
Autre parole ne vos faz,
Mais el païs ne el regné
N'aveit dame de sa beauté.
Par mi la sale vint le pas ;
La chiere tint auques en bas,
Plus fine e fresche e coloree
Que la rose quant ele est nee :
Mout fu corteise e bien aprise.
Oëtès l'a lez lui asise.
Bien ot enquis e demandé
Dont cil erent, de quel regné.
Quant ele certainement sot
PageV01P064
Que c'ert Jason, mout par li plot :
Mout en aveit oï parler
E mout l'aveit oï loër.
Mout l'aama enz en son cuer :
Ne poëit pas a nesun fuer
Tenir ses ieuz se a lui non ;
Mout li ert de gente façon.
La forme esguarde de son cors :
Cheveus recercelez e sors
A e beaus ieuz e bele face, —
Dès or criem que trop ne li place; —
Bele boche a e dous reguarz,
Bel menton, bel cors e beaus braz ;
Large e grant a la forcheüre,
Si a mout simple parleüre,
Sage est e de bone maniere.
Mout le reguarde en mi la chiere.
PageV01P065
Mout i a Medea ses ieuz
Douz, frans e simples, senz orguieuz ;
Mout le remire doucement :
Sis cuers de fine amor esprent :
Mout par li plaist, mout li agree.
Tost li avreit s’amor donee,
S'il fust en lieu qu’il li queïst :
Ne cuit ja l'en escondeïst.
Onc mais nul jor n'i entendi,
N’amer ne voust ne n'ot ami :
Or i a si torné son cuer
Qu'el ne laira a nesun fuer
Qu'ele n'en face son poëir ;
Poi preisera tot son saveir,
S'ele n'aemplist son corage :
Mout le desire a mariage.
Ensi sofri a mout grant peine
Toz les uit jorz de la semaine ;
N'ot bien ne repos ne solaz :
PageV01P066
Dès or la tient bien en ses laz
Amors, vers cui rien n'a defense.
Sovent esguarde e se porpense
Coment ele ait joie pleniere,
Quar destreite est de grant maniere :
Mout en dote le comencier.
Un jor, quant vint après mangier,
Si l'ot li reis a sei mandee
En la sale pavementee,
Assez la conjot e embrace,
Cent feiz li a baisié la face ;
Comande li e dit après
Que o Jason e Herculès
Parout par bien, tant li consent.
E cele, que d'amor esprent,
S'en vient a eus mout vergondose,
De parler sage e sciëntose.
Mout par li fait Jason grant joie;
Soëf, basset, que l'om ne l'oie,
Li dist : « Vassaus, ne tenez mie
« A mauvaistié n'a legerie,
« Se a vos me vieng acointier :
PageV01P067
« II ne vos deit pas enoier.
« Dreiz est e biens, ço m’est avis,
« Qui home veit d’autre païs,
« Qu'il l’aparout e areisont
« E que leial conseil li dont. »
— Dame, » fait il, « vos dites bien :
« Merci vos rent sor tote rien
« Dont il vos plot qu’a mei parlastes
« E que premiere m’areisnastes.
« Fait i avez que de bon aire,
« E quant tant vos en plot a faire,
« A toz les jorz de mon aé
« Sacheiz vos en savrai mais gré.
« Mout par poëz grant joie aveir,
« Quar pleine estes de grant saveir,
« Beauté avez mout e franchise
« E de haut sen estes aprise.
—Jason, » fait ele, « bien savon
« Que vos venez por la Toison :
« Onques por el ça ne venistes.
PageV01P068
« Mais grant estoutie empreïstes,
« Quar, se erent tuit assemblé
« Cil qui furent e qui sont né,
« Ne porreient il engeignier
« Ne porquerre ne porchacier
« Par qu'il la poüssent aveir :
« De ço n'aiez vos ja espeir,
« Por neient le cuideriëz.
« Por quei vos travailleriëz ?
« Essaié s'i sont ja plusor,
« Quin furent mort al chief del tor :
« Onques n'oï qu’en eschapast
« Nus, qui de l'aveir se penast.
« Li deu i ont lor guarde mise
« Par tel maniere e par tel guise
« Com te dirai, quar bien t'est ues.
« Mars i a mis d'arain dous bues :
PageV01P069
« Quant ire e mautalenz les toche,
« Par mi les nes e par la boche
« Gietent de lor cors feu ardant :
« Ja de la mort n'avra guarant
« Quin iert atainz ne conseüz,
« Sempres n’arde com se c'ert fuz.
« Par art e par conjureison
« Ont cil en guarde le mouton :
« Qui la Toison voudra aveir,
« Si covendra par estoveir
« Que il les puisse si danter
« Que traire les face e arer.
« Mars, li poissanz deus de bataille,
« Les i a mis ensi senz faille.
« Ancore i a el a passer
« Que fait assez plus a doter :
« Quar uns serpenz qui toz jorz veille,
« Qui pas ne dort ne ne someille,
« Le reguarde de l'autre part
« Par tel engin e par tel art,
PageV01P070
« Que ja rien n'i aprochera
« Si tost come sempres morra ;
« Quar feu giete ensemble e venin,
« Qui tost li a doné la fin.
« Granz est e fiers e trop hisdos,
« Onc hom ne vit si merveillos :
« Ne porreit mie estre conquis
« Ne engeigniez a estre ocis.
« Que t’en fereie lonc sermon ?
« Saches ja n'avras la Toison
« Por rien que seit, nel cuider mie :
« Guar come as empris grant folie !
« Ainz te di bien, se tu i vas,
« Que ja mais n'en retorneras. »
Jason respont come afaitiez :
« Dame », fait il, « ne m'esmaiez :
« Ne sui mie por ço venuz
« Que m’en torge come esperduz ;
« Mieuz vueil morir que jo n'essai
« S’en nul sen aveir le porrai.
PageV01P071
« Se o mei ne l’en puis porter,
« Ja mais ne m'en quier retorner;
« Quar a toz jorz honiz sereie,
« Si que ja mais honor n'avreie.
« Par ci m'en covient a passer :
« Tant en ai fait nel puis muër ;
« Seit maus, seit biens, que que m'en vienge,
« Ne puet estre que jo m'en tienge.
— Jason, » fait ele, « bien entent
« N'en querreies chastiëment.
« Seürs puez estre de morir :
« De ço ne te puet nus guarir.
« Dueus e pitiez me prent de tei :
« La en iras, ço sai e vei ;
« Mais se de ço seüre fusse
« Que jo t'amor aveir poüsse,
« Qu'a femme espose me preisses,
« Si que ja mais ne me guerpisses,
« Quant en ta terre retornasses,
« Qu’en cest païs ne me laissasses,
« E me portasses leial fei,
PageV01P072
« Engin prendreie e bon conrei
« Com ceste chose parfereies,
« Que mort ne mahaing n'i prendreies.
« Fors mei ne t'en puet rien aidier
« Ne aveier ne conseillier.
« Mais jo sai tant de nigromance,
« Que j'ai aprise dès m'enfance,
« Que, quant que jo vueil, tot puis faire :
« Ja ne m'iert peine ne contraire.
« Quant que est grief, tot m'est legier :
« Ja n'i troverai encombrier.
« Or esguarde que tun feras,
« Saveir se tu[l] m'otreieras :
« Ton cuer m'en di senz deceveir,
« Tot ton corage en vueil saveir.
— Dame, » fait il, « jo qu'en direie ?
« Sor toz les deus vos jurereie
« E sor trestote nostre lei
« Amor tenir e porter fei ;
PageV01P073
« A femme vos esposerai,
« Sor tote rien vos amerai.
« Ma dame sereiz e m'amie,
« De mei avreiz la seignorie :
« Tant entendrai a vos servir
« Que tot ferai vostre plaisir.
« Menrai vos en en ma contree,
« Ou vos sereiz mout honoree :
« Tuit vos i porteront honor,
« E li plus riche e li meillor ;
« Plus i avreiz joie a plaisir
« Que li cors n'en porra sofrir. »
La pucele respont a tant :
« Or sai », fait el, « vostre talant.
« Ço remandra jusqu'eneveis
« Que se sera couchiez li reis.
« En ma chambre vendreiz toz sous :
« Ja compaignon n’avreiz o vos,
« La me fereiz tel seürance
« Que vers vos n'aie plus dotance ;
« Puis vos dirai com faitement
« Porreiz les bues e le serpent
« Veintre e danter e justisier :
PageV01P074
« Ja puis n'avreiz d'eus encombrier.
— Dame », fait il, « ensi l'otrei :
« Mais enveiez, sos plaist, por mei;
« Quar ne savreie ou jo alasse,
« Ne a quel hore jo levasse. »
Dist la pucele : « C'iert bien fait. »
Congié a pris, puis si s'en vait;
Ariere en ses chambres s’en entre.
Mout li tressaut li cuers el ventre;
Esprise l'a forment Amors.
Mout li enuie que li jors
Ne s'en vait a greignor espleit :
Mout se merueille que ço deit.
Tant a le soleil esguardé
Que ele le vit esconsé.
Mout li tarja puis l'anuitier,
Que son plait li fait porloignier;
PageV01P075
E quant le jor en vit alé,
N'ot ele pas tot achevé :
Soventes feiz a esguardé
La lune s'ele esteit levee.
Crient que sempres s'en aut la nuit :
Ne li torne mie a deduit
Ço que par la sale veillierent
E ço que pas ne se couchierent.
Son vuel, fussent tuit endormi :
Mout par en a son cuer marri.
As uis des chambres vait oïr
S'ancor parolent de dormir ;
Iluec escoute, iluec estait.
N'en ot tenir conte ne plait :
« Iço, » fait ele, « que sera ?
« Ceste gent quant se couchera ?
« Ont il juré qu'il veilleront
« E que mais ne se coucheront ?
« Qui vit mais gent que tant veillast,
« Que de veillier ne se lassast ?
PageV01P076
« Mauvaise gent, fole provee,
« Ja est la mie nuit passee,
« Mout a mais poi desci qu'al jor.
« Certes mout a en mei folor :
« De quei me sui jo entremise ?
« Mieuz en devreie estre reprise
« Que cil qui est trovez emblant.
« Fol corage e mauvais semblant
« Porreit l'om or trover en mei,
« Que ci m'estois ne sai por quei.
« Estuet me il estre en esfrei
« Que volentiers ne vienge a mei
« Jason, quel hore qu'i envei ?
« O il, mout volentiers, ço crei.
« Que faz jo ci ne cui atent?
« Tant en ai fait qu'or m’en repent. »
De l’uis se part en itel guise.
Vint a son lit, si s’est asise ;
Mais jo cuit bien certainement
Qu'el n'i serra pas longement.
PageV01P077
Relieve s'en, n'i puet plus estre,
S’ala ovrir une fenestre.
Vit la lune, que ert levee,
Lores li est s'ire doblee :
« Dès or, » fait ele, est il enuiz :
« Passee est ja la mie nuiz. »
Clot la fenestre, ariere torne :
Iriee est mout, pensive e morne.
En mi la chambre s’aresta
Tot en estant, si escota :
La noise oï auques baissiee,
Quar ja departeit la maisniee.
A l’uis s’en vait pensive e pale,
Si esguarda par mi la sale.
As chamberlens vit les liz faire :
Lores li est bien a viaire
Que jusqu'a poi se coucheront
E que guaires plus n'i serront.
Par la chambre vait sus e jus,
E sovent reguarde al pertus,
Tant que trestuit furent couchié.
PageV01P078
Bien a veü e aguaitié
Le lit ou Jason se coucha.
Une soë maistre apela :
Tot son conseil li a gehi,
Car el se fiot mout en li :
« Dreit a cel lit, » fait ele, « iras
« Tot soavet, le petit pas ;
« Celui qu'i gist m'ameine o tei :
« De noise te guarde e d'esfrei.
— Dame, » fait el, « premierement
« Vos couchiez, si sera plus gent,
« De la nuit est alé partie,
« Sil tiendreit tost a vilenie
« Qu'a couchier fusseiz a tel hore,
« Quar bien en est mais tens e hore. »
Fait la pucele : « Jo l'otrei. »
Ne firent mie lonc conrei.
En un chier lit d'or et d’argent,
Qu’onques nus hom ne vit plus gent,
Dont li quatre pecol egual
PageV01P079
Furent tuit ovré a esmal,
A esmeraudes verdeianz
E a rubins clers e luisanz ; —
Coute i ot grant vouse de paile,
Onc meillor n'en ot en Thesaile,
Elençueus blans deugiez de seie,
Ne cuit que nus hom meillors veie ;
Mout i ot riches oreilliers,
Onques pucele n'ot si chiers;
Li covertors fu riche assez,
D'unes bestes fu toz orlez
Que reluisent come orpimenz;
D'autres mout chieres fu dedenz ;
Vous fu d’un drap sarragoceis
D'or e de seie trestot freis ; —
El lit se coucha la pucele,
Que mout fu sage e gente e bele :
Bien esteit digne d'itel lit.
La vieille, senz autre respit,
PageV01P080
De la chambre s'en est eissue,
Dreit au lit Jason est venue;
Tot belement e en secrei
Le traist par mi la main a sei.
E cil s'en leva mout isnel,
Si s'afubla de son mantel
Tot soavet et a celé
S'en sont dedenz la chambre entré.
Clarté i ot, tres bien i veient,
Car dui cierge grant i ardeient.
La maistre a l'uis clos e serré,
Puis l'a desci qu’al lit mené.
Medea le senti venir,
Si a fait semblant de dormir,
E cil ne fu pas trop vilains :
Le covertor lieve o ses mains.
Cele tressaut, vers lui se torne ;
Auques fu vergondose e morne :
« Vassaus, » fait el, « qui vos conduit ?
« Mout par avez veillié anuit.
« Tel noise ai tote nuit oïe
PageV01P081
« Qu'or m'ere a grant peine endormie.
— Dame, » fait il, « n’i quier guion
« Se vos e vostre maistre non :
« S’en vostre prison me sui mis,
« II ne m’en deit pas estre pis. »
La vieille ensemble les laissa,
En autre chambre s’en entra.
Jason a parlé toz premiers :
« Dame, li vostre chevaliers,
« Icil qui quites senz partie
« Sera toz les jorz de sa vie,
« Vos prie e requiert doucement
« Quel receveiz si ligement,
« Qu’a nul jor mais chose ne face
« Que vos griet ne que vos desplace. »
Medea respont : « Beaus amis,
« Grant chose m’avez mout pramis :
« Se vos le voliëz tenir,
« Ne me porriëz plus ofrir.
« Seürté vueil que jo en aie :
« Puis atendrai vostre manaie.
PageV01P082
— Dame, a trestot vostre plaisir ;
« Senz fauseté e senz mentir,
« Vos en ferai tel seürtance
« Qu’a tort avreiz vers mei dotance. »
Une pelice vaire e grise
Vest Medea sor sa chemise,
Del lit s’en est a tant levee,
Si a une image aportee
De Jupiter le deu poissant :
« Jason, » fait el, « venez avant.
« Vez ci l’image al deu des cieus :
« Jo ne vueil mie faire a gieus
« De mei e de vos l’assemblee ;
« Par ço vueil estre aseüree.
« Sor l'image ta main metras,
« E sor I'image jureras
« A mei fei porter e tenir
« E mei a prendre senz guerpir ;
« Leial seignor, leial amant
« Me seies mais d’ore en avant. »
PageV01P083
Jason ensi li otreia,
Mais envers li s'en parjura ;
Covenant ne lei ne li tint :
Por ço, espeir, l’en mesavint.
Mais jo n'ai or de ço que faire,
Del reconter ne del retraire :
Assez i a d'el a traitier,
Ne le vos quier plus porloignier.
Tote la nuit se jurent puis,
Ensi com jo el Livre truis,
Tot nu a nu e braz a braz.
Autre celee ne vos faz :
Se il en Jason ne pecha,
Cele nuit la despucela ;
Quar, s'il le voust, ele autretant.
E quant ço vint à l'ajornant :
« Dame, » fait il, « ne targera,
« Desci qu’a poi ajornera;
« Ne porrai mais guaires ester
« Qu'il ne m'en estuisse torner.
« Or m'est mestiers, or me bosoigne
PageV01P084
« Que de mei penseiz sens aloigne,
« Quar en vos en est m’esperance
« E mis conseuz e m’atendance. »
Fait la danzele : « Beaus amis,
« Sacheiz, j'en ai bien conseil pris. »
Andui se sont del lit levé,
Quar ja pert del jor la clarté.
Un escrin d’or prist Medea,
Veiant Jason le desferma,
Si en a trait une figure
Faite par art e par conjure :
« Ço, » fait el, « porteras o tei;
« Quar jo te di en dreite fei,
« Ja, tant com tu sor tei l’avras,
« Rien nule en terre ne criembras. »
Après li baille un oignement,
Ne sai com fu faiz ne coment :
« De ço, » fait ele, « seras oinz,
« Car de ço t’est graindre bosoinz.
PageV01P085
« Puis n'avras ja de feu dotance
« Qui a ton cors face noisance.
« Or te baillerai un anel,
« Si ne verras ja mais plus bel ;
« E si saches bien que la pierre
« Ne puet estre en nul sen plus chiere.
« Soz ciel n'a home qui seit vis,
« Dès qu'il l'avra en son deit mis,
« Qui ja puis crienge enchantement,
« Feu, arme, venin ne serpent :
« Ne li pueent faire emcombrier,
« Ne en eve ne puet neier.
« Tant com l'anel avras sor tei,
« Mar avras dote ne esfrei.
« Ancore a il autres vertuz :
« Se tu ne vueus estre veüz,
« La pierre met defors ta main :
« Adonc puez bien estre certain
« Que ja rien d'ueil ne te verra.
« E quant ço iert qu'il te plaira
PageV01P086
« E que tu n'avras d'iço soing,
« Clo la pierre dedenz ton poing :
« Si te verra l'om come autre home.
« Onques Oteviens de Rome
« Ne pot conquerre cel aveir,
« Qui cest poüst contrevaleir.
« L'anel » fait el, « me guarde bien,
« Quar jo l’aim plus que nule rien. »
Après li rebaille un escrit,
E si li a mostré e dit :
« Jason, quant le mouton verras,
« Ne faire ja avant un pas
« Desci qu'aies sacrefiié,
« Que n'en seient li deu irié :
« Crieme sereit, se nel faiseies,
« Que chierement le comparreies.
« Par iço les apaieras,
« E dementres que tul feras,
« Cest escrit di tot belement
PageV01P087
« Treis feiees contre Orient :
« Guart bien seies amenteüz.
« Or te baillerai ceste gluz
« Par tel maniere destempree,
« Que ja a rien n'iert adesee
« Dont ja mais desevree seit.
« Grant aleüre va tot dreit ;
« As nes e as boches as bues
« L'espant tote, quar bien t'est ues :
« Par ço les avras si conquis,
« Ja feus de lor cors n'istra puis.
« Arer les feras quatre reies,
« Mais clo tes ieuz, que tu nes veies ;
« Puis t'en va tot seürement
« Combatre contre le serpent.
« Bataille grant i troveras,
« Mais ja mar le redoteras,
« Quar ja vers tei n'avra poëir.
« Or te vueil bien faire saveir :
PageV01P088
« Trestoz les denz fors li trairas,
« En la terre les semeras
« Que o les bues avras aree,
« Qu'ensi est chose destinee
« Qu’en autre sen ne puet pas estre.
« Sempres verras a tez ieuz naistre
« Des denz chevaliers toz armez
« E de lor armes adobez:
« En poi d'ore seront nascuz,
« E d'eumes, d’aubers e d’escuz
« Seront mout bien apareillié ;
« Mais mout seront entre eus irié.
« Veiant tes ieuz s'entrociront,
« Si tost come il s'entreverront.
« Adonc avras tot achevé,
« Mais guar n'i scies oblié :
« Por ço qu'avras eü victoire,
« Si rent as deus merci et gloire ;
PageV01P089
« Treiz feiz lor fai afïlicion,
« Après iras vers le mouton.
« LaToison prent, lui laiester,
« E net'i chaut plus demorer:
« Isnelement si t’en repaire,
« Qu'enui n'i aies ne contraire.
« Ne te sai plus que enseignier,
« Mais doucement te vueii preier
« Que de tot ço rien n'obliër.
« Dès or t’en puez hui mais aler;
« Ne poons or plus estre ensemble :
« Granz jorz est ja, si com mei semble. »
Entre ses braz Jason la prent,
Cent feiz la baise doucement ;
Après apris deli congié,
Dreit a son lit est repairié.
Bien a repost e bien mucié
Ço que cele li ot baillié :
A grant maniere se fait liez.
PageV01P090
Quant en son lit se fu couchiez,
Endormi s'est en es le pas,
Quar de veillier esteit toz las;
E quant il ot dormi grant piece,
Il pot estre ja haute tierce.
Levez s’est, e si s'apareille :
Aler en vueut a la merveille.
Grant paor et grant sospeçon
Ont de lui tuit si compaignon.
Quant Oëtès veit qu’il vueut faire,
Bonement li prent a retraire :
« Jason, ço saches, de ta mort
« Ne vueil estre blasmez a tort :
« Por çol te di, se m'en creeies,
« Ja la le pié ne portereies.
« Onc ne vi nul, qui i alast,
« Qui ariere s'en retornast.
« Li deu i ont lor guarde mise,
« Qui ne vuelent en nule guise
« Que hom charneus i mete main.
« De ço somes nos bien certain :
« Se tu i vas, fins iert de tei,
PageV01P091
« Mais ja ne t'iert veé par mei.
« Force sereit que te fereie,
« Si sai que blasmez en sereie.
« Fai en tot ço que tu voudras :
« Ja mar por mei le laisseras.
Tot quant qu'Oëtès li reis dit
Prise Jason assez petit.
II ne se vueut plus atargier :
De la cité s'en ist premier.
Li reis, li prince e li baron,
Herculès e si compaignon
Le conveient jusqu'al rivage,
Ou il devait prendre passage.
Iluec li covint a passer,
Vousist o non, un braz de mer;
Mais estreiz ert, ne durot mie
Guaires plus de liue e demie.
De l'autre part ert li isleaus :
N'ert guaires granz, mais mout ert beaus.
Ço li ont dit, la trovera
Ço que il quiert e ou il va.
Lez le rivage, el sablonei,
Prist ses armes e son conrei.
PageV01P092
Primes chauça ses genoillieres :
Onc el siegle nen ot si chieres.
D'or fin furent li esporon,
Taillié de l'uevre Salemon.
Après a un hauberc vestu,
Onques mieudres forgiez ne fu :
Tailliez ert bien a sa mesure ;
La maille en ert serree e dure.
Poi li pesa, quant l'ot vestu.
Après laça un heaume agu,
Resplendissant, de bone taille :
Ja por arme ne fera faille.
Li cercles ert d'or esmerez
E des nons as deus toz letrez :
Mout l'en teneit om a plus riche.
Li nasaus fu d'un chier oniche :
Qui meillor ne plus beau queïst
PageV01P093
De folie s'entremeïst.
Après a ceint un brant d’acier, —
Onques nus om ne vit plus chier,
Si riche ne de sa valor, —
Cler e tranchant come rasor.
Un escu ot d'os d'olifant,
Fort e bien fait e riche e grant :
La bocle en fu d’or Espaneis
E la guige tote d’orfreis.
Un grant espié cler e luisant
Li baillierent d’acier trenchant.
Quant bien l'orent apareillié,
Si a d'eus toz pris le congié.
Baise Herculès e sa maisniee,
Qui de lui remaint mout iriee :
Grant duel demeinent li plusor,
Quar paor ont de lor seignor.
En un batel s'en est entrez,
De la terre s'est esquipez.
N'ot o sei autre marinier,
Ne n'i mena point de destrier :
PageV01P094
Ço saveit bien, n'i vausist guaire
A tel bosoing n'a tel afaire,
Dreit vers l'isle nage a expleit,
Al mieuz qu'il sot e al plus dreit.
Medea fu en une tor :
Vit le, si mua la color.
Des ieuz plora, nel pol muër,
Quant elel vit en mi la mer.
Belement dist entre ses denz :
« Jason, sire, beaus amis genz,
« Mout sui por vos en grant error,
« Quar jo vos aim de grant amor.
« En grant dotance m'avez mise :
« Ne puet mais estre en nule guise
« Que jo m'en puisse aseürer,
« Tant que vos veie retorner.
« Grant paor ai e grant dotance
« Que de ço n'aiez remembrance
« Que vos ai dit e enseignié :
« Ja mais nen avrai mon cuer lié
« Desci que vos tienge en mes braz.
« A toz les deus oreison faz
« Qu'il ne seient vers vos irié. »
PageV01P095
A tant en plore de pitié.
Jason a ja tant espleitié
Que en l'isle fu essaivié.
N’i ot puis autre demorance :
Son escu a pris e sa lance,
Eissuz s'en est fors del batel,
Puis est poiez sus en l’islel.
Les bues choisi e le serpent
E le mouton, qui mout resplent :
Grant clarté done l'or vermeil
Contre la raie del soleil.
Des nes e des boches as bues
Eissi tel flambe e teus feus lues,
PageV01P096
Ço ert avis, qui l’esgardot,
Que toz li isles embrasot.
Jason son oignement a pris,
Son cors en a oint e son vis.
La figure a sacrefiiee
Que Medea li ot bailliee ;
Mist la sor l'eaume e atacha,
Si come ele li enseigna.
Après fist as deus sacrefise
A la maniere e a la guise
Que la pucele li ot dit,
E treis feiees list l'escrit.
Vers les bues ala maintenant
Tres par mi le grant feu ardant.
Sempres fu toz arz sis escuz,
Mais il ne fu mie esperduz :
La gluz es boches espandi,
Onques puis flambe n'en eissi ;
Lor vertu ne monta puis guaire.
PageV01P097
Quatre reies lor a fait faire,
Si com li ot dit Medea ;
Mais onc nel vit, bien s'en guarda;
Onques n'i osa esguarder :
Ne voleit mie trespasser
Ço que li aveit dit s'amie,
Quar il feïst mout grant folie.
Quant ço ot fait, delivrement
Ala requerre le serpent.
Quant li serpenz le vit vers sei,
En haut sifla e fist esfrei :
Ses escherdes herice e tremble,
Feu e venin li gete ensemble;
Sovent trait fors son aguillon,
Tote la terre art environ :
Soz ciel n'a rien, que onc fust nee,
Que ja eüst vers lui duree.
Ne fust Jason si bien guarniz,
En petit d'ore fust feniz :
Que de l'arson, que del venin
Sempres fust alez a sa fin;
PageV01P098
Mais l'oignemenz e la figure,
Ou erent escrit li conjure,
E li aneaus d'or qu'il portot
Le defendeit e porguardot.
Sor lui peceie son espié
Sanz ço que de rien l'ait plaié;
En mainte guise s'i essaie,
Ainz qu'il li puisse faire plaie.
De l’espee teus cous li done
Que toz li isles en resone :
N'i puet entrer, ainz s'en resort,
Tant a la pel e dure e fort.
Soz sei l'abati mainte feiz,
Si angoissos e si destreiz,
Que assez en failleit petit
Qu’il ne l'esteint e ne l'ocit.
Tel angoisse a, quant il l’atoche,
Que le sanc rent par mi la boche :
Tel angoisse a, toz en tressue ;
Mais tant s’esforce e s'esvertue
E tant i chaple de s'espee
PageV01P099
Que la teste li a coupee.
S'un poi durast plus la bataille,
Sempres fust morz Jason senz faille.
Les denz en traist, sin a semee
La terre qu'il aveit aree :
Tantost en sont chevalier né,
De lor armes tuit adobé.
En es le pas se corent sore,
Ocis se sont en petit d'ore.
Donc ot Jason tot achevé
E son grant travail afiné :
Granz merciz a as deus rendues
Des victoires qu'il a eües.
II est venuz dreit al mouton,
Si en a prise la toison.
N'i voust puis faire lonc estage :
Tost i poüst aueir damage.
A son batel vint dreit errant,
Si entra enz de maintenant;
Destachié l’a, e si s'empeint,
PageV01P100
De tost nagier pas ne se feint.
Medea le vit el retor,
Que fu as estres de la tor.
S’ele ot joie, nus nel demant,
Quar onc greignor n’ot rien vivant :
Li sans li revint en la chiere,
Dès ore ataint joie pleniere.
Herculès e li chevalier
Virent lor seignor repairier :
Tel joie en ont, nel set nus dire,
Mais mout en a li reis grant ire.
Jason est a terre venuz,
Forz del batel s'en est eissuz.
Receivent le joiosement
Tuit ensemble comunaument;
Isnelement le desarmerent
lcil des suens qui plus l'amerent.
Tote la gent de la contree
I est venue e assemblee
PageV01P101
Por esguarder la grant merveille,
Qu'onques ne vit nus sa pareille,
Ne ja nen iert mais tel veüe :
Fiere parole en ont tenue.
La Toison ont mout esguardee ;
Diënt que c'est chose faee.
Bien afichent veraiement,
S'as deus ne venist a talent,
Ne poüst pas estre engeignié.
Se d’eus ne li fust otreié,
Com faitement e en quel guise
Poüst par home estre conquise ?
Mout ont Jason entre eus loé :
Bien le tienent tuit a faé.
En la cité li reis l'en meine,
De lui honorer mout se peine.
Si come il el palais entra,
Encontre li vint Medea:
Cinq cenz feiees le baisast
PageV01P102
Mout volentiers, se ele osast,
Par mi les flans l'a embracié;
Soavet li a conseillié
Que la nuit venge a li parler,
Quant il iert lieus, senz demorer :
« Dame », fait il, « mout le desir ;
« Del tot ferai vostre plaisir. »
Li bainz li fu apareilliez :
Quant lavez se fu e baigniez
Isnelement s'en est eissuz ;
Mout est de riches dras vestuz
Que s'amie li ot transmis.
Après sont al mangier asis ;
Servi furent mout hautement,
N'i ferai plus porloignement :
Tote la quinzaine e le meis
S'i sojornerent li Grezeis.
Grant leisir ont li dui amant
De faire ensemble lor talant :
Sovent demeinent bele vie.
Jason en a mené s’amie,
Quant ço avint qu'il s'en ala.
Grant folie fist Medea:
PageV01P103
Trop ot le vassal aamé,
Por lui laissa son parenté,
Son pere e sa mere e sa gent.
Assez l'en prist puis malement ;
Quar, si com li Autors reconte,
Puis la laissa, si fist grant honte.
El l’aveit guardé de morir:
Ja puis ne la deüst guerpir.
Trop l’engeigna, ço peise mei;
Laidement li menti sa fei.
Trestuit li deu s'en corrocierent,
Qui mout asprement l’en vengierent.
N’en dirai plus, ne nel vueil faire,
Quar mout ai grant uevre a retraire.
Quant en Grece furent venu,
AI port dont il erent meü
Ariverent joiosement :
De grant peine e de grant torment
Furent estors, ço lor est vis.
Grant joie en firent lor amis :
Fiere parole en demenerent,
PageV01P104
Quant la merveille remirerent.
Mout en reçut Jason grant pris
E grant honor, si com jo truis.
Sis oncles l'a mout honoré ;
Ne li a nul semblant mostré
Qu'il fust iriez de sa venue :
N'esteit pas chose aperceüe
Qu'il le haïst ne qu'il vousist
Que damages li avenist.
De sa vie ne de son fait
Ne sera plus par mei retrait :
Jo ne le truis pas en cest livre,
Ne Daires plus n'en voust escrire,
Ne Beneeiz pas ne l'alonge,
Ne pas n'i acreistra mençonge.
Daires n'en fait plus mencion :
Mais qui or veut oïr chançon
De la plus haute uevre que seit
Ne que ja mais oïe seit,
PageV01P105
Des plus granz batailles crueus,
Des plus fieres, des plus morteus,
Dont la riche chevalerie
Que a cel tens ert fu perie,
E destruite la grant cité,
Jo l'en dirai la verité
E retrairai trestote l’uevre,
Si com li Autors la descuevre.
# | PREMIÈRE DESTRUCTION DE TROIE
Cil orent conté e retrait
Ço qu’a Troie lor ot om fait,
Si com li reis les congea,
Qui sa terre lor devea,
Ne pas nes i voust consentir
E assez les cuida laidir :
Mout par en ont tenu grant conte.
PageV01P106
Grant tort, grant despit e grant honte
Lor fist Laomedon li reis :
Mout en a pesé a Grezeis,
En desdeing pristrent e en gros
De ço qu'il onques fu si os,
De sa terre lor fist devié ;
Mout par en sont trestuit irié.
Juré ont bien tuit e pramis
Qu'il en destruiront son païs,
Tote l’en confondront sa terre :
Seürs puet estre de tel guerre,
Dont il sera honiz e morz :
Mal lor i devea ses porz.
Ne s'en voust pas taire Herculès :
Sor sei en prist le greignor fais,
A toz ses amis le mostra ;
Tant dist, tant fist, tant porchaça
Que ceus de Grece a esmeüz
Vers Troïens toz irascuz.
Par son porchaz e par ses diz,
Si com reconte li Escriz,
Mut le damage e tot l'afaire
PageV01P107
Que vos orreiz hui mais retraire.
A Parte ala, ne tarja plus;
La trova Castor e Pollus :
Frere esteient e andui rei,
Riches ert chascuns endreit sei.
Cist ont grant joie fait de lui.
Tant lor a dit que ambedui
Li ont pramis a aïdier :
« Prest sont » ço diënt, « del vengier;
Ja por eus n'i avra tarjance,
Mout en iert prise grief venjance.
Bien puet estre li reis seürs,
Ja si forz tors ne si forz murs
N'avra, que par force nes prengent
E que sa honte ne li vengent. »
Mout par s'en fait Herculès liez
E mout les en a merciiez
E parfondement les encline;
PageV01P108
Puis est alez a Salemine.
Telamon trueve le corteis :
N’ot en Grece meillor Grezeis,
Ne plus riche, ne plus hardi,
Ne Mieuz aidant a son ami.
Tote l'uevre li a retraite
E la honte que lor fut faite :
« Se vos », fait il, « de rien m'amez,
« Or i parra ; si en venez
« A Troie, quar nos i alons :
« Pro avrons gent, se vos avons.
« Trop sereit lait tot a estros
« Que nos i alissiens senz vos ;
« Mout iert honiz qui remandra. »
Tant li a dit, tant li preia
Que de l’aler cil li afie ;
E Herculès mout l'en mercie.
Puis est venuz en Fice ariere.
A Peleüs fait grant preiere
Que de l’aler prenge conrei,
E de mener ensemble o sei
Les meillors homes de sa terre
E ceus qui plus sevent de guerre.
PageV01P109
« La terre est riche e d'aveir pleine :
« Senz grant travail e senz grant peine
« Porrons le païs eissillier
« E nostre grant honte vengier.
— Par fei », ço respont Peleüs,
« Tant i menrai contes e dus
« E chevaliers proz e hardiz, —
« De ço seiez seürs e fiz, —
« Qu'en la terre sojornerons
« Un an o dous, se nos volons. »
Fait Herculès : « Vos dites bien :
« Ne me poüsseiz dire rien
« Dont me feïsseiz si grant joie,
« Come d’aler sor ceus de Troie. »
A Nestor est tot dreit alez,
Qui riches ert e renomez.
L’uevre li prent tote a retraire
E ço que il voleient faire.
Cil ne s'en fait de rien eschis,
Ainz dit : « Senz faille vos plevis
« Que jo serai li premerains
« A destruire les Troïains.
« Ja ne verrai vostre message,
« Sempres ne m’aiez al rivage ;
PageV01P110
« Teus compaignons menrai o mei,
« Qui tost movront un grant desrei.
« Jo n'oï onques mais novele
« Que plus me fust bone ne bele ».
Or a quant que vueut Herculès :
Nule chose ne li faut mais.
As porz font faire quinze nes ;
D'ancres, de veiles e de tres
Les apareillent e guarnissent
E de vitaille les emplissent.
Quant vint el tens qu'iverz devise,
Que l'erbe vert pert en la lise ;
Lan que florissent li ramel,
Que doucement chantent oisel,
Merle, mauviz e oriol
E estornel e rossignol,
La blanche flor pert en l’espine
E reverdeie la gaudine ;
Quant li tens est douz e soés,
Lors partirent des porz les nes.
Ceus qu'Herculès aveit somons,
Les dus, les princes, les barons,
PageV01P111
Ot toz mandez e atenduz,
Ainz que des porz se fust meüz.
Puis s'empeignent es hautes ondes;
Par la ou els sont plus parfondes,
Traient e siglent a esforz.
Dès qu'il furent parti des porz,
Onques ne pristrent ces ne fin,
Nul jor ai seir ne al matin,
Desci qu'il virent la contree
Qu’il aveient tant desiree :
Mout par orent trestuit grant joie
Quant le païs virent de Troie.
Le jor laissierent trespasser,
E quant ço vint a l’avesprer,
Al port de Sigeon tornerent,
Totes lor nes i ariverent.
Quant il les orent aancrees,
Si les ont bien achastelees :
Par les bretesches metent armes,
Haches, darz, javeloz, gisarmes,
PageV01P112
Que, se ço esteit aventure
Que d'eus fust fait desconfiture,
As nes refust lor forterece,
S'il lor tornot a grant destrece.
Quant la nuit fu tres bien meiee
E la lune se fu couchiee,
Sor le rivage, el bel sablon,
S’en eissirent fors li baron.
Un parlement ont d'eus josté ;
Peleüs a premiers parlé :
« Oëz, » fait il, « seignor ami,
« Riche, sage, pro e hardi.
« En tot le siecle ne sai taus,
« Si corajos ne si vassaus,
« Ne qui aient le tierz conquis
« Riches terres ne bons païs.
« Mainte bataille avez vencue
« E mainte terre escombatue :
PageV01P113
« Par tot vos est bien avenu,
« Quar onques ne fustes vencu,
« Ne ne sereiz ja por nul plait.
« Tant avons espleitié e fait
« Qu'en cest païs some entré,
« Nel sevent ancore home né.
« A ço nos covient ore entendre
« E entre nos tel conseil prendre
« Que nos ensi le poissiens faire.
« E de ceste chose a chief traire,
« Que nostre en seit or la victoire,
« L’onor e le pris e la gloire.
« Treis choses vos i vueil mostrer,
« Que bien i font a esguarder
« E que chascuns deit bien saveir
« Que faire en deit tot son poëir.
« L’une est de prendre vengement
« Del lait qu'il firent nostre gent,
« Quant de cest païs les chacierent
« E laidement les manacierent.
PageV01P114
« L'autre est des terres chalongier,
« Qu‘il ne nos puissent damagier :
« N'avra en eus que corrocier,
« Quant verront lor terre eissillier ;
« Mout se peneront del defendre
« E de nos cors ocire e prendre;
« Mais de ço ne m'esmai de rien,
« Quar vos le fereiz par tot bien.
« La tierce chose que vos dis,
« Se nos vencons noz enemis :
« A Troie sont li grant tresor
« De pailes e d’argent e d'or
« E de tote autre manantie,
« Ne nos n’avons pas la navie
« Ou la meitié en portissons,
« Quant nos nos en retornerons ;
« Toz jorz en serons mais manant
« En noz terres e nostre enfant,
« E tote Grece en vaudra mais,
« Quant serons mort, mil anz après.
PageV01P115
« Or n'i a plus : la nuit s’en vait;
« Ne covient pas faire lonc plait.
« Tens est mais hui de nos armer :
« Jusqu'a poi verrons ajorner.
« Partons noz genz e ordenons
« E nos eschieles devisons
« Par tel sen e par tel maniere,
« Com plus nos seit chose legiere,
« Que, quant ço vendra a la feire,
« Qu'il nen i ait rien a refaire,
« Que ne seiens gent esbaïe.
« E qui le mieuz savra, sil die. »
Herculès respondi premier :
« Leial conseil e dreiturier
« Donez, sire, senz nule dote.
« Faisons armer nostre gent tote :
« A Troie en auge une partie,
« L'autre remaigne a la navie.
« Jo e Telamon veirement
PageV01P116
« Irons devant o nostre gent ;
« Vos vendreiz el conrei après
« A  sostenir le greignor fais :
« Chascuns avra sa compaignie.
« Ainz que l'aube seit esclarcie,
« Nos embuscherons près del mur
« En lieu covenable e seür.
« Li autre, qui ci remandront,
« En treis conreiz se partiront :
« En l'un sera li reis Nestor,
« E en l’autre sera Castor ;
« Pollus avra le tierz conrei.
« Devant les nes, el sablonei,
« Tendreiz o eus torneiement.
« Ço sai jo bien certainement,
« Dès que li reis ci nos savra,
« O quant que il aveir porra,
« S'en istra sempres o le cri :
« En es le pas les avreiz ci.
« Tant voudront estre a la meslee,
« Ja la cité n'iert reguardee,
« E qui ainz ainz ça en vendront,
PageV01P117
« Dès que la novele en orront :
« Mout sera tart as Troïans
« Qu’il nos truissent ça fors es chans.
« Ja n'i avra resne tenue
« Desci que targe i ait fendue.
« Vos, n'aiez cure de desrei :
« Ici mantenez le tornei.
« Nostre gent sera embuschiee :
« Quant la vile sera voidiee,
« De nostre embuschement saudrons,
« Tot a delivre i entrerons ;
« Ja n'i troverons grant content,
« Quar fors sera tote lor gent.
« Quant les portes avrons saisies
« E de nos chevaliers guarnies,
« Après lor dos nos apoindrons ;
« En itel sen les forsclorons,
« Sorpris seront de grant maniere,
« Quant escrié seront deriere;
« Estrangement seront enclos,
PageV01P118
« Quant nos les assaudrons as dos :
« Se ariere vuelent torner,
« Par nos les covendra passer.
« Onc ne virent si fort passage,
« Ne qui lor tort a tel domage :
« Leiaument vos jur et plevis
« Qu’ensi seront tuit mort e pris.
« Qui mieuz savra, si m’i ament;
« Mais, solonc le mien esciënt,
« Jo cuit aveir auques bien dit. »
N’i ot un sol, grant ne petit,
Qui li conseil a buen ne tienge,
Coment que il lor en avienge,
As armes corent a eslais,
Quar le jor criement, qui est près.
Sor le rivage, el sablonei,
A chascuns d’eus pris son conrei.
PageV01P119
De blans haubers, d'eaumes aguz
E de maintes colors escuz
S'apareillierent gentement;
Après desevrerent lor gent.
Herculès chevaucha premiers
Bien o dou mile chevaliers.
Dus Telamon avuec sa gent
Chevauche après serreement :
Trei mile en i ameine o sei,
Qui soz Ies heaumes furent quei.
Après chevauche Peleüs,
Qui des chevaliers ot le plus :
Quatre mile, tuit alosé,
En vont o lui vers la cité.
Mout sont riches les treis compaignes :
Covertures et entreseignes
Aveient de maintes colors.
Anceis que pareüst li jors,
PageV01P120
Se repostrent par les vergiers,
Qu'il troverent granz e pleniers.
Contre le tens d’esté novel,
Esteient flori li ramel,
E li arbre vert e foillu
Les ont guardé e defendu,
Que nus ne les i aparçut.
Li clers rnatins, qui venir dut,
Ne tarja guaires : l’aube crieve
E li soleuz s’espant e Iieve.
Li païsant de la contree
Virent la grant gent aünee,
Virent les nes e les armez :
Ço les a fortment esfreez.
Li criz lieve par le païs,
Dès qu'il virent lor enemis;
Grant fut la noise e granz li sons;
Fuient as bois e as boissons.
A la cité en vait li criz :
Li plus seürs fu esfreïz.
Laomedon ot mout grant ire,
PageV01P121
Quant il oï noncier e dire
Que li Greu erent retorné
Por lui destruire e son regné.
Isnelement arma son cors,
De la vile s'en eissi fors,
O itant de gent come il ot
E come il onques aveir pot.
Vers eus chevauche a grant espleit,
E dès que il les aparceit,
Ferir les vait demaintenant :
La ot maint chevalier sanglant,
E maint navré e maint maumis,
E maint abatu e ocis ;
E dès qu'il vindrent as espees,
Mout s’entredonent granz colees.
La ot maint heaume esquartelé
E maint chevalier decoupé :
Par grant ire se requereient.
PageV01P122
Espessement s’entrociëient.
Nestor avuec la soë gent
Les encontra premierement.
Le pis en ot al comencier :
Mout i ot as suens grant mestier.
Grant piece tindrent le tornei,
Ainz que venissent li conrei
Ou Castor e Pollus esteient;
Mais puis que il le bosoing veient,
Si secorent lor compaignons.
Lors mut Castor o tot les sons :
Lances baissiees, escuz pris,
Vont encontre lor enemis.
La ot grant presse e grant huëe
E mainte fort targe esfondree.
Mout se tindrent li Troïien,
Estrangement le firent bien :
Onc de la place ne se murent,
Toz tens espessierent e erurent.
Lor gent veneit a granz compaignes
PageV01P123
Par valees e par montaignes:
Une envaïe lor ont faite,
Ou mainte espee ot nue traite.
La ot mainte sele voidiee ;
Chaciez les ont plus d'une archiee.
Se ne fust li conreiz Pollus,
Qui a venir ne tarja plus,
Sempres i perdissent Grezeis:
Mais li autre, qui vindrent freis,
Lor laissierent chevaus aler:
La veïsseiz estor lever
Estrange e pesme e doloros,
Lait e mortel e angoissos.
Grant sont li hu, grant sont li cri ;
La s'aïdent li plus hardi :
Al departir sont les colees.
Quant les compaignes sont jostees,
Si ront recovree la place;
Mais mout dura petit la chace,
E ne por quant li Troïien
I perdirent, ço sai jo bien,
PageV01P124
Cent chevaliers proz e vaillanz
E de toz les mieuz combatanz.
Laomedon, de Troie reis,
A esguardé que li Grezeis
Damagereient mout sa gent,
S'il ne les teneit autrement.
Trop folement se desreoënt,
Nule mesure n'i guardoënt :
Mout i perdeient por ço plus.
Li reis les a fait traire en sus,
Sevrez les a e faiz conreiz :
Dès or sera beaus li torneiz;
Or i avra joste senz faille,
Ainz que departe la bataille.
Li reis Nestor fu mout hardiz
E chevaliers granz e forniz.
Armez fu bien el milsoudor,
PageV01P125
Soz ciel n'en aveit nul meillor :
Uns sors baucenz ert de Castele,
Ne s’i tenist pas arondele.
Les menuz sauz en vient es rens:
En corage ot e en porpens
Qu'il ira ja ferir les lor.
Laomedon mantint l'estor,
Ses homes chadele e estreint :
De bien faire pas ne se feint.
Onques nus hom de mere nez
Plus richement ne fu armez ;
Riches armes ot a merveille.
D'une chiere porpre vermeille
Ot coverture e entreseigne
E en sa lance grant enseigne ;
Les lengues l’en batent as poinz.
Nestor broche vers lui toz joinz.
Li reis le vit vers lui venir,
De plain eslais le vait ferir :
Tant com cheval porent aler,
PageV01P126
Se vont granz cous entredoner ;
Par mi les bocles des escuz
Se passserent e fers e fuz.
Li reis a peceié sa lance,
Mais jo vos di bien senz dotance,
Nestor eüst navré a mort,
Se il n’eüst hauberc si fort.
Cil refiert lui par grant vigor,
Si que la targe peinte a flor
Li a fendue e dequassee
E la broine li a fausee ;
Auques l'a navré tot de plain
Par mi le braz e par la main;
Puis l'a empeint de tel vertu
Qu’a la terre l'a abatu.
Li reis fu merveilles iriez :
Isnelement sailli en piez.
Ainz que Nestor feïst son tor,
Ot trait le vert brant de color ;
Treis cous l’en dona granz e fiers :
PageV01P127
Mout ert li reis bons chevaliers.
Uns Troïens, Cedar ot non,
Jovnes senz barbe e senz grenon, —
N'ert ancor pas li anz passez
Qu’il aveit esté adobez. —
Mout ot grant duel, mout fu marri,
Por poi li cuers ne li parti,
Quant son seignor vit a la terre :
Par ire vait Nestor requerre.
Tel li dona en mi le piz
Que de sa lance vole escliz :
Outre en passast le confanon,
Se il n’eüst hauberc si bon ;
Mais ne por quant al par hurter
L’a fait a la terre enverser.
Li heaumes feri el gravier,
Si quel virent mil chevalier.
Toz li premiers qui i avint,
PageV01P128
Ço fu li reis, qui le brant tint
Cler e trenchant el poing tot nu :
Parmi l’eaume l’en a feru
De tel aïr que le nasal
L'en a abatu contre val,
Que de la levre e del menton
Puet om veeir sor le sablon.
Bien cuit que s'en venjast li reis,
Se nel hastassent li Grezeis ;
Mais tant i a d’eus assemblé
Que l’un de l’autre ont dessemblé.
Mais ainz qu'il fussent remonté,
I ot maint chief de bu sevré.
Li Troïen bien s’i aidierent
E des Grezeis mout damagierent :
Ocis en ont tens trente sis,
Qui mout esteient de grant pris.
Castor a bien Cedar veü,
Qui Nestor aveit abatu ;
Mout le vit bien aidier e poindre
E mout sovent o les suens joindre.
Devers le roi n'a en la place
PageV01P129
Un sol des suens qui mieuz la face.
Sor un cheval d'Espaigne sor
Sist bien armez li reis Castor :
Par mi les rens vint eslaissiez
Vers Troïens fel e iriez,
Prez del damagier senz demore.
Uns Troïens li corut sore :
Seguradon aveit cil non;
Bel cors, bel vis, bele façon
Aveit sor tote creature ;
Riches hom ert a desmesure.
Il e Cedar erent cosin,
Mout i aveit noble meschin.
Cil e Castor s'entrecontrerent ;
Enz el mi lieu des rens josterent
De tel aïr com li cheval
Porent moveir de lor estal :
Bien i parut a lor escuz,
Qu'estroëz orent e fenduz.
Seguradon sa lance brise,
PageV01P130
Onques n’i ot autre devise :
Bien cuit, s’ele ne peceiast,
Que del cheval jus le portast.
Castor le navra al joster ;
Onc li haubers nel pot sauver :
Son confanon el cors li baigne,
Li dueus des suens creist e engraigne.
Cedar vit son cosin navrer,
Sempres cuida del sens desver ;
Ja morra, s’il nel puet vengier.
Isnelement point le destrier,
Castor a pris bien en travers.
De la lance trencha li fers :
L’escu li perce e la ventaille,
Iluec li fist sis haubers faille ;
Par mi la chiere l’a navré
E del cheval jus enversé.
Par la regne prent le destrier,
Si l’a baillié un escuier :
Par grant proëce l’a conquis.
Castor dut bien estre entrepris :
A terre fu entre tel gent,
PageV01P131
Qui ne l'amoënt de neient.
Cedar li dist : « Sire vassal,
« N'en menreiz mie del cheval.
« Auques ai mon cosin vengié,
« Dont mout m’aviëz fait irié.
« Ja del guaaing d'este contree
« N'avreiz la perte restoree :
« Guage nos i avez laissié
« E plus perdu que guaaignié ;
« Mil en gisent sor la marine,
« Dont ja mais jor n'avrons haïne :
« En cest païs nos remandront,
« Ja mais Grece ne reverront. »
Castor ert pris e retenuz,
Qui mout s'ert a pié combatuz,
Quant reis Pollus l'a socoru.
Cele part as le vos venu :
Son frere ne lor laira mie,
PageV01P132
Tant come il ait el cors la vie.
D'ire desvez, en es le pas,
Les est alez ferir el tas ;
Set cent Grezeis de grant valor
Le sivent après en l'estor.
Ja i avra fiere meslee :
Trop iert la joste comparee
Que Castor fist. Jo n'en sai al :
La s'entrevienent li vassal,
La s'entredonent, la s'empeignent ;
D'eus entrocire ne se feignent.
La terre est cbverte des morz.
Jo qu'en direie ? Par esforz
Fu Castor rescos e montez,
Qui bien fu en set lieus navrez :
Par vive force lor tolirent,
As branz la presse departirent.
Pollus lor i fist grant damage,
Quar le fil al rei de Cartage
Lor i ocist : ço fu dolor.
PageV01P133
Nies ert le rei, fiz sa soror ;
Jovnes esteit, de poi d’aage,
Mais bel vaslet i ot e sage.
Assez fu plainz e regretez :
Eliachim ert apelez.
Quant li Troïen mort le virent,
Poëz saveir grant duel en firent :
Criënt, plorent e font granz dueus,
Por lui derompent lor cheveus.
Li reis trova mort son nevo :
Plora des ieuz e fist un vo
Que ja mais Troie ne verreit
Desci que il vengié l’avreit.
Ses homes a trestoz somons :
« Poignons, » fait il, « fil a barons;
PageV01P134
« Quar destruions noz enemis,
« Sin delivrons nostre païs,
« Que cist coilvert vuelent destruire
« E metre a duel et a martire.
« Veez voz freres, voz amis,
« Vez mon nevo, qu'il m’ont ocis.
« Or i parra qui me sivra
« E qui mon enui vengera. »
A tant a fait li reis soner
Un cor d'olifant haut et cler.
Li renc fremissent environ,
N’i set coarz sa guarison :
Jas troveront feus e engrès,
Hui mais les requerront de près.
Li reis chevauche o les premiers :
Bien ot set mile chevaliers.
Les escuz pris, lances baissiees
PageV01P135
S'entrassemblerent les maisniees :
La veïsseiz estor mortel,
Ja mais nus hom ne verra tel.
Nel porent li Grezeis sofrir,
Le champ lor covint a guerpir :
Jusqu’a la mer ne tindrent place,
Assez perdirent en la chace.
Ja ne tenissent mais conrei,
Quant uns messages vint al rei :
Dircès ot non de Salemine,
Parenz prochains ert la reïne.
Par mi le cors ot une plaie
Que de la mort fortment l’esmaie :
« Laomedon, » fait il, « que fais?
« Sire, por quei ne t’en revais ?
« Hui cest jor ies morz e traïz,
« Tu seras sempres desconfiz.
« Vez lor gent venir après mei :
« Set mile sont e plus, ço crei.
PageV01P136
« Troie ont prise par traïson,
« Ja mais nul jor n'i rentreron :
« Es tors, es murs e es portaus
« A plus de mil de lor vassaus ;
« La vile ont prise e si guarnie
« Que perdue l'as a ta vie.
« Part tei de ci delivrement,
« Si chevauche contre lor gent :
« Mieuz est qu'encontre lor ailleiz
« Que vos ici les atendeiz. »
Mout fu espoëntez li reis,
Quant il oï que li Grezeis
Aveient sa cité saisie :
S’il s'esmaia, n'en merveil mie.
Si grant duel a e si grant ire,
Ne set que faire ne que dire ;
Bien veit n'en puet senz perte aler.
Un graile a fait a tant soner.
Sa gent restreint environ sei,
Mais onc n'en puet sevrer conrei,
Quar li Grezeis ne li laissoënt,
PageV01P137
Qui de neient nes espargnoënt :
De près lor esteient veisin,
Sis font morir de male fin.
Li reis, dolenz e entrepris,
Vait encontre ses enemis :
D'ire et d’angoisse, vueille o non,
Li chiet l'eve a val le menton ;
Sa perte veit e son damage,
Por poi que toz vis n'en enrage.
Teus mil en veit vers sei venir,
Qui maintenant l'iront ferir :
Ne puet mais estre en autre sen,
Dès or i perdront Troïen.
Nestor e Castor e Pollus
Les asaillent, ne pueent plus.
Danz Herculès e sa maisniee,
Que mout fu gent apareilliee,
Les ont devant si aprochiez,
PageV01P138
Mil confanons i a baissiez.
De plain eslais lor corent sore,
Mout en ociënt en poi d’ore.
Cil furent las, cist furent freis ;
Enclos les orent li Grezeis :
Derier les fierent e devant,
Mout en ociënt maintenant.
Mout i oïsseiz granz criëes
E granz retenteïz d'espees.
Sor un cheval sist Herculès,
E si n’orra parler jamais
Nus hom de tel ne de son per :
Pro vos en porreit om conter,
Mais a peines creü sereit
Come il fu nez ne qu'il valeit.
Iriez, le brant d’acier nu trait,
S'embat es presses, si lor vait :
Fiert e chaple, bote e empeint,
Tot detrenche quant qu'il ateint ;
Dous meitiez fait d'un chevalier.
PageV01P139
Si granz cous fiert del brant d'acier,
Entor lui muerent e fenissent,
Tote la place li guerpissent.
Tant a venu, tant a alé,
Laomedon a encontré.
Il ne l’ala plus loing querant :
Si grant li a doné del brant
Que la teste li a tranchiee,
Veiant le mieuz de sa maisniee.
Quant il virent mort lor seignor,
Onc puis ne pristrent d'eus retor :
Chascuns de sei guarir se peine,
Dès qu'il furent senz chevetaine;
Le champ guerpissent maintenant,
Vers la vile s'en vont fuiant.
Mais devant lor sont li Grezeis,
Qui les abatent treis e treis,
Jo qu’en direie? A grant dolor
Furent mort e destruit le jor ;
Laomedon i fu ocis,
Poi eschapa des autres vis.
Quant partie fu la meslee
PageV01P140
E la bataille fu finee,
En la cité trestuit entrerent :
Onques contredit n'i troverent.
De femmes e d'enfanz petiz
I ert trop granz li ploreïz;
Es temples as deus s'en fuieient,
Quar aillors guarir ne saveient.
Mainte dame, mainte pucele,
Mainte borgeise riche e bele
Veïst om foïr par les rues,
Paoroses e esperdues :
En lor braz portent lor enfanz.
Tant par i esteit li dueus granz,
Onques ne fu en nul lieu maire,
Ne nus nel vos savreit retraire.
Totes ont les maisons guerpies
Pleines de riches mananties :
Mout en troverent li Grezeis.
Bien i esturent plus d'un meis :
Maint riche aveir, maint bon tresor
De pailes e d'argent e d'or,
PageV01P141
E mainte pierre e maint anel,
E d’or et d'argent maint vaissel,
Et maint cheval e maint ostor,
E maint riche drap de color
En porterent en lor contree.
Trestote ont la vile guastee,
Les fortereces ont fondues
E les riches tors abatues :
Onc n’i remest meison entiere
Ne mur ne temple ne maisiere,
Ne bon palais ne bei maneir.
Des femmes firent lor voleir :
Assez i ot des vergondees,
Sin ont des plus beles menees.
La fille al rei, Esiona, —
Ja mais plus bele ne naistra,
Ne plus franche ne plus corteise,
Grant ire en ai e mout m'en peise, —
Cele en a Telamon menee :
Danz Herculès li a donee,
PageV01P142
Por ço qu’en Troie entra premier.
N’en ot mie mauvais loier,
E s'il a femme l’esposast,
Ja guaires donc ne m’en pesast;
Mais puis la tint en soignantage,
Ço fu grant duel e grant damage.
Quant lor buens orent acompliz
E li navies fu guarniz,
Es nes entrerent a grant joie,
Puis partirent des porz de Troie ;
Par mer siglerent e nagierent
Tant que en Grece repairierent.
Grant joie en firent lor ami
E trestuit li autre autresi.
Granz graces ont as deus rendues
De ço qu'ont victoires eües :
Mout lor ont faiz granz sacrefises
PageV01P143
E voz renduz e granz servises.
Mout ont granz aveirs departiz
A lor peres e a lor fiz;
Tant en donent a lor maisniees
E as prochains de lor ligniees,
Onc puis povreté ne conurent :
Riche, asazé e manant furent;
De Troie e de sa manantie
Fu tote Grece replenie.
Or vient uevre, s'est qui la die,
Ja mais teus ne sera oïe.
L’uevre e la chanson vos ai dite,
Si com jo l’ai trovee escrite,
Saveir par com faite acheison
Avint ceste destrucion.
Par assez petit d'uevre mut,
Mais mout par monta puis e crut:
PageV01P144
Onques chose, si com jo truis,
A tant n'ala ne ainz ne puis,
Quar d'icel tens tuit li meillor
En furent mort a grant dolor.
Por assez petit comença
La guerre, que tant puis dura ;
Mout par en fu l’uevre dotose,
E la fin en fu dolorose.
Or est la chose comenciee,
Que mout sera griefment vengiee ;
Mais li respiz al vilain dit,
Qui onques de rien n’i faillit:
Teus cuide sa honte vengier,
Cui en avient grant encombrier.
Mais ço puet or bien remaneir.
Qui la chose voudra saveir,
Si atende : nos li dirons,
Solonc ço qu’el Livre trovons,
Com faitement iço ala,
PageV01P145
Qui perdi e qui guaaigna,
Qui fu ocis e qui ocist,
E saveir qui venjance prist :
Qui fu riches e qui fu proz,
E qui fu plus loëz de toz,
E qui fu tenuz al plus sage,
E qui de plus hardi corage,
E qui i reçut greignor pris.
Iço que j’en l'Estoire en truis
Me porra oïr reconter
Qui bien me voudra escouter.
# | RECONSTRUCTION DE TROIE ; AMBASSADE D'ANTÉNOR EN GRÈCE POUR RÉCLAMER HÉSIONE
Laomedon un fil aveit,
Qui riche e sage e pro esteit :
PageV01P146
Icil ert apelez Prianz,
De sa femme aveit uit enfanz.
En ost esteit loing del païs,
Ou sis pere l’aveit tramis :
Un chastel aveit asegié.
Quant il li fu dit e noncié
Que Troie esteit e la contree
Tote arse e destruite e robee,
E sis pere ocis e sa mere
E ses sorors e tuit si frere,
Fors une, dont ert grant domage,
Qu'en esteit menee en servage ;
Quant la novele fu seüe
E Priamus l'ot entendue,
S’il ot dolor, nus nel demant :
Rien que vesquist n'en ot si grant.
Assez plora e fist grant duel :
Iluec vousist morir, son vuel.
Mout a son pere regreté
E sa valor e sa bonté :
« Laomedon, chier pere, sire,
PageV01P147
« Tant a mon cuer mis en grant ire
« Qui vos a mort, ja mais nul jor
« Ne porrai vivre senz dolor.
« Onc mais ne fu faiz teus outrages :
« Meie est la honte e li damages;
« Poi pris e aim tote ma vie.
« Haï! bone chevalerie,
« Come estes morte en poi de tens !
« Bien devreie perdre le sens :
« Tenir se deit por confondu,
« Qui tel damage a receü.
« Haï! la noble gent de Troie,
« De vos parti a si grant joie !
« Come estes a honte eissilliee,
« Morte e ocise e detrenchiee !
« Franches dames, franches puceles,
« Tant par a ci freides noveles !
« Tant sont malement departi
« De vos vostre riche mari!
« Voz fiz, voz freres, voz nevoz
« E voz amis les beaus, les proz,
« Toz les ont li Grezeis ocis
PageV01P148
« E eissillié le bel païs.
« Tote ont destruite la contree
« E ma soror en ont menee :
« Bien sai vilment la tendra cil
« Qui l'en a menee en eissil.
« Ha ! las, com puis de duel morir!
« E coment puis jo ço sofrir ?
« Com porrai jo mais joie aveir ?
« S'eüsse force ne poëir
« Coment j'en preïsse venjance,
« Ço me donast grant alejance ;
« E se Deu plaist, ainz que jo muire,
« Lor cuit jo tant forfaire e nuire
« Dont il avront assez que plaindre :
« Ne puet la chose anceis remaindre. »
Ses genz mande, ne tarja plus,
Tant come il en puet aveir plus,
E ses veisins e ses amis,
Si chevauche vers son païs.
PageV01P149
Sa femme ovuec sei en mena,
Que aveit a non Ecuba.
Bele dame ert, proz e vaillanz,
Si aveit del rei uit enfanz,
Les cinc vaslez, lez treis meschines :
Dignes fussent d'estre reïnes.
Hector ot non li ainz nez fiz :
Onques plus proz ne fu norriz;
Tant fist de sei, tant ot bonté,
Toz jorz en sera mais parlé.
Li autre après ot non Paris :
Cil fu mout beaus e de grant pris.
Li tierz ot non Deïphebus,
E li quarz après Helenus :
Cil fu devins, deviner tot ;
Mout par fu sages, grant sen ot.
Li quinz Troïlus aveit non :
Gent ot le cors e la façon,
Trop fu de grant chevalerie;
Assez sera avant oïe
PageV01P150
La merveille qu'il fist de sei ;
Cil ot le pris de maint tornei.
Des treis filles ot non l'ainz nee
Andromacha : mout fu senee,
Mout fu bele, mout fu corteise,
Mout ama honor e proëise.
Cassandra ot non cele après :
De deviner sot cele adès.
Polixena fu la puis nee :
Mais a Troie n’en la contree,
Ço vos di bien de verité,
N'ot onc femme de sa beauté.
Ço dit l'Escriz, que trente enfanz
Aveit ancor li reis Prianz,
Qui esteient bon chevalier,
Mais n'erent mie de moillier.
O tant de gent com li reis ot,
Vint a Troie come il ainz pot.
La cité trova eissilliee
E la gent morte e detrenchiee;
Tot trova ars, guast e fondu,
Robé, maumis e abatu ;
PageV01P151
Onc n'i trova meison entiere,
Ne tor ne temple ne maisiere.
Les premerains treis jorz plorerent,
Que de viande ne gosterent.
Por les ames de lor amis,
Qui aveient esté ocis,
Firent as deus granz sacrefises,
Si com dreiz ert, e granz servises.
Après, ne tarja pas grantment,
Prist conseil Prianz o sa gent
Que la cité restorereit,
Meillor e plus grant la fereient,
E plus defensable e plus fort,
Qu'il ne criengent orgueil ne tort
Ne mauvoillance de veisin,
Ne vers rien ne seient aclin,
Ne de Grezeis n'aient dotance :
Après porront prendre venjance
Del damage qu'il lor ont fait.
Ne firent mie trop lonc plait :
Ovriers quistrent, assez en orent
E, a l’anceis qu'il onques porent,
Comencierent le marbre a traire
PageV01P152
E la cité tost a refaire.
Ço truevent bien li cler lisant,
E ancore est aparissant,
C’onques en terre n’ot cité
Que la resemblast de beauté
Ne de grandor ne de largece
Ne de plenté ne de richece.
Riche i sont fait li fondement
E l’uevre que desus s’estent :
Mout la troverent deguastee,
Mais cent tanz mieuz l’ont restoree ;
Mout la refirent bele et gente.
Mout i mist Prianz grant entente :
Mout la fist clore de bons murs
De marbre hauz, espès e durs ;
Mout en erent haut li terrier.
Al meins le trait a un archier,
Aveit granz tors tot environ,
Faites de chauz e de sablon.
De marbre fin e de liois
Jaunes e verz, indes e blois,
PageV01P153
En esteient tuit li quarrel,
Mout bien entaillié a cisel.
En plusors lieus ot fortereces,
O chaafauz e o bretesches,
Sor granz motes en haut levees,
De granz fossez avironees.
Teus mil maisons i ot e plus
A reis, a contes e a dus,
La meins fort n’eüst pas dotance
De tot l’empire al rei de France.
La gent des terres environ
E de tote la region
I ert tote atraite e venue :
Poplee l'ont e si vestue
Que treis jornees senz devise
Durot e mout plus la porprise.
Mout en erent beles les rues
E de riches meisons vestues ;
Mout i aveit de beaus palais :
Si riches ne verreiz ja mais.
En tote Troie n’ot bordel
PageV01P154
Ou eüst pierre ne quarrel
Se de marbre non entaillié.
Ja nus hom n'i moillast son pié,
Quar les rues erent voutices,
Les unes as autres jointices :
Desoz erent pavementees,
Desus a or musique ovrees,
De l’une part sist Ylion,
De Troie le maistre donjon.
Cel fist Prianz a son ues faire,
E si vos puet om bien retraire,
Onques ne fu faiz autreteus
Par nul home qui fust charneus.
El plus haut lieu de Troie sist :
Trop fu maistre cil qui le fist.
Sor une roche tote entiere,
Que fu tailliee en tel maniere
Que a compas tot a roont
PageV01P155
S’estreigneit auques jusqu'a mont, —
N'esteit si estreiz de desus,
Cinc cenz teises n’eüst e plus, —
Iluec fu Ylion asis,
Dont om sorvit tot le païs.
Si esteit hauz, qui l'esguardot,
Ço li ert vis e ço cuidot
Que jusqu'as nues ateinsist:
Onques Deus cel engin ne fist
Qui i poüst estre menez
Par nul home qui onc fust nez.
De marbre blanc, inde, safrin,
Jaune, vermeil, pers e porprin
Erent asis en tel maniere
Tuit li quarrel de la maisiere.
Ensi come il divers esteient,
Por les colors ques departeient,
Si erent les uevres diverses
A flors a oiseaus e a bestes.
PageV01P156
Azur ne teint ne vermeillon
N'i aveit se de marbre non.
D'or esmeré e de cristal
Erent ovré li fenestral.
N’i ot chapitel ne piler
Que l’om ne feïst tresgeter
Tot d'uevre estrange e deboissiee
E a cisel bien entailliee.
Riche furent li pavement:
Assez i ot or e argent.
Dis estages larges e lez,
Beaus e bien faiz e bien ovrez,
I trovot l'om dès le premier,
Ainz que l'om fut sus al derier.
Les batailles e li crenel
Furent tuit ovré a cisel.
Images de fin or entieres
Ot mout asis par les maisieres.
Quant achevez fu Ylion,
PageV01P157
Mout par fu de riche façon ;
Mout sist en orgoillose place,
Tote rien par semblant manace :
Manacier puet, que rien ne crient,
Se devers le ciei ne li vient.
Toz l'empires, tote lo gent,
Qui sont desci qu'en Oriënt,
N’i forfereient une pome :
Trop par fu forz, ço est la some.
Une sale fist Priamus
De marbre fin e de benus :
Riche fu mout l’entableüre
E plus riche la coverture ;
Mout ot asis de riches pierres
En plusors lieus par les maisieres ;
Mout par fu grant, mout par fu lee
E mout fu richement ovree.
Onc ne fu veüz pavemenz
Teus come cil fu ne si genz :
Tant i ot des uevres levees,
PageV01P158
Ne sai com furent porpensees,
A l’un des chiés fu faiz li deis.
Ou mangera Prians li reis :
Les tables i sont arengiees,
Ou mangeront ses granz maisniees.
En l'autre chief, de l’autre part,
Par grant conseil e par grant art,
Fist faire li reis un autel,
Onques nus hom ne vit itel:
Ensi com Daires le retrait,
D’estrange richece l'ot fait;
Onques ne pot estre seü
Demi l’aveir qui mis i fu.
L'image al deu qu'il plus creeient,
Ou il greignor fiance aveient, —
C’ert Jupiter li deus poissanz, —
Cel fist faire li reis Prianz
Del meillor or qu'il onques ot
Ne que il onques trover pot.
Grant seürté e grant fiance
I aveient e atendance,
Que par ço fussent defendu,
PageV01P159
Ne ja ne fussent mais vencu,
Ne mais destruite lor contree:
Mais n'ert pas tel la destinee.
Chambres voutices o forneaus,
Verrieres, clostres e praeaus,
Fontaines, puiz i ot adès :
Eve preneient assez près.
Quant li mur furent achevé,
Qui clostrent tote la cité,
Onc si riche, si com jo truis,
Ne furent fait ne ainz ne puis.
Sis portes i ot solement,
Se li autors ne nos en ment.
Ço dit Daires, qui n'i faut pas,
L'une ot non Antenoridas;
La seconde, que ert après,
Apelot om Dardanidès;
La tierce apelent Ylia;
PageV01P160
La quarte raveit non Ceca ;
La quinte resteit apelee
Par non, ço sai de veir, Tymbree,
E cil qui a dreit l'apelerent
La siste Trojana nomerent.
Richent furent mout li portal ;
Sor chascune ot tor principal
Haute e espesse e defensable.
N'i ot si povre conestable,
Cuin fust balliee la menor :
Mil chevaliers n'ait de s'onor,
Et de rentes al plus eschars
Plus de vaillant set mile mars.
Que serait ço que jo direie ?
De folie me penereie :
Ne sereit pas sempres oïe
Solement la disme partie
Des merveilles e des façons
Des murs, des tors e des donjons;
Enuiz sereit de l'escouter,
PageV01P161
E mei graindre del reconter.
Ço est la fin : nus hom vivanz
Ne vit si riches ne si granz.
Quant Ylion fu achevez
E Troie la riche citez,
Grant joie orent, mout furent lié ;
Mout ont as deus sacrefiié.
Gieus establirent e troverent,
Ou mainte feiz se deporterent ;
Onques ne fu riche maistrie
N’afaitemenz ne corteisie,
Dont l’om eüst delit ne joie,
Que ne trovassent cil de Troie :
Eschec e tables, gieu de dez
I furent, ço sacheiz, trovez,
E mainte autre uevre deportable,
PageV01P162
Riche e vaillant e delitable.
Quant li reis Prianz ot ço fait
E de ses uevres a chief trait,
Sa cité vit fort e entiere
E sa terre riche e pleniere,
Tens fu e lieus, ço li fu vis,
De requerre ses enemis :
Ne pot obliër por nul plait
Le damage qu'il li ont fait
De son pere e de sa ligniee,
Qu’il orent morte e eissilliee.
Jor a asis de parlement :
Le mieuz i manda de sa gent.
Si fil i furent tuit fors un :
Bon chevalier ot en chascun.
Hector ot tramis senz essoine
Es granz parties de Pannoine
Lor grant afaire porchacier
E a eus le regne aleier.
O les autres qu’ot assemblé,
Qui sage furent e sené,
PageV01P113
Se conseilla, come il dut faire.
Oëz qu’il lor prist a retraire :
« Seignor », fait il, « entendez mei,
« Vos qui m'amez par dreite fei.
« Bien savez la mesaventure
« E la laide desconfiture
« Que li Grezeis, par lor outrage,
« Firent de nostre bon lignage.
« Mon pere ocistrent : par nul fuer
« Ne m'en istreit l'ire del cuer,
« Ne ne fera ja mais nul jor,
« Se jo n’en puis prendre retor.
« Ma soror ai en lor contree,
« Qu’uns vassaus a asoignantee,
« Ne la deigne prendre a moillier :
« Peser m’en deit e enuier.
« Trop est grant honte e lait damage
« Que fille a rei est en servage :
« Jo i ai honte grant e lait.
« Qu'en direie? Tant nos ont fait,
PageV01P164
« Ja ne devons grant joie aveir,
« Desci que Deus nos laist veeir
« Le jor que lor poissiens merir
« Ço dont tant les devons haïr.
« Fort vile avons e bien guarnie
« E de plusors parz bone aïe.
« Mout fust bien tens de guerreier :
« Ja nel loasse a porloignier,
« Ne fust por ma soror raveir.
« Mais primes nos covient saveir
« Se por nul plait la nos rendront,
« Car mout me peise que il l’ont.
« Manderai lor qu'il la me rendent,
« E puis après, s'il la contendent,
« A vos trestoz e a mes fiz,
« Que ne seie del tot honiz,
« Prendrai conseil del guerreier,
« O del haster, o del targier. »
Li fil le rei e si feeil
Tindrent a mout buen cest conseil :
PageV01P165
Nus ne porreit meillor doner.
Li reis en a fait apeler
Un suen conte, riche baron,
Mout de grant sen e de grant non.
Cointes ert, riches e senez,
Antenor esteit apelez;
Mout sot de plait, mout sot de leis.
Mout bonement li dist li reis
Que la l’en estoveit aler
Sa soror querre e demander.
« Ne sai », fait il, « cui enveiasse,
« Sire Antenor, se vos laissasse :
« N’i puis nul meillor enveier.
« Ore pensez de l’espleitier.
« A ceus dites qui furent ça,
« S'il me rendent Esiona,
« Ja ne m'orront puis tenir conte
« Del lait, del tort ne de la honte
« Qu’il firent d’ocire mon pere,
« De mes sorors ne de ma mere.
« Li sole quier jo e demant :
PageV01P166
« Honte ai qu'on la tient a soignant.
« Metez i or norme e poëir
« Coment nos la poissiens aveir :
« Mout en serai liez e joios,
« S'amener l’en poëz o vos. »
Fait Antenor : « Co sacheiz bien,
« Por message n’i perdreiz rien :
« Dès que jo la en dei aler,
« Ne quier targier ne demorer. »
La parole est remese a tant.
Le soir, quant vint a l'anuitant,
Fu la nef bien apareilliee,
Que tost fu del port essaiviee.
A espleit sigla a la lune :
Bon vent li a doné Fortune.
Siglé ont ensi la semaine :
Onc n'i sofrirent mal ne peine.
A Manese pristrent port dreit,
Ou Peleüs li reis esteit :
PageV01P167
La cité fu soë demeine.
Danz Antenor o ceus qu'il meine
Vindrent a lui, quis herberja
E treis jorz bien les sojorna,
Tant qu'il se prist a merveillier
Saveir que veneit espiier
Antenor, qui mot ne li sone
Ne de neient ne l'areisone.
Mout se merveille qu'il a quis
En la terre ne el païs.
Vers Troïens n'ot nule pais,
Ne ne cuidot aveir ja mais :
Demanda li qu'il veneit querre
En la contree n’en la terre.
Fait Antenor : « Co est bien dreiz
« Que jol vos die e quel sacheiz.
« Ço vos mande Prianz li reis,
PageV01P168
« A tei e as autres Grezeis,
« Que mout li estes tuit mesfait :
« Grant tort e grant honte e grant lait
« Feïstes de son pere ocire ;
« A duel, a mal e a martire
« Livrastes tote la contree.
« Quant l'eüstes arse e robee,
« Sin amenastes sa soror,
« Qu’i est a trop grant deshonor.
« En soignantage la tient cil
« Qui l’en amena en eissil :
« Grant honte en fait Priant le rei.
« Or si te mande e dit par mei
« Que sa soror aveir li faces :
« II ne te fait autres manaces,
« Mais qui en pais la li rendra,
« En bone pais la recevra.
« Il n'a talent d'el demander :
« Ja ne l'orreiz de plus parler.
« Vers vos eüst mout a requerre,
PageV01P169
« Mais ja par lui n’en sordra guerre,
« Noise ne tençon ne meslee,
« Se sa suer li est aquitee. »
La parole entent Peleüs :
Si fu iriez qu’il ne pot plus.
Por ço qu’auques vers lui pendeit
La requeste que cil faiseit,
Dist li que ço seüst il bien,
Par lui n’espleitereit il rien :
« Jo n’ai », fait il, « de ço que faire :
« Por poi que ne vos faz desfaire.
« Se danz Prianz, cui tiens a rei,
« En enveiot ja mais vers mei,
« Estrangement le comparreit
« Toz li premiers qui i vendreit.
« Or vos metez tost a la veie,
« Si guardez ja mais ne vos veie,
« N’en ma terre plus n’arestez :
« Guardez mais n’i seiez trovez.
PageV01P170
« Si me doint Deus honor e joie,
« Ja mais ne reverriëz Troie. »
Antenor n'i fist plus demore,
A sa nef vint en mout poi d’ore ;
N’i a un sol qui ne se hast.
La veile traient sor le mast :
Mout s’esjoïrent cil dedenz,
Quant enz se fu feruz li venz ;
Onc ne furent seür de mort
Tant qu’esloignié furent del port,
Lez le rivage de Boëce,
Qui siet es parties de Grece,
S'en passerent un bien matin ;
Onc ne pristrent cesse ne fin
Desci qu’as porz de Salemine.
Sor le rivage, en la marine
S'en eissirent defors al plain :
La nuit suefrent jusqu'al demain.
Demandé orent e enquis
PageV01P171
Se Telamon ert el païs;
E om lor dist qu'en la cité
Aveit grant piece demoré :
« Qui besoing a d'o lui parler
En la vile le puet trover. »
Antenor gent s'apareilla,
A merveilles bel s'atorna ;
Mout richement son cors vesti,
E si compaignon autresi.
Puis sont es palefreiz monté.
Ne furent pas trop esfreé :
Ja a cel tens reguart n'eüst
Nus messages, qui que il fust.
Par mi la vile chevauchierent
L’ambleüre : tant espleitierent
E tant quistrent e demanderent
Rei Telamon qu’il le troverent.
Delez la sale en un herbier,
Desoz l’ombre d’un olivier,
Descendirent cil que vos di.
PageV01P172
Ja esteit bien près de midi :
Delez la tor, en uns vergiez,
Lor fu Telamon enseigniez ;
Par un guichet les i menerent
Trei chevalier que il troverent.
Sor un feutre d’un paille bis
Jut en l’ombre d'un ciparis.
Nen ert pas sous cele feiee :
Cent chevaliers de sa maisniee
Aveit o lui riches e beaus ;
De lui teneient lor chasteaus.
Antenor fu sages parliers :
« Sire, nos somes messagiers.
« Par mer nos a a tei tramis
« Prianz li reis en cest païs.
« Nel laisserai que nel te die :
« Par mei te mande mout e prie
PageV01P173
« Que tu li rendes sa soror,
« Que as ja tenue maint jor.
« Fille a rei est, de grant parage :
« Ne la deis plus en soignantage
« Tenir n’aveir, quar trop est lait.
« Rent li, si avras mout bien fait :
« Ancor sereit bien mariee,
« S’il la raveit en sa contree. »
Telamon art e esprent d’ire,
De mautalent prist a sozrire :
« Vassaus », fait il, « o vostre rei
« N'ai rien a faire, n’il o mei ;
« Ne sai qu'il est, onc nel conui,
« Ne rien ne fereie por lui.
« Ço sai jo bien qu'a Troie alames
« Por un tortfait, que nos venjames :
« Por ço que j’i entrai premier,
« Me rendirent itel loier,
« Une pucele fille al rei :
« Icele en amenai o mei.
« Tenue l’ai, tenir la vueil,
PageV01P174
« Quar mout est franche senz orgueil.
« Amer la dei e tenir chiere :
« Bele est e sage a grant maniere.
« De ma victoire est guerredon,
« Qu’ensi le voustrent li baron :
« Par grant proëce la conquis.
« De ço ai bien mon conseil pris,
« Que ja nul jor ne la rendrai,
« Tant com jo sains e vis serai.
« De ma victoire fu loiers :
« Ja ne serai puis chevaliers,
« Que vos ne autre l’en meneiz.
« N’i enveit il pas autre feiz,
« Quar assez tost le comparreit
« Toz li premiers qui i vendreit.
« A vos meïsme di jo bien
« Que vos guardeiz sor tote rien
« Que en cest païs n’aresteiz,
« Isnelement vos en railleiz :
PageV01P175
« Pesera mei d’ore en avant,
« Se jo vos i truis sojornant. »
Antenor e si compaignon
Ne firent mie lonc sermon :
Dreit a lor nef s'en repairierent,
En mer parfonde s’esloignierent.
Dreit vent orent e bon oré :
Del lonc de la mer ont siglé,
Dreit en Achaie sont venu;
Iluec pristrent port e salu.
Conreerent sei gentement,
E senz autre porloignement
Ont Castor e Pollus tant quis
Qu’il les troverent el païs.
Antenor lor a dit tres bien
Son message, n'i laissa rien :
« Seignor », fait il, « Prianz vos mande
« E par mei vos dit e comande
« Que sa soror li faceiz rendre;
« E se mis sire vueut dreit prendre
PageV01P176
« De vos, si en seit uns jorz pris :
« Trop avez esté enemis.
« Buene en sereit la benestanee :
« Trop a duré la mauvoillance. »
Castor e Pollus respondirent
Qu'onques a Priant tort ne firent :
« Mais co set om certainement
« Que sis pere premierement
« Forfist vers nos e vers les noz,
« Dont damages vint puis as voz.
« Laomedon le comença,
« Qui laidement le compara;
« E qui de rien nos en apele
« Ne nos puet aporter novele
« Dont meins nos seit. Nos ne preison
« Ceus de Troie se petit non :
« Mieuz amons nos lor mauvoillance
« Que estre o eus en benestanee ;
« E qui ça vos en enveia
« De petite amor vos ama.
PageV01P177
« Voz genz ne les noz ne sont une
« N'ensemble n'ont nule comune.
« Ne volons que ça nus en vienge :
« Iço que chascuns a, ço tienge.
« Metez vos or tost el repaire,
« Quar tote honte e tot contraire
« Vos fereit l'om, ço sacheiz vos :
« Ja n’en sereit parlé o nos.
« E quant vos ça preïstes port,
« Mout dotastes petit la mort. »
Antenor entent le respons,
Qui ne li fu ne beaus ne bons :
Mout li est tart qu’il seit ariere,
Quar mout li font cil laide chiere.
Senz congié prendre s'en retorne,
Iriee chiere fait e morne.
En lor nef entrent, si s'en vont :
O dreite bise cui il ont
PageV01P178
Ont tant nagié e tant siglé
Que a Pile sont arivé.
Li dus Nestor en esteit sire,
Qui mout ert fel e de grant ire :
De ses armes esteit mout proz
E uns des plus vaillanz de toz.
Mout ert bien de sa terre sire,
Poi li esteit d'un home ocire :
Maint en aveit o ses mains mort,
Qui ne li faiseient nul tort.
Mout ert engrès e de put aire,
E mout li ert poi de mal faire.
Antenor a tant dit e fait,
Son message li a retrait
Tot mot a mot : rien n'i oblie,
Que bien ne li recont e die
Ço que Prianz li encharja ;
Onques por paor nel laissa.
Nestor le reguarde en travers,
D'ire devint pales e pers :
PageV01P179
« Fiz a putain, » fait il, « bastarz,
« Por poi des ieuz ne vos desfaz.
« Par cui congié, par cui otrei
« Vos osastes metre sor mei?
« Por poi jo ne vos faz desfaire
« O vilment a chevaus detraire.
« Vers vostre rei hontos, mauvais,
« Ne querrai ja jor aveir pais.
« Sis pere, li chaitis dolenz,
« A mout grant tort laidi noz genz,
« Qui rien mesfait ne li aveient
« N’en sa terre ne forfaiseient :
« E cuidereit or vostre sire
« Vengier la mort e le martire
« Que nos feïmes des chaitis,
« Quant destruisimes le païs !
« Cuidereit nos il faire acreire
« Qu'amor ne pais nos tenist veire ?
« Dahé ait hui la soë amor
PageV01P180
« Ne qui s'i fiera nul jor!
« De grant folie se porpense :
« N’a pas l'aveir ne la despense
« Dont vers nos puisse forceier
« Ne dous meis de l’an guerreier.
« Tot quant qu'il a ovré e fait,
« S’il ne se guarde de fol plait,
« Li avrons tost ars e guasté.
« Guardez que ne seiez trové
« Demain en la cité de Pile ;
« Eissez vos en tost de la vile,
« Quar il n’est genz cui jo tant hee
« Com ceus de la vostre contree.
« Dahé ait qui les amera
« Ne qui ja o eus pais avra ! »
Antenor n'esteit pas seürs :
Mout vousist estre fors des murs.
Bien veit qu'il vait querant folie :
Por poi sor lui n’est revertie.
A la nef vint plus tost que pot;
PageV01P181
O itel vent come il i ot
S’est tost de la terre esloigniez :
Or voudroit estre repairiez.
Ja ne prendra mais port, son gré,
Desci qu'a cel seit arivé
Dont il mut. Bien treis jorz entiers
Lor a duré uns granz tempiers :
Mout fu la mer neire e hisdose,
Oscure e laide e tenebrose.
Grant paor ot, mout se demente
Antenor por la grant tormente :
Li venz e la mer le desfie,
N’a esperance de sa vie.
Cil de la nef gisent a denz,
Mout se claime chascuns dolenz :
Ja n'en cuida uns eschaper.
PageV01P182
Mout lor fu fort a endurer :
A grant dolor e a grant peine,
Ainz que trespassast la semaine,
Ariverent en lor païs.
Grant joie en fu a lor amis :
Li reis e li baron de Troie
Les reçurent a mout grant joie.
Par les temples Antenor va,
Mout doucement les deus ora;
Un sacrefise lor ofri,
Por ço que de mort l'ont guari.
Après est el palais venuz.
Ne se fist pas taisanz ne muz :
Oiant le rei, oiant ses fiz,
Oiant cent chevaliers esliz,
A tot conté e tot retrait,
Com faitement il aveit fait,
E dist : « Por poi que cist messages
« Ne m’est tornez a granz damages.
« Tant par nos heent cil de la,
« Ja mais n’ameront ceus de ça.
PageV01P183
« A Peleüs alai premier,
« Cui mout trovai enrievre e fier.
« Sacheiz mout en failli petit,
« Quant mon message li oi dit,
« Qu'il ne me fist deshonorer.
« Comença mei a congeër
« Mout laidement de son païs :
« Ja ne sereit, ço dist, amis
« A ceus de Troie nul jor mais,
« N'o eus n’avreit triue ne pais.
« O lui ne poi jo al trover.
« Puis me remis ariere en mer :
« Telamon quis e demandai
« Tant que a peine le trovai.
« De par vos li dis e requis,
« Mout m'en penai e entremis,
« Qu'il vos rendist vostre soror,
« Car tenue l'aveit maint jor.
PageV01P184
« Cui chaut? Assez me foleia
« E vos meïsme laidenja :
« Por vos, ço dist, rien ne fereit,
« Ne bien, ne mal, ne tort, ne dreit.
« Pollus me redist autretel,
« Mout me laidi en son ostel ;
« Mout me fist mauvais acoilleit
« E dist que Troïens haeit :
« Ne fereit por vos nule rien,
« Ço dist, ne que por un vil chien :
« Nos i atendisseiz vos mie.
« Assez me dist honte e folie.
« Jo sofri tot o morne chiere,
« Puis me remis en mer ariere.
« Nestor quis tant qu’a lui parlai,
« Vostre message li contai.
« Cui chaut ? quar il me dist tres bien
PageV01P185
« Sire, que nos amot de rien.
« Des dous ieuz me voleit desfaire,
« O vilment a chevaus detraire ;
« Manaça vos a eissillier
« Et tote Troie a trebuchier.
« Onc, ço sacheiz, jor ne conui
« Nesun plus orgoillos de lui,
« Ne plus pervers, ne plus sorfait.
« Que vos en fereie lonc plait ?
« Ne vos prisent ne ne vos aiment,
« Ne ceus qui de part vos se claiment.
« Nos i poëz de rien fiër,
« Ainz vos estuet d’eus a guarder.
« Il resevent, ço sacheiz bien,
PageV01P186
« Que vos ne les ames de rien.
« Prenez conseil qu’en devez faire
« Tel dont vos poisseiz a chief traire
« Al pro de vos e a l'onor;
« Quar ço nos diënt li autor :
« Qui grant chose vueut envaïr,
« La fin a qu’il en deit venir
« Deit esguarder, se il est sages,
« Que n'en vienge honte e damages, »
# | DÉLIBÉRATION; L'EXPÉDITION DE PARIS
EN GRÈCE EST DÉCIDÉE
Mout fu iriez Prianz li reis,
Quant il oï que Li Grezeis
Aveient despit son message :
Mout l’en pesa en son corage.
Les manaces ot e le lait
Que Antenor dit e retrait,
PageV01P187
E les reproches e les diz,
A ses homes et a ses fiz
Le prist a dire e a mostrer :
« Seignor, en vos me dei fiër.
« Oïr poëz l’adrecement
« E la pais e l'acordement
« Que cil de Grece nos fereient,
« Se lieu e tens e aise aveient.
« De nos n’ont crieme ne dotance,
« Mout prisent poi nostre poissance :
« Ma soror ne me rendront mie.
« Or ne sai jo mais que jo die,
« Mais assez nos vient mieuz morir
« Que ceste honte en pais sofrir.
« Dahé ait qui la soferra
« E qui a tant ne s’en metra
« Que l'om ne nos en blast a tort.
« A morir avons d’une mort :
« Assez sovent a l’om veü
« Que cil qui esteient vencu
« Revenqueient lor enemis,
PageV01P188
« Si qu'a eus erent puis sozmis.
« Fort vile avons : jusqu’al joïse
« Ne sereit el par force prise.
« Chevalerie avons assez
« E de genz a pié granz plentez ;
« De la vitaille avons adès.
« Mout nos devons metre en grant fais
« Que de l’ire dont somes plein
« Querons mecine a estre sain,
« O faire a ceus honte e damage
« Qui le firent nostre lignage :
« Si serons sain, lié e joios.
« Cest afaire met jo sor vos.
« Que qu’om die ne que que non,
« N'en ferai rien se par vos non.
« Non pas por ço ma volenté
« E mon corage e mon pensé
PageV01P189
« Est biens e dreiz que vos en die,
« O seit saveirs, o seit folie.
« Eslisons tant de nostre gent
« Come il vos vendra a talent,
« De chevaliers proz e hardiz,
« De totes armes bien guarniz,
« Sis enveions en lor contree
« Tot belement e a celee :
« Ainz que la chose seit seüe,
« Puet la terre estre confondue,
« Lor home mort, lor preie prise.
« Ne cuident pas en nule guise
« Que l’om osast sor eus aler
« Ne en lor terre a force entrer.
« Haï! haï! franc chevalier,
« Qui lor orgueil porreit baissier,
« Come avreit grant aumosne faite!
« Or me dites que vos en haite.
« Iço vos di jo bien de veir,
« Se vostre aïde en puis aveir,
« Qu'a mei ne la guarront ja mais,
« Ne n’i avront triue ne pais. »
N'i a un sol qui l’en desdie;
Chascuns li pramet e afie
PageV01P190
Qu’il en feront tot son voleir
A lor force e a lor poëir:
« Comant e die son plaisir,
Quar il sont prest de l’obeïr. »
Mout s’en est li reis esjoïz,
Puis a parlé a toz ses fiz ;
Si lor dit qu'al suen esciënt
A fait en eus bon norriment,
Quar beaus les veit, hardiz e proz :
« Maistre sereiz », fait il, « sor toz.
« Chascuns avra sa compaignie
« Bien ordenee e establie.
« Chascuns sera princes des suens,
« E dus e sire e maistre e cuens.
« Or i parra qui plus dorra
« E qui les suens plus amera.
« Or guart chascuns que teus lor seit
« Qu'autre seignor nus ne coveit,
« E que nesuns d'eus ne se plaigne
« Qu'il aient mauvais chevetaigne,
PageV01P191
« Ne qu'il ne perdent lor valor
« Por defaute de lor seignor.
« Or iert veüe l’esperance,
« La norreture e l’atendance
« Que jo ai faite e atendue;
« Dès or sera bien coneüe
« La proëce que g’i espeir.
« Par la fei que dei Deu le veir,
« Por neient s’atendreit a mei
« Cil qui mauvais sereit de sei.
« Mais cil qui porra endurer
« Les granz peines d’armes porter,
« Les sofraites e les haanz,
« Qu'i seit seürs e combatanz,
« Cil iert mis fiz, lui amerai,
« Tot quant que il voudra ferai;
« Tot le mien prenge e doint e ait :
« Ja ne l'en sera dangier fait.
« Hector, beaus fiz, tu ies li maire :
PageV01P192
« Sire seras de cest afaire ;
« Tu en seras li chies de toz,
« Quar mout par ies sages e proz.
« En tei sera lor recovrier,
« A tei se venront conseillier :
« Ne vueil qu’i ait fil de baron
« Qui rien face se par tei non.
« De toz avras la seignorie,
« La poësté e la maistrie.
« E tu, guarde que sauve i seit :
« Por ço avras en m'onor dreit,
« Por ço me seras fil e heir.
« Li deu en facent mon voleir! »
Hector respont come senez :
« Sire », fait il, « voz volentez
« Vueil jo mout faire, quar dreiz est.
« De vostre plaisir vez me prest :
« Volentiers m’en entremetrai
« E tot mon poëir en ferai.
PageV01P193
« A toz les deus pri e requier
« Que mon aiuel puisse vengier :
« Lor voleir seit e lor plaisir
« De nos guarder e maintenir
« Tant qu'eüssons venjance prise
« De cele gent que poi nos prise !
« Trop sera lait, se lor enfant
« Se vont de nos escharnissant,
« Ne s'il remaneient en paiz
« Des laiz, des torz qu'il nos ont faiz.
« Bien nos devons tuit essaier
« De nostre grant honte vengier :
« Mout par m’est tart e mout coveit
« Que de noz genz bataille seit
« Envers la lor : bien la voudreie,
« Volentiers m’i essaiereie.
« Ço peise mei, que ne portons
« Armes vers gent que nos haons :
« Contre eus les vueil jo bien porter,
« Mais mout nos covient a guarder
PageV01P194
« Que en tel sen le començons
« Que traire a bon chief le poissons.
« Mout sont fort gent, mout ont aïe,
« Mout dure loing lor seignorie :
« Grant honte avrons al comencier,
« Se nos nel poons avengier.
« Qui bien comence, que li vaut,
« S’en la fin del tot pert e faut ?
« Comencement deit l'om haïr
« Dont l’om ne puet a chief venir.
« Li vilains dit : « Mieuz vient laissier
« « Que mauvaisement comencier. »
« Bien savons tuit qu’en tot le mont
« N’a si tres fort gent come il sont.
« Vez Eürope, que il ont,
« Que tient la tierce part del mont,
« Ou sont li meillor chevalier
« E li mieuz duit de guerreier :
« Onc al ne firent a nul jor
« Ne ne servent d’autre labor.
PageV01P195
« Ceus pueent bien en ost mener
« O eus e par terre e par mer ;
« Ceus avront toz a lor talent,
« E ceus d’Aise tot ensement.
« Cil d’Aise nen ont cure d’al,
« Mais toz jorz seient a cheval;
« Plus vuelent guerre qu’autre rien.
« Onc n’amerent repos ne bien.
« Iço resavons nos de veir,
« Que cil resont a lor voleir.
« Si guardez bien quos en fereiz :
« Ja mar por mei le laissereiz.
« Jo n’en di rien por coardie ;
« Ensorquetot n’avons navie
« Par que sor eus poissons passer:
PageV01P196
« A ço ne sai conseil doner.
« Senz nes ne sai com faitement
« Lor poissons faire nuisement.
« Mout i avons poi d’apareil,
« Sin fait a prendre tel conseil
« Dont l'om puisse a tel chief venir,
« Ne nos en plaignons al partir ;
« Quar l’onor de nos e le bien
« En desir jo sor tote rien. »
A ço redistrent lor talant
Li plusor d’eus e li auquant :
En plusors sens le loënt faire,
Mais enuiz est de tot retraire.
Après eus toz parla Paris :
« Tot iço », fait il, « rien ne pris.
« Riche gent somes e vaillant
PageV01P197
« E d’aïde e d’aveir manant ;
« Ceste vile ne crient nul home.
« De mon conseil est ço la some,
« Que des Grezeis querons venjance,
« Quar jo sai de fi senz dotance
« Qu’il nos en avendra toz biens :
« De ço seit toz li blasmes miens.
« Seit la navie apareilliee,
« E si seit en Grece enveiee
« Delivrement jusqu’a brief jor.
« Li deu en vuelent nostre honor,
« E dirai vos coment jol sai.
« L’autr’ier, es calendes de mai,
« Chaçoë en Inde la Menor
« Un cerf, ço m’est vis, coreor.
« Lo jor le chacierent mi chien :
« Assez corui, ainz ne pris rien.
« Mout fist grant chaut d’estrange guise :
« Le jor ne venta guaires bise.
« Mes veneors e toz mes chiens
« Perdi es vaus Cithariiens.
PageV01P198
« Lez la fontaine ou rien n'abeivre,
« Tres desoz l'ombre d'un geneivre,
« M’estut dormir, nel poi muër :
« Onques avant ne poi aler.
« Sempres maneis en m’avison
« Vi devant mei Mercurion :
« Juno, Venus e Minerva,
« Ces treis deuesses m'amena.
« Treis feiz m'apela dreitement,
« Puis dist : « Paris, a mei entent.
« Cez deuesses vienent a tei
« Por le jugement d’un otrei.
« Une pome lor fu getee
« D’or massice, tote letree :
« Les letres diënt en Grezeis
« Qu'a la plus bele d’eles treis
« Sera la pome quitement
« Entre eles en a grant content :
« Chascune plus bele se fait,
« Chascune est dreiz, ço dit, qu’el l’ait ;
« N’i a celi de sei ne die
PageV01P199
« Que por beauté n'en perdra mie.
« L’une la vueut, l’autre li viee,
« Ancor n'est a nule otreiee,
« Ancor n'en est nule saisie :
« Mout est l’une a l'autre marrie.
« Conseil ont pris, — jo lor donai
« E par bone fei lor loai, —
« Que a ço que tu en direies,
« E celi cui tu la dorreies,
« Des autres li seit otreiee,
« De beauté seit la plus preisiee.
« Totes treis l’ont ensi greé
« Com de ta boche iert devisé :
« Cele l’avra cui tu diras
« E de beauté plus loëras.
« Par tei le covient a saveir,
« Qui la pome devra aveir.
PageV01P200
« Chascune conseilla a mei
« Priveement e en segrei :
« Soz ciel n'a rien que jo vousisse
« Qu’a icele hore n’en traisisse ;
« N'i ot celi que ne m’ofrist.
« E Venus m’afia e dist,
« Se la pome li otreioë
« E de beauté plus la looë,
« Femme de Grece me dorreit
« La plus preisiee qu'i sereit.
« La pome ensi li otreiai
« E de beauté plus la loai :
« A li m'en tinc por la pramesse,
« Si sai tres bien que la deuesse
« M’aïdera, n’en dot de rien.
« Se vos, sire, le volez bien,
« G’irai, ço sacheiz, volentiers.
« Tant aie gent e cheualiers
« Qu'en lor terre poissons forfaire :
PageV01P201
« Ainz que nos metons el repaire,
« Lor avrons tel damage fait,
« Qui a toz jorz iert mais retrait. »
Anceis qu'a ço respondist nus,
Parla premiers Deïphebus :
« Bien lo, » fait il, « e bien agré
« Le conseil qu'a Paris doné.
« A lui m'en tieng, mout a bien dit :
« N'i deit aveir nul contredit.
« Bien cuit e crei, se il i vait,
« Que li Grezeis nos feront plait
« E qu'il rendront Esionan :
« Anceis que vienge al chief de l'an,
« Plait nos feront tot a noz grez.
« Seit li navies aprestez,
« E si en aut hastivement :
PageV01P202
« N'i ait autre porloignement ».
Après parla danz Helenus,
Frere Paris, fiz Priamus.
En piez s'estut devant le rei:
« Sire, » fait il, « entendez mei.
« Jo sai auques de deviner :
« Ne veïstes onques mon per.
« Mainte chose ai prophetiziee
« Que est provee e essaiee ;
« Onques chose ne fis acreire
« Que n'ait esté provee a veire ;
« De rien que die n'i faudrai.
« Mais, ço sacheiz, une rien sai :
« Se Paris a de Grece femme
« Ne de la terre ne del regne,
« Se Troie n’en est eissilliee,
« Arse e fondue e trebuchiee,
« J'otrei que j’en seie dampnez
PageV01P203
« E en un feu ars e ventez.
« Veü en ai les visions
« Par treis feiz e devins respons :
« De ço me faz devins e maistre,
« Que il ne puet autrement estre :
« Se de Grece femme en ameine,
« Senz mort, senz dolor e senz peine
« N’en porra eschaper uns sous,
« Quar li Grezeis vendront sor nos,
« Par vive force e par bataille
« Ylion abatront senz faille ;
« Ja n’i avra si haut terrier
« Que il ne facent trebuchier.
« Peres e fiz toz ociront
« E tot le regne destruiront
« A grant dolor e a torment :
« Ja nos i remaindra parent.
« Por ço sereit bien, ço m'est vis,
« Que n'i alast pas danz Paris :
« Remaigne sei, quar grant damage
PageV01P204
« Nos puet venir par son passage.
« Grant chose deit l'om desvoleir,
« Por piz oster, e remaneir ».
Quant Helenus ot achevee
La parole qu’il ot mostree,
Tuit furent a la cort taisant,
Onc n'i parla petit ne grant.
N'i aveit un sol mot tenti,
Quant Troïlus en piez sailli.
Des fiz le rei ert le menor,
Mais ço nos retrait bien l'Autor,
Poi ert meins forz en son endreit
Ne meins hardiz qu’Hector esteit :
« Avoi! » fait il, « franc chevalier,
« Por quei vos vei si esmaier
« Por la parole d’un proveire,
« Qui ci nos fait mençonge acreire?
« Trop par est fous qui cuide e creit
PageV01P205
« Que il sache qu'avenir deit
« D’ui en treis anz : jo nel cuit mie.
« Ço li fait dire coardie :
« Proveire sont toz jorz coart,
« De poi de chose ont il reguart.
« Cist ne fait mie a escouter :
« Dehaiz ait hui son deviner!
« Que quiert il entre chevaliers ?
« Mais aut orer en cez mostiers
« E guart qu'il seit e gros e gras.
« Nos vies ne s’acordent pas :
« Penst bien de son cors aaisier,
« Qu'il n’a d'autre chose mestier.
« Peine e travail por pris aveir :
« Itel vie devons aveir.
« E qui por son devinement
« Laira a prendre vengement
« De la grant honte e del grant lait
« Que li Grezeis nos ont tant fait,
« Cil seit a toz jorz mais honiz
PageV01P206
« E de trestoz les deus partiz. »
A cele parole ot grant bruit :
« Mout a bien dit, » ço dient tuit.
Chascuns loë, chascuns otreie
Que Paris se mete a la veie :
« Por les paroles Heleni,
O ait veir dit o ait menti,
Ne remaigne. » Non fera il :
Por ço furent tuit a eissil.
Ensi fu li conseuz greez :
« Seit li navies aprestez;
En Grece en aut, pas ne remaigne,
Qui que s’en lot ne qui s’en plaigne. »
A cele feiz ne distrent plus.
Prianz tramist Deïphebus
En Pannoine, lui e Paris,
Por chevaliers querre el païs.
La en alerent senz demore :
Assez en orent en poi d'ore ;
PageV01P207
Tant en josterent come il vorent,
Puis s’en tornerent come ainz porent.
Après manda li reis Prianz
Un parlement qui mout fu granz :
Tuit i vindrent cil de s'onor,
E li plus riche e li meillor
Mandé furent comunaument.
Mout par i assembla grant gent,
Quar bien voleit li reis Prianz
Saveir lor cuers e lor talanz :
« Seignor, » fait il, « mandez vos ai :
« Savez por quei? Jol vos dirai.
« Bien oïstes la grant dolor,
« Com furent mort nostre ancessor,
« Que cil de Grece detrenchierent,
« E Troie e la terre eissillierent.
« N'en a esté prise venjance :
« Or si sacheiz bien senz dotance.
« Ne remandra mais por nul plait
« Que autre chose n'en seit fait.
PageV01P208
« Dreiz ert qu'o vos me conseillasse,
« Ainz qu’autre chose començasse.
« Antenor i tramis l'autr’ier :
« Saveir voleie e essaier
« S'il me rendreient ma soror,
« Qu'il tienent a grant deshonor.
« II ne m'en voustrent rendre mie,
« Mout li distrent lait e folie.
« Or n'i a plus : j’ai conseil pris
« Que g’i vueil enveier Paris
« Por forfaire, por vengement
« Del lait qu'il firent nostre gent,
« Mais tot en vueil ancor saveir
« Le los de vos e le voleir ;
« Quar, se vos plaist, il i ira,
« E se vos plaist, il remandra.
« E se aucun de vos desplaist,
« C’est folie que il s'en taist,
« Mais die en ço qu'a vis l'en iert :
PageV01P209
« Conseil creie qui conseil quiert ».
Panthus, uns vassaus mout senez,
De letres sages e fondez,
A comenciee sa reison,
Si que l'oïrent li baron :
« Reis sire, oëz que vueil retraire
« Par fei, jo nel dei mie taire ;
« Ne dei chose celer vers tei
« Dont jo trespas la meie fei:
« Mei est avis, cil n’aime bien
« Qui a son seignor ceile rien
« Par que il seit desheritez
« Ne morz ne pris ne encombrez.
« Treis cenz e seisante anz e plus
« Ot mis pere Eüforbius,
« Ainz qu'il passast de ceste vie;
« Mout ot grant sen e grant clergie.
« Des arz e del conseil devin
« Esteient tuit a lui aclin :
« Onc cele chose ne pramist
« Que a son terme n'avenist.
PageV01P210
« Jo li oï mainte feiz dire
« Que tote Troie e tot l’empire
« Empirereit e tot le regne,
« Se Paris de Grece aveit femme.
« Por çol te di, se il i vait
« E de la prenge femme e ait,
« La prophecie averera
« Que mis pere prophetiza.
« N’aies mie ço en despit
« Que li sages sot e porvit :
« Mieuz te vient tot ensi ester
« E ton bon regne en pais guarder
« Qu’estre en tomoute e en esfrei
« Que n’en chiee li maus sor tei.
« Mout bone pais, mout grant franchise
« As a ton gré, a ta devise:
« Ne querras pas, se tu bien fais,
PageV01P211
« Com franchise perdes e pais.
« Mout dessert cil male merite,
« Qui de son gré se desherite;
« De noble vie e de gentil
« Te vueus embatre en grant peril ».
Li pueples toz comunaument,
Qui ert jostez al parlement,
Contredistrent l’autorité
Que Panthus ot dit e mostré :
N'en firent rien, n’en orent cure ;
Bien i ert lor mesaventure.
Al rei diënt qu'il lor comant
Trestot son buen e son talant :
Ja del faire n’avra respit,
Cui que place ne cui qu'enuit.
Mout les en mercia li reis,
E solonc l’estre de lor leis
Lor a a toz doné congié.
Après a quis e porchacié
PageV01P212
Ovriers vaillanz por les nes faire.
Ne vos en quier lonc conte faire :
Tost furent prestes e guarnies
E de vitaille replenies.
Dès or lor targe bons orez,
Hector li proz en fu alez
Ost aioster e porchacier :
Maint vaillant riche chevalier
I amena par sa preiere,
Qui onc ne torna puis ariere.
Cassandra fu fille le rei,
Que mout sot de devin segrei :
Respons preneit e sorz getot.
Cele conut tres bien e sot,
Se de Grece a femme Paris,
Destruite iert Troie e li païs.
Mostré lor a e dit tres bien :
« Nel vos penseiz, » fait el, « por rien ;
« Quar, s'en Grece vait li navies,
« Poi porrons puis preisier noz vies.
PageV01P213
« Troie en revertira en cendre :
« Ne nos en porra rien defendre.
« A mal irons e en peril,
« E li plusor en lonc eissil. »
Mout lor defent e mout lor viee,
E mout s’en fait triste e iriee,
Bien lor anonçot chose veire :
Cui chaut ? qu'il ne la voustrent creire.
Se Cassandra e Helenus
En fussent creü e Panthus,
Ancor n’eüst Troie nul mal,
Ne li noble riche vassal ;
Mais Fortune nel voleit mie,
Que trop lor esteit enemie.
# | ENLÈVEMENT D'HÉLÈNE
El meis que chantent li oisel,
Fu la mer queie e li tens bel.
PageV01P214
Les nes furent apareilliees,
E de la terre en mer veiliees.
Vint e dous furent e non plus :
Mout lor venta dreit Eürus.
Li chevalier o les barons,
Que Paris ot quis e somons
E sis frere Deïphebus
En Pannoine, trei mile e plus,
Furent venu d'armes guarni,
Defensable, pro e hardi :
En batailles ne en estors
Ne poüst l’om trover meillors.
Li reis Prianz a toz parla,
E si lor dist bien e mostra :
« Seignor, » fait il, « or iert veüe
« La grant proëce e coneüe
« Que l’om cuide que en vos seit.
« Grezeis ont tort, nos avons dreit.
PageV01P215
« Sor eus vos envei por forfaire :
« Guardez, quant l’om l’orra retraire,
« Que si richement l’aiez fait
« Que n’i aiez honte ne lait.
« Paris sera princes de vos,
« De la venjance desiros :
« Son plaisir faites e son bon.
« O vos avreiz Deïphebon.
« Vos ireiz, » fait il, « Eneas,
« Ensemble o vos Polidamas.
« De rien n’ai crieme ne esveil,
« La ou sache vostre conseil.
« Ne soferreiz folie faire :
« S’Esiona en poëz traire,
« Si en faites vostre poëir;
« E se ne la poëz aveir,
« Si renveiez mout tost a mei,
PageV01P216
« E jo Ieiaument vos otrei
« Se mestier avez de socors,
« Tel gent trametrai après vos,
« Ja n’i avra si fort cité,
« Chastel si clos ne fermeté,
« Que il ne prengent par destrece
« Dès qu'à la maistre forterece. »
N’i ot puis autre parlement :
Es nes entrent comunaument.
Dreit vent orent e bone mer
Por corre tost e por sigler.
Sovent saluënt lor amîs,
Tost esloignieren t le païs.
Vers Grece ont dreciees lor veiles
Tot dreit a l'asen des esteiles.
Endreit les jorz d'icel termine,
Si com la Letre nos devine,
Anceis qu'il en Grece arivassent,
Ne qu’il onques a port tornassent,
Fu Menelaus entrez en mer :
PageV01P217
Dreit a Pile voleit sigler.
Nestor l'aveit mandé a sei,
Mais ne sai pas dire por quei.
Menelaus fu mout riches reis,
Mout proz, mout sages, mout corteis.
Mout ot femme de grant beauté :
Onc en cest siegle trespassé
Ne nasqui nule de son pris,
Ne donc ne ainz, n’avant ne puis.
Quant cil des nes s’entrechoisirent
E li un d'eus les autres virent,
Ne sorent dire ne penser.
Quel part chascuns voleit aler ;
Ne se voustreut tant aproismier
Que l'uns poüst l'autre areisnier.
A la cité de Climestree,
PageV01P218
Que mout ert riche e renomee,
Ert en cez jorz Castor alez,
E Pollus sis frere l'ainz nez.
A icez dous fu suer Heleine,
Dont il orent puis assez peine.
Cist Menelaus esteit sis sire,
Qui par mer en alot a Pire :
Heleine une fille en aveit,
Qui o ses dous freres esteit.
Hermiona ert apelee,
Mout ert de ses oncles amee :
Mout l’amoënt e cherisseient,
A grant chierté la norrisseient.
Li Troïen tant espleitierent,
Tant siglerent e tant nagierent
Qu'il ariverent el païs
Qui esteit a lor enemis.
Citherea, ço dit l'Autor,
Aveit non l’isle a icel jor,
O il ariverent lor nes:
PageV01P219
Mout ert li tens douz e soés.
Un riche temple merveillos,
Mout anciën e precios,
Aveit en cel isle, en l'onor
Venus la deesse d’amor.
Tuit cil del regne d'environ
I veneient a oreison.
Mout ert li temples chiers tenuz :
La aoroënt lor vertuz,
La faiseient lor sacrefise
Icil de la terre a lor guise,
E ofreient de riches dons
E preneient devins respons.
Lors i faiseient lor grant feste,
Ço dit l’estoire de la geste.
Cil del païs i erent tuit
A grant joie e a grant deduit.
Par anz s’i suelent assembler
Por la grant feste celebrer
De la grant deuesse des cieus,
PageV01P220
Ne la faiseient mie a gieus :
C'ert de Juno la soveraine.
Paris, o ceus qu'o sei ameine,
En est venuz al temple dreit,
Ou la grant assemblee esteit.
Mout fu de grant beauté Paris
De cors, de façon e de vis ;
Sor les autres fu li plus genz,
Si ot mout riches guarnemenz.
II n'ot si povre compaignon
Ne resemblast prince o baron.
Un sacrefise apareilla
A la deuesse Diana
A la troïene maniere,
O simple vout e o preiere :
Mout le fist acetablement
En la presence de la gent.
Cil del païs mout demandoënt
As Troïens a qu’il parloënt
PageV01P221
Qu'il esteient ne qu’il quereient,
Ou aloënt ne dont veneient.
E cil respondirent briefment,
Fiz ert Priant demeinement,
Qui sire e reis de Troie esteit:
En cest païs le trameteit
Por Castor e Pollus requerre,
Qui jadis furent en sa terre,
Une pucele en amenerent,
Quant Troie e le païs guasterent :
« Ante est cestui e suer le rei,
« Si la tient hom a grant beslei,
« Querre la vient : se l’avïons,
« Mout volentiers l’en menriӧns;
« S’el n’est rendue, estre porra
PageV01P223
« Que granz damages en sordra. »
Mout est isnele Renomee :
Saveir fist tost par la contree
Que Paris ert avuec ses nes
Iluec en l’isle al port remés.
Heleine en oï la novele,
Que sor autres dames ert bele
E riche e sage e avenant.
Ne se prise ne tant ne quant,
Se ele a la feste ne vait.
A ses privez dit e retrait
Qu’ele a pieç' a un vo voé
Rendre a cel jor determiné :
Sor l’autel vueut ses dons ofrir
E les devins respons oïr.
Son eirre fist apareillier,
Puis esploita dei chevauchier ;
Al temple vint o sa maisniee :
Mout par s'en fist joiose e liee.
Quant Paris sot qu’ele ert venue, —
PageV01P223
II ne l’aveit onques veüe, —
Mout la coveita a veeir.
Oï aveit dire por veir
Que c’ert la tres plus bele rien
Que fust el siegle terriien.
Tant fist, tant dist, tant porchaça,
E tant revint e tant ala,
Que il la vit e ele lui :
Mout s’entresguarderent andui.
Ele ot demandé e enquis
Cui fiz e dont esteit Paris ;
Fiere beauté en lui mirot :
Mout l’aama e mout li plot.
Paris fu sage e sciëntos,
Veiziié, cointe e enartos:
Tost sot, tost vit e tost conut
Son bon semblant e aparçut,
E que vers lui a bon corage :
Ne li fu mie trop sauvage,
PageV01P224
Anceis s'en est mise en itant
Qu’auques li dist de son talant.
El veeir e el parlement
Que il firent assez briefment,
Navra Amors e lui e li,
Ainz qu'il se fussent departi.
En lor aé, en lor enfance,
En lor forme e en lor semblance
Les a griefment saisiz Amors :
Sovent lor fait muër colors.
Tant erent bel, ne me merveil
S’il les voleit joster pareil :
Nes poüst pas aillors trover.
Tel leisir orent de parler
PageV01P225
Qu’auques i distrent de lor buens.
Paris o tot ses Troïens
Ont pris d’Eleine le congié :
Dreit a lor nes sont repairié,
Mais ele sot tres bien de veir
Qu’il la vendreit ancor veeir.
Quant al port furent repairié,
Auques fu li soleuz baissié.
Paris a sa gent aünee
Priveement e a celee :
Danz Antenor e Eneas,
Deïphebus, Polidamas
E li autre comunaument
Sont assemblé al parlement.
Paris parla avant eus toz,
Qui mout esteit sages et proz :
« Seignor, » fait il, « en cest païs
« Nos a li reis Prianz tramis
PageV01P226
« Por faire a ceus honte e damage,
« Qui le firent nostre lignage.
« Il n’est rien de m’antain raveir,
« De ço n’aiens ja nul espeir :
« Ne l’ont mie en tel lieu enclose
« Que de l’aveir seit nule chose.
« Quant mener ne l’en porrions
« Por rien que faire poüssons,
« Si nos covendreit engeignier
« Com nos les poissiens damagier,
« E que tel chose poissiens faire
« Dont il aient honte e contraire.
« En cest païs somes venu,
« S’est ja en plusors lieus seü.
« Vos savez bien certainement
« Que il n’aiment pas nostre gent.
« Tant lor ont fait hontes e laiz
« Qu’il n’en sera ja mais jor paiz.
PageV01P227
« N’ont en nos nule sëurté :
« Se il s’esteient apensé,
« Enui e honte nos fereient,
« S’en lor terre nos ateigneient.
« Por ço les nos covient deceivre,
« Ainz qu’il se puïssent aparceivre.
« Une grant chose ai esguardee,
« Que ja vos iert dite e mostree :
« Cil del païs assemblé sont
« A ceste feste que il font ;
« Tuit li plus riche e li meillor
« I sont venu d’iceste honor.
« Assez i a or e argent
« E maint riche chier guarnement ;
« Aveir i a trop amassé,
« Mout en i a l’om aporté ;
« Mout i a une bele femme,
« Que est dame de tot cest regne,
« La plus preisiee senz sorpeis
PageV01P228
« Que seit el regne des Grezeis :
« Reïne est, femme Menelaus.
« Assez i a de teus vassaus
« Ou mout avreit riches prisons.
« Or esguardez quel la ferons.
« Ne porrions mais tant aler,
« Ço cuit, par terre ne par mer,
« Qu'en poüssons a tant venir :
« Chascuns en die son plaisir.
« Nos n’avons pas gent amenee
« A forceier en lor contree :
« Ja par la gent que nos avons
« Cité par force ne prendrons;
« E se nos bien l’avions prise,
« Ne vaudreit tant en nule guise
« Li gaainz que nos ferions
« Com cist fereit que ci veons.
« Mout i a riche troveüre :
PageV01P229
« Veeir poëz quel aventure.
« Mout laisserons noz enemis
« Hontos e dolenz e pensis :
« Jusqu'a mil anz en iert parlé.
« Chascuns en die son pensé
« E tot son buen et son plaisir,
« Quar n’avons mie grant leisir :
« Haster nos covient cest afaire,
« A quel que chief en deiens traire,
« O de ço faire o del laissier,
« O d’autre chose comencier. »
Diversement i respondirent
Cil qui ceste parole oïrent ;
Mais a la parfin s’acorderent
E bien voustrent tuit e Ioerent
Que li temples fust envaïz,
En icele nuit asailliz
Par force e peceiez e pris :
« Or n'i a plus, » ço dist Paris,
« Sempres, quant la lune iert couchiee,
« E la grant noise iert abaissiee,
« Nos armerons comunaument.
« O tot le mieuz de nostre gent,
PageV01P230
« Tot belement e a celee,
« Senz noise faire e senz criëe,
« Les sorprendrons en tel maniere,
« Senz ço que nus d'eus ja nos fiere,
« Les avrons sempres toz conquis
« E tot l’aveir robé e pris.
« E cil qui remandront as nes
« Aient sus trait ancres e tres,
« Que, dès que nos avrons chargié,
« Seions tost del port esloignié.
« Teus entreseignes lor donrons
« Qu'il savront bien qui nos serons. »
Mout devisent bien lor afaire.
Li jorz s’en vait, la nuit repaire.
Cil mangierent qui mestier orent,
S’il orent quei e se il porent.
La lune prist cler a raier,
Dès que il vint a l’anuitier ;
Ainz prinsome se fu couchiee.
Armee se fu lor maisniee :
PageV01P231
Le petit pas, estreit serré,
En sont tot dreit el temple alé.
Cil del païs veillierent tuit,
Grant joie i ot e grant deduit;
Mais des autres nuiz las esteient,
Par dreite force s’endormeient :
N'aveient paor ne reguart
Maus lor venist de nule part;
Mout ert la contree seüre.
Ha! Deus, com grant mesaventure
Avint por ço que la fu fait ?
Ne vos en quier faire lonc plait :
Li Troïen ont tant alé
Qu'al temple vindrent tuit armé.
Un graile sonent a l’entree,
Chascuns a trait nue s’espee :
Isnelement e en poi d'ore,
Fel e irié lor corent sore ;
Maint en detrenchent e ociënt,
E maint en i prenent e liënt.
La bele, la pro dame Heleine
PageV01P232
I pristrent tote premeraine:
Ne se fist mie trop laidir,
Bien fist semblant del consentir.
Maintes dames, plusors puceles
Pristrent o li riches e beles.
Cil del temple sont esbaï,
Qui d’armes furent desguarni :
Ne sevent d’eus prendre conrei,
Muçant s’en fuiënt trei et trei.
Pris e liëz en ont assez.
Mout fu li temples tost robez :
N’i laissierent or ne argent,
Drap de seie ne guarnement.
Tant en i pot chascuns trover,
Ne l’en pueent demi porter :
Onc teus guaainz ne fu mais faiz.
Granz fu li criz, granz fu li braiz.
Cil qui n'est pris est detrenchié.
Mout eüssent bien espleitié,
Mais sor le port ot un chastel,
PageV01P233
Helee ot non, mout par sist bel ;
Fort gent i aveit e hardie.
Dès qu’il orent la noise oïe,
Tuit esfreé se sont vestu,
Puis sont a lor armes coru ;
Onc gent ne fu plus tost armee.
Tot dreit en vont a la criëe:
Failles porterent e brandons,
Toz en resplendist l'environs.
Les Troïens ont encontrez,
D’aveir e de prisons trossez,
Virent lor gent qu’il en menoënt,
Qui braeient e qui crioënt,
Tel noise font e tel tomoute
Que nus n'i poëit oïr gote.
Cil del chastel furent ensemble :
Hardi cuer a cui il ne tremble.
PageV01P234
De maintenant les vont ferir :
La oïsseiz testes croissir,
Ferir de lances e d'espees
E de gisarmes acerees,
De maçues e de coigniees.
Trop i sofrirent granz haschiees
Li Troïen por eus defendre,
E cil del chastel por eus prendre :
Se desarmez les trovissant,
Ja mais Troie ne veïssant.
Cil d'Elee mout les laidissent,
Por poi que toz nes desconfissent :
Merveille esteient agregié,
Por ço qu'il esteient chargié ;
Ne lor esteit mie bosoinz
Que lor nes fussent guaires loinz .
Maint bot, maint hurt, mainte colee
Orent anceis prise e donee
Qu'il i poüssent parvenir:
PageV01P235
Assez en i estut morir.
Mais dès qu'il orent lor prisons
Bailliez as autres compaignons,
E la robe fu mise es nes
O ceus qui esteient remés,
Recovrerent sor les Grezeis.
Donc lor alerent de maneis :
Les escuz pris, espees traites,
Lor ont de morteus plaies faites.
Il meïsme s’entrocieient,
Quar nuit esteit, poi i veeient.
Mout en i ot la nuit ocis,
Plusors navrez e plusors pris.
Desconfit sont cil del chastel,
N'en orent mie le plus bel :
Jusqu’as portes les embatirent,
A grant dolor s’en departirent.
Li Troïen ne se targierent :
PageV01P236
Dreit a lor nes s'en repairierent.
L’eschec de la desconfiture
Ont sempres chargié a dreiture,
Puis entrerent dedenz lor nes.
Des vis n'i a nul d’eus remés,
Mais des morz en i laissent tant,
Dont lor ami seront dolant.
Ainz que des porz fussent parti,
Virent le jor mout esclarci.
Mout fu bele la matinee
Qu'il partirent de la contree :
Vent orent buen a lor voleir
Trestot le jor desci qu'al seir.
Li venz baissa a l’avespree,
Mout devint queie mer salee :
N’i pareisseit onde ne rible,
De grant maniere esteit paisible.
PageV01P237
La nuit traistrent as avirons.
Paris fu liez de ses prisons,
Del grant guaaing e de l'onor,
Del damage qu'ont fait as lor :
Auques les ont estouteiez,
Assez en i laissent d’iriez.
A tant ne remandra il mie :
Dès ore engroisse la folie.
Li Troïen erent en mer,
Mout desirant de l'ariver.
Set jorz i furent acompliz,
Quar toz lor est li venz failliz ;
Mais tant ovrerent o lor reins
Par mi la mer, que tote ert plains,
Qu'il pristrent port a Tenedon :
A grant joie les reçut l’om.
Tenedon esteit uns chasteaus
Sor la marine genz e beaus :
PageV01P238
De murs de marbre ert clos e joinz,
De Troie esteit set liues loinz.
Tor i aveit mout bien asise,
S’en esteit mout fort la porprise;
Mout par i aveit gent repaire.
Ne vos en quier lonc conte faire :
Li Troïen issent des nes,
La nuit se sont iluec remés.
Mout i furent bien herbergié.
Paris a mout tost enveié
Un message tot dreit batant
Noveles dire ai rei Priant.
Cil s'est mout tost mis a l'estree ;
Le seir, quant vint a l’avespree,
Vint a Troie, le rei trova,
Trestote l’uevre li conta,
Coment Paris ot espleitié,
A Tenedon sont herbergié.
PageV01P239
Quant li reis oï les noveles,
Joioses li furent e beles :
Grant joie en orent, teus i ot,
Cui mout pesa puis e desplot;
Tel en furent joios e lié,
Qui puis en furent tuit irié.
Paris e tuit si compaignon
Jurent la nuit a Tenedon.
Dame Heleine faiseit semblant
Qu'ele eüst duel e ire grant :
Fortment plorot e duel faiseit,
E doucement se complaigneit.
Son seignor regretot sovent,
Ses freres, sa fille e sa gent,
E sa ligniee e ses amis,
E sa contree e son païs,
Sa joie, s'onor, sa richece,
E sa beauté e sa hautece.
Ne la poëit nus conforter,
Quant les dames veeit plorer
Que esteient o li ravies.
Mout preiseient petit lor vies,
PageV01P240
Quant lor seignors veeient pris,
Auquanz navrez, plusors ocis;
Por poi li cuer ne lor parteient.
Ceus esguardeient e veeient
Qui lor erent seignor e pere,
Oncle, nevo e fil e frere,
E de leisir n'aveient tant
Qu'o eus parlassent tant ne quant :
Les dames mistrent, par esguart,
Par sei, les homes autre part.
Onques teus dueus ne fu oïz
Come il faiseient ne teus criz,
Paris nel pot plus endurer,
Heleine ala reconforter :
S’entente meteit chascun jor
A li reconforter de plor.
PageV01P241
Tot dreit a li en est venuz,
Semblant fist que fust irascuz :
« Dame », fait il, ço que sera,
« Ne si fait duel qui soferra ?
« E ço ne faut ne jor ne nuit :
« Cuidez que mout ne nos enuit?
« Dur cuer avreit e reneié,
« Cui vos ne feriëz pitié,
« Nule rien quos oie plorer
« Ne puet de joie remembrer.
« Avoi ! dames, confortez vos,
« Quar, par la fei que jo dei vos,
« Plus avreiz joie en cest païs,
« E plus avreiz de voz plaisirs,
« Que voz n’aviëz es contrees
« Dont l’om vos a ça amenees.
« Cil se deivent bien esmaier,
« Qui sont tenu en chaitivier :
PageV01P242
« Vos ne sereiz ja vius tenues,
« Ne a ceus ne sereiz tolues
« Qui vos aiment ne quos ameiz;
« Quites delivres les avreiz.
« Celes que lor seignor ont ci,
« Ne s’aucune i a son ami,
« Si l’avra tot quite e delivre.
« En ceste terre porreiz vivre
« A grant joie e a grant baudor :
« Ja ne vos iert fait deshonor.
« Empor l’amor ma dame Heleine,
« N’i soferreiz ne mal ne peine :
« Ele sole vos en guarra,
« Que ja torz faiz ne vos sera,
« E au voleir de son plaisir
« Ferai tote Troie obeïr.
« Cist regnes iert en sa baillie,
« Soë en sera la seignorie.
« Ja mar avra paor de rien
PageV01P243
« Cil a cui el voudra nul bien ;
« Riches mananz les porra faire :
« Ja rien ne l'en fera contraire.
« A la plus povre que ci est
« Porra doner, se bon li est,
« Greignor aveir c'onques n'en ot
« La plus riche ne aveir pot.
« Confortez vos, ne plorez mie. »
Chascune donc merci li crie —
As piez li chieent les plusors —
Qu'il ait merci de lor seignors,
Qui sont destreit e en liëns :
« Toz en ferai, « fait il, « voz buens
« E le plaisir a la reïne. »
Ele parfondement l’encline :
« Sire, » fait el, « s'estre poüst,
« Ja ne vousissc qu'ensi fust ;
« Mais quant iço vei, e entent,
« Que il ne puet estre autrement,
PageV01P244
« Si nos covendra a sofrir,
« Peist o place, vostre plaisir.
« Deus le guart, qui bien nos fera
« E qui honor nos portera !
« Aumosne i porra grant aveir. »
— Dame, » fait il, « vostre voleir
« Sera si fait e acompli
« Com de vostre boche iert gehi.
Par mi la main destre l'a prise :
Sor un feutre de porpre bise
Sont andui alé conseillier,
Si li comença a preier :
« Dame », fait il, « ço sacheiz bien,
« Onques mais n’amai nule rien,
« Onc mais ne soi que fu amer,
« Onc mais ne m’i vous atorner,
« Or ai mon cuer si en vos mis,
« E si m’a vostre amor espris,
« Que del tot sui enclins a vos.
PageV01P245
« Leiaus amis, leiaus espos
« Vos serai mais tote ma vie :
« D’iço seiez seüre e fie.
« Tote rien vos obeïra
« E tote rien vos servira.
« Se vos ai de Grece amenee,
« Plus bele e plus riche contree
« Verreiz assez en cest païs,
« Ou toz iert faiz vostre plaisirs.
« Tot ço voudrai que vos voudreiz
« E ço que vos comandereiz.
— Sire, » fait el, « ne sai que dire,
« Mais assez ai e duel e ire :
« N’en puet aveir nule rien plus.
« Se jo desdi e jo refus
« Vostre plaisir, poi me vaudra.
« Por ço sai bien qu’il m'estovra,
« Vueille o ne vueille, a consentir
« Vostre buen e vostre plaisir.
« Quant defendre ne me porreie,
« De dreit neient m'escondireie :
PageV01P246
« Nel puis faire, ço peise mei.
« Se me portez honor e fei,
« Sauve l’avreiz son ma valor. »
Donc ne se pot tenir de plor.
Mout l’a Paris reconfortee
E merveilles l'a honoree,
Mout la fist la nuit gent servir,
Ços puis bien dire senz mentir.
# | DOULEUR DE MÉNÉLAS; ENTRÉE D’HÉLÈNE A TROIE;
LES GRECS SE PRÉPARENT A LA GUERRE.
Renomee, que tost s’espant,
Ne se tarja ne tant ne quant :
Par tote Grece a reconté
Coment le temple orent robé,
Com Paris e sa compaignie
Ont Heleine prise e ravie ;
Tot a conté, tot a retrait,
Ensi come il l’aveient fait.
Mout en furent Grezeis irié.
A Menelau l’a l’om noncié,
PageV01P247
Qu’il aveit sa femme perdue :
Paris la li aveit tolue,
A Troie l'en aveit menee;
Ja poëit estre en sa contree.
Mout fu Menelaus angoissos,
Dolenz e tristes e ploros ;
Mout fu destreiz, mout l’en pesa.
Ariere a Parte s’en torna.
Nestor en amena o sei,
Qui mout l'amot par bone fei :
De sa honte e de son damage
Li pesa mout en son corage.
Menelaus un message prent,
Si l'enveia delivrement
A un suen frere qu’il aveit,
Qui mout bons chevaliers esteit:
N’aveit en Grece plus vaillant
Ne plus riche ne plus sachant ;
Agamennon fu apelez.
Icil fu a Parte mandez.
Paris, qui fu a Tenedon,
II e si autre compaignon,
Quant l'endemain furent levé
E del jor parut la clarté, —
PageV01P248
Bel tens fist mout come en pascor,
Qu'es arbres pert e fueille e flor, —
Monté furent es palefreiz;
Assez orent riches conreiz.
L’aveir e la robe ont chargiee
De que Grece esteit despoilliee,
Si l’en enveient dreit a Troie,
E lor prisons a mout grant joie.
Paris tint par la regne Heleine,
De li honorer mout se peine :
Sis cors de grant beauté resplent.
Prianz o le mieuz de sa gent
Fu par matin de Troie eissuz,
Treis liues est contre eus venuz.
Estrange joie demenerent,
La ou primes s'entrecontrerent.
Icil qui les prisons guioënt
E qui le grant aveir menoënt
De tot ont fait al rei present,
PageV01P249
E il s’en esjoï fortment.
Son fil Paris aime et joïst,
E cil li conta tot e dist
Par ordre, ensi come il alerent,
Ou e coment il ariverent,
Coment li temples fu brisiez
E del grant aveir despoilliez,
E come il furent asailli
Ainz qu’as nes fussent reverti.
Conta li la desconfiture
Que il firent par nuit oscure,
E mostra li celi qu'il meine,
Que pas n'est laide ne vilaine,
Mout s'en tint li reis a guariz,
Qu'or cuide estre seürs e fiz
Que por Heleine seit rendue
Sa suer, que il ont tant tenue :
Dreit avra d’eus a sa merci,
Ainz qu'il en seient mais saisi.
Mout fu li reis proz e corteis :
PageV01P250
Les regnes a noaus d'orfreis
Prist del palefrei dame Heleine;
Il toz sous la conduit e meine.
Mout la conforte e mout li prie
Qu’ele s'esjoie e ne plort mie :
Assez li a li reis pramis
Qu’el sera dame del païs.
Tant chevauchierent, tant parlerent
Que es rues de Troie entrerent.
Onques nus hom a icel jor,
Ço nos recontent li autor,
N’aveit oï anceis parler
De si grant joie demener
A nule gent qui fussent vis,
Com le jor firent el païs.
La nuit furent mout celebré,
Mout essaucié, mout honoré;
E l’endemain a grant hautece
A grant joie e a grant leece
A Paris Heleine esposee.
PageV01P251
Li reis Prianz li a donee :
Mout li a riches noces faites,
Ja mais n'ierent iteus retraites.
Tuit cil de Troie festiverent
Uit jorz, que onques ne finerent :
Grant joie aveient que Paris
Aveit laidiz lor enemis.
Por essaucement de la gloire
E por l’onor de la victoire
Dura la feste uit jorz e plus,
Si come il l’aveient en us.
Heleine fu mout honoree
E mout joïe e mout amee
Del rei Priant e de sa femme
E de toz les autres del regne.
Li frere Paris l’orent chiere
E ses sorors de grant maniere,
Fors la devine Cassandra,
Que mout grant noise demena :
Qui qu'onques fust liez ne joios,
Ele faiseit duel angoissos.
PageV01P252
A haute voiz a toz diseit
Que tot certainement saveit
Qu'or sereit Troie desertee,
Ja ne sereit mais rabitee :
Mout en esteit la fin prochaine.
Mout maudiseit sovent Heleine,
Mout maudiseit le mariage,
Et lor diseit que tel damage
Lor avendreit prochainement,
Qui durreit pardurablement :
« Lasse, » fait ele, « quel dolors
« lert, quant charront cez beles tors,
« Cist riche mur e cez meisons
« E cist palais e cist donjons !
« Ha! quel dolor, quant mi bel frere
« En seront mort e mis chiers pere !
« A tart se clamera chaitis,
« Quant les verra morz e ocis.
« Ecuba, mere, queus pechiez !
« Tant sera vostre cuers iriez !
PageV01P253
« Tant par a ci fort aventure!
« Com dolorose porteüre
« As fait, dame, de tes enfanz!
« Ocis les t'a li reis Prianz,
« Qui cest mariage a josté.
« Haï ! Troie, noble cité,
« Com grant dolor qu'or fineras,
« Ja mais jor ne restoreras!
« Franches dames, franches puceles,
« N'atendez mie les noveles
« Qu'orreiz sovent de voz mariz,
« De voz freres e de voz fiz :
« Fuiez vos en, bien en est termes.
« Ou prendriëz vos tantes lermes
« Com vos covendra a plorer?
« Ha ! com porra veeir pasmer
« L'une de vos l’autre sovent !
« Mout desirasse chierement
« Mort avenir, s'estre poüst,
« Ainz que li termes venuz fust,
PageV01P254
« Qui s’apareille chascun jor,
« De la laide mortel dolor. »
Ensi braeit, ensi criot,
Si faite vie demenot
Cassandra : ja repos n'eüst,
Por nul chasti qui faiz li fust,
Tant qu’il nel porent endurer.
Lors l’a li reis faite enfermer
En une chambre, loinz de gent,
Ou puis fu assez longement.
Endementres que ço fu fait,
Que jo vos ai dit e retrait.
Es vos Agamennon venu,
Cui Menelaus ot atendu.
A Parte vint dreit, ou il ere;
Mout trova dehaitié son frere
Por le hontage de sa femme,
Por le damage de son regne,
Que li Troïen li ont fait :
Ne puet muër ne s’en dehait.
Agamennon esteit mout proz :
PageV01P255
Son frere conforta sor toz :
« Iço », fait il, « mais ne pensez.
« Guardez que ja hom qui seit nez
« Se puisse aperceveir ne dire
« Que vos en aiez duel ne ire.
« Li preisié home del vieil tens,
« Qui tant orent valor e sens,
« Ne conquistrent pas les honors
« En duel, en lermes ne en plors;
« Mais quant hom lor faiseit laidure,
« Si preneient engin e cure
« Come il s'en poüssent vengier:
« Si deivent faire chevalier.
« Qui n’a guerre n’aversité
« Ne damage ne povreté,
« Coment conoistra sa valor?
« Mais cil a cui hom tout honor,
« Qui les granz cous a a sofrir
« E les maisniees a tenir,
« Qu'il seit povres e sofraitos,
PageV01P256
« Or seit riches, or bosoignos,
« A la feiee guaaignanz
« Et a la feiee perdanz ;
« Que sis pris creisse e mont e puit,
« Ne de bien faire ne s’enuit :
« Ensi conquistrent lor honor
« Ça en ariers nostre ancessor ;
« Ensi puet l'om en pris venir.
« Or n'i a rien del plus sofrir
« La honte e le damage grant
« Que nos a fait le rei Priant :
« Or porchaçons delivrement
« Que en prenons tel vengement
« Que nostre honor i seit seüe
« E par tot le mont conëue.
PageV01P257
« Que cil qui naistront a mil anz
« Puissent bien dire a lor enfanz
« Qu'onques si hauz dreiz ne fu pris,
« Come de ço qu’a fait Paris.
« Grant parole n'a ci mestier,
« Mais or pensons de l’enveier
« Par tote Grece sus e jus
« As reis, as contes e a dus :
« Somons seient d'aler a Troie.
« N'i a celui qui de grant joie
« Ne s'apareut a son poëir
« O quant que il porra aveir.
« Quant nostre gent sera jostee
« E por bataille conreëe,
« Soz ciel n'a vile ne cité,
« Tor ne chastel ne fermeté
« Que de nos se puisse defendre ;
« E qui Paris porra vif prendre,
« Sil pende l’om come larron.
« Si asprement nos en venjons
« Que tote Troie en seit fondue
« E craventee e abatue. »
PageV01P258
Senz autre respit quin fust pris,
Ont par Grece lor mes tramis.
N'i ot rei ne duc n'aumaçor,
Riche conte ne vavassor,
Qui ne seit baniz e somons :
Oïr poëz d'auquanz les nons.
Danz Patroclus, danz Achillès
E li tres proz Diomedès
E li beaus Eürialus
E li forz reis Telepolus
Vindrent a Parte, ou cil esteient
Qui de l’uevre s’entremeteient.
Conseil pristrent comunaument,
Quant avreient josté lor gent,
Qu'il ireient senz demorance
D'Eleine prendre la venjance :
De l’ost joster ont conseil pris
E del navie, qu'il seit quis.
PageV01P259
Icil que jo vos ai nomé,
O ceus qu'i erent assemblé,
Firent Agamemnon seignor
E sor eus toz empereor.
Tote la gent qu'il josteront
E qui al siege a Troie iront
Seront desoz sa seignorie,
E de toz avra la baillie :
A lui del tot obeïront,
Son buen e son plaisir feront.
Autresi riches reis e dus
Jostisera quatorze e plus
Come il esteit, mais nequeden,
Par grant esguart e par grant sen,
L’ont il eslit desor eus toz,
Quar mout esteit sages e proz.
Mout est ja ceste uevre aatie :
De rechief ont Grece banie
PageV01P260
Si faitement, par tel maniere,
O seit par force o par preiere,
Ja n’i avra grant ne petit
De remaneir quiere respit.
De nes, d'armes e de conreiz
Firent par tot granz apareiz,
Si qu'al terme qui mis i est
Fussent trestuit guarni e prest :
A Temese dreit al rivage
Ajosteront tot lor barnage;
Puis movront tuit comunaument,
Dès qu'il avront oré e vent.
S’a Troie pueent ariver,
Mout en seront fort a geter;
Mout en seront ainz lances fraites
E espees de fuerre traites;
PageV01P261
Mout i avra ainz chevaliers.
Abatuz morz de lor destriers.
Adès en estovra morir :
Autrement ne puet avenir.
# | DISPARITION DE CASTOR ET POLLUX
Dedenz les jorz de la quinzaine
Que Paris ot ravi Helein,
Se mistrent si dui frere en mer
Por li socorre e ramener :
Mais a male hore s'i esmurent.
Quant al port de Lesbion furent,
Si tost n'orent terre perdue,
Quant tormente lor est creüe :
Toz les treis jorz venta si fort
Que nes n’osa venir a port.
Mout fu la mer fiere e orrible,
PageV01P262
Onques d'uit jorz ne fu paisible.
N'en pot estre novele oïe,
Fors que fole gent esbaïe,
Qui legier creient maintes riens
Cui il cuident que il seit biens,
Par iceus fu dit e cuidé
Qu’il n’erent mie tempesté.
« Ne poëient mie morir,
N’en mer ne en terre perir » :
Ensi distrent la gent vilaine.
O lonc travail e o grant peine
Les quist om puis desci qu’a Troie.
Mais qui qu’en feïst duel ne joie,
Ne pot estre por rien seü,
Saveir qu’il erent devenu.
Castor e sis frere Pollus
Ensi finerent, n’en sai plus.
PageV01P263
Cist ont ja receü estreine
De lor bele soror Heleine :
A mainz la covint a receivre,
Qui en seront des ames seivre.
# | PORTRAITS DES HÉROS ET HÉROÏNES DE LA GUERRE
DE TROIE
Beneeiz dit, qui rien ni lait
De quant que Daires li retrait,
Qu'ici endreit voust demostrer
E les semblances reconter
E la forme qu’aveit chascuns,
Qu’a ses ieuz les vit uns e uns.
Quant cil de Troie e li Grezeis
Aveient triues par dous meis,
O par meins o par plus d'espaces,
PageV01P264
En tres, en loges e en places
Les alot Daires reguarder
Por lor semblances reconter :
S’estoire voleit faire pleine,
Por ço s’en mist en si grant peine.
Des dous qui sont peri en mer
Oï retraire e reconter
Que il furent andui d'un grant
E d'une groisse e d'un semblant.
Cheveus aveient lons e blois
Sor les espaules par granz trois.
Ambedui aveient gros ieuz,
Pleins de fierté e pleins d’orguieuz.
Mout aveient les faces beles
E les boches e les maisseles.
Lonc cors aveient e bien fait,
Si com l’Estoire nos retrait.
D'Eleine, que ert lor soror.
PageV01P265
De trestotes beautez la flor,
De totes dames mireor,
De totes autres la gençor,
De trestotes la soveraine, —
Ausi come color de graine
Est mout plus bele d'autre chose,
Et tot ausi come la rose
Sormonte colors de beautez,
Trestot ausi, e plus assez,
Sormonta la beauté Heleine
Tote rien que nasqui humaine, —
Ço diseient bien li auquant
Qu'a ses dous freres ert semblant.
Enz el mi lieu des dous sorciz,
PageV01P266
Qu’ele aveit deugiez e soutiz,
Aveit un seing en tel endreit
Que merveilles li aveneit.
Li cors de li ert blans e gras,
Mout se vesteit bien de ses dras ;
Simple esteit tant e de bon aire
Come l'on porreit plus retraire.
Agamennon, qui esteit reis
E duitre e maistre des Grezeis,
Fu merveilles granz e membruz ;
Mout ot grant force e granz vertuz;
Merveilles esteit aïros
E penibles e travaillos.
Sa char e sa crine deugiee
Ert plus blanche que neif negiee.
PageV01P267
Ja de parler ne fust atainz,
Sages ert, cointes e macainz;
Mout ert nobles e glorios
E d’aveir riches e penos.
Menelaus n'ert granz ne petiz ;
Ros ert e beaus, proz e hardiz.
Mout esteit liez e acetables
E a tote rien agreables.
Achillès fu de grant beauté
Gros ot le piz, espès e lé,
E les membres granz e pleniers,
Les ieuz el chief hardiz e fiers ;
Crespes cheveus ot e aubornes.
Ne fu mie pensis ne mornes :
La chiere aveit liee e joiose
E vers son enemi irose.
Larges esteit e despensiers
PageV01P268
E mout amez de chevliers,
Grant pris aveit d’armes porter :
A peines trovast hom son per.
Mout ert hardiz e corajos
E de victoire coveitos.
Patroclus ot le cors mout gent
E mout fu de grant esciënt,
Blans fu e blonz e lons e granz
E chevaliers mout avenanz ;
Les ieuz ot vairs, n’ot pas grant ire;
Beaus fu mout, a la verté dire,
Larges, donere merveillos,
Mais mout par esteit vergondos.
Aïaus fu gros e quarrez
De piz, de braz e de costez :
Auques ert granz e espauluz,
Toz jorz ert richement vestuz;
Mout esteit forz, mout esteit durs,
PageV01P269
Mais n’esteit mie mout seürs :
De parole ert auques legiers
E mout se joot volentiers.
Mais un autre Aïaus i ot,
Qui Telamon en sornon ot :
Icist fu mout de grant valor.
Mout ot en lui bon chanteor,
Mout aveit la voiz haute et clere
E de sonez ert bons trovere.
Neir chief aveit recercelé ;
Mout par ert de grant simpleté,
Mais encontre son enemi
Aveit cuer cruel e hardi :
Ja en estor ne en tornei
Ne portast a nul home fei.
Soz ciel n’aveit tel chevalier,
Ne qui meins se seüst preisier.
PageV01P270
De grant beauté, ço dit Darès,
Les sormontot toz Ulixès.
N'ert mie granz ne trop petiz,
Mout par ert de grant sen guarniz.
Merveilles esteit beaus parliers,
Mais en dis mile chevaliers
N’en aveit un plus tricheor :
Ja veir ne deïst a nul jor.
De sa boche isseit granz gabeis,
Mais mout ert sages e corteis.
Forz refu mout Diomedès,
Gros e quarrez e granz adès ;
La chiere aveit mout felenesse :
Cist fist mainte fausse pramesse.
Mout fu hardiz, mout fu noisos,
E mout fu d'armes engeignos ;
Mout fu estouz e sorparlez,
E mout par fu sis cors dotez.
PageV01P271
A grant peine poëit trover
Qui contre lui vousist ester :
Rien nel poëit en pais tenir,
Trop par esteit maus a servir;
Mais por amor traist mainte feiz
Maintes peines e mainz torneiz.
Nestor fu granz e lons e lez ;
Force deveit aveir assez.
Le nes ot corbe ; de parler
Ne poüst hom trover son per.
Mout donot bien un bon conseil
A son ami, a son feeil;
Mais quant ire le sorportot,
Nule mesure ne guardot.
Neif n'est plus blanche qu’il ert toz;
Mout ert hardiz e mout ert proz.
PageV01P272
Or ne resteit de rien itaus
De semblance Proteselaus,
Quar merveilles esteit isneaus
E genz e proz e forz e beaus.
Neptolemus fu granz e lons,
Gros par le ventre come uns trons.
Merveilles par ert vertuos
E de mainte chose engeignos.
Bel vout aveit e bele chiere,
Si baubeiot de grant maniere.
Les ieuz aveit gros e roonz ;
Neir chief aveit, — n’ert mie blonz, —
Les sorcilles grosses e lees,
Come s’il les eüst enflees.
De plaiz saveit trop e de leis,
E merveilles par ert corteis.
Palamedès nel semblot pas :
Gent cors aveit, n’ert mie gras ;
PageV01P273
Grailes ert mout par mi les flans,
Douz e soés, simples e frans,
Hauz, Ions e blois e beaus e dreiz
E les mains blanches e les deiz.
Polidarius ert si gras
Qu’a granz peines alot le pas.
En plusors choses ert vaillanz,
Mais toz jorz ert tristes pensanz.
Ainz cerchast l’om par mainte terre,
Qui plus orgoillos vousist querre.
Machaon ert reis merveillos,
Mout esteit fiers e corajos.
Le cors aveit trestot roont
PageV01P274
E poi cheveus en mi le front ;
Mout par manaçot richement
E mout ert fel a tote gent.
N'ert pas trop granz ne trop petiz;
Toz jorz s'endormeit a enviz.
Li reis de Perse fu mout granz
E mout riches e mout poissanz.
Le vis ot gras e lentillos ;
De barbe e de cheveus fu ros.
Briseïda fu avenant :
Ne fu petite ne trop grant.
Plus esteit bele e bloie e blanche
Que flor de lis ne neif sor branche ;
Mais les sorcilles li joigneient,
Que auques li mesaveneient.
Beaus ieuz aveit de grant maniere
PageV01P275
E mout esteit bele parliere.
Mout fu de bon afaitement
E de sage contenement.
Mout fu amee e mout amot,
Mais sis corages li chanjot ;
E si ert el mout vergondose,
Simple e aumosniere e pitose.
De ceus de Grece vos ai dit
Les semblances solonc l’Escrit :
Itant com jo en ai trové,
Vos ai tot dit e reconté;
Jo n'i ai mis ne plus ne meins.
Or vos dirai des Troïains.
Mout par fu beaus e lons e granz,
Ço dit l’Escriz, li reis Prianz.
Le nes e la boche e le vis
Ot bien estant e bien asis ;
La parole aveit auques basse,
Soëf voiz ot e douce e quasse.
PageV01P276
Mout par esteit bons chevaliers,
E matin manjot volentiers.
Onques nul jor ne s’esmaia,
Ne onques losengier n’ama.
De sa parole ert veritiers
E de jostise dreituriers.
Contes e fables e chançons
E estrumenz e noveaus sons
Oëit : sovent s'i delitot,
E chevaliers mout honorot.
Onques nus reis plus riches dons
Ne sot doner a ses barons.
Des Troïens li plus hardiz
Esteit Hector, sis ainz nez fiz.
Des Troïens ? Voire del mont,
De ceus qui furent ne qui sont,
Ne qui ja mais jor deivent estre.
Des biens le fist Nature maistre
PageV01P277
E des bontez qu'on puet aveir ;
En lui mostra tot son saveir,
Fors que plus bel le poüst faire,
Mais nus ne set meillor retraire.
Se en lui rien mesaveneit,
Par le bien faire le covreit :
Ço savez bien, haute proëce
Abaisse bien cri de Iaidece.
Or vos dirai d'Ector la some,
Ja ne l’orreiz mieuz par nul home :
De pris toz homes sormontot,
Mais un sol petit baubeiot.
D'andous les ieuz borgnes esteit,
Mais point ne li mesaveneit.
Chief ot blont e cresp, blanche char,
E si n’aveit cure d’eschar.
PageV01P278
Cors ot bien fait e forniz membres,
Mais il nes aveit mie tendres;
Ne puis qu’il vint al grant bosoing,
Ne que il traist vers lui le soing,
Onques as armes n'ot si dur
En tot le mont ne si seür.
De sa largece ne fu rien,
Quar, se li mondes fust toz sien,
Sil donast tot a bones genz.
Lui ne durot ors ne argenz,
Ne bons destriers ne palefreiz,
Ne riches dras ne bons conreiz :
Sol proëce li remaneit
E li frans cuers, quil somoneit
De toz jorz faire come ber.
PageV01P279
Puis qu’il n’aveit a armes per,
Ne n’eüst nul de sa largece,
De tant valeit mieuz sa proëce.
De corteisie par fu teus
Que cil de Troie e l’oz des Greus
Envers lui furent dreit vilain :
Onc plus corteis ne manja pain.
De sen e de bele mesure
Sormontot tote creature,
N’onques por joie ne por jre
Ne fu menez jusqu’al mesdire
Ne a sorfait n’a nule faille :
Ja mais n’iert cors d’ome quil vaille.
De vis, de boche e de menton
PageV01P280
E de cors ot gente façon;
Bruns chevaliers ert de visage,
Le cuer ot franc e douz e sage :
Tant par esteit de riche cuer,
Qu’il ne deïst a nesun fuer
Parole laide ne vilaine.
Onc ne nasqui hom de sa peine;
D’armes porter ne del sofrir,
Ne de faire tot son plaisir,
Ne vit onques nus hom meillor,
E mout amot pris e honor.
Onques nus hom de mere nez
Ne fu en vile tant amez
Com cil de Troie lui amoënt,
Petit et grant, qui i estoënt.
Douz e pius ert as citeiains,
E contre amor n'ert pas vilains.
PageV01P281
Toz autreteus ert Helenus,
E sis frere Deïphebus,
Come Prianz lor pere esteit.
Entre eus dessemblance n'aveit
De cors, de forme, fors d’aage
E fors de cuer e de corage.
Des formes erent mout semblanz,
Mais divers erent de talanz.
Forz esteit mout Deïphebus,
E de grant sen ert Helenus,
Sages poëtes, bons devins :
Des choses diseit bien les fins.
Troïlus fu beaus a merveille;
Chiere ot riant, face vermeille,
Cler vis apert, le front plenier :
Mout covint bien a chevalier.
Cheveus ot blonz, mout avenanz
PageV01P282
E par nature reluisanz,
leuz vairs e pleins de gaieté :
Onc ne fu rien de lor beauté.
Tant come il ert en bon talent,
Par esguardot si doucement,
Que deliz ert de lui veeir;
Mais une rien vos di por veir,
Qu'il ert envers ses enemis
D'autre semblant e d'autre vis.
Haut ot le nes e par mesure :
Bien sist as armes sa faiture.
Boche ot bien faite e beaus les denz,
Plus blans qu’ivoires ne argenz;
Menton quarré, lonc col e dreit,
Tel come as armes coveneit ;
Les espaules mout bien seanz,
A val traitices descendanz;
PageV01P283
Le piz formé desoz les laz,
Bien faites mains e beaus les braz.
Bien fu tailliez par la ceinture ;
Mout li sist bien sa vesteüre;
Endreit les hanches fu pleniers,
A merveille ert beaus chevaliers.
Jambes ot dreites, vous les piez,
Trestoz les membres bien tailliez;
E ot mout large aforcheüre,
Si fu de mout bele estature.
Granz ert, mais bien li coveneit
O la taille, que bone aveit.
Jo ne cuit or si vaillant home
Ait jusque la ou terre asome,
Qui tant aint joie ne deduit,
Ne meins die qu’a autre enuit,
PageV01P284
Ne qui tant ait riche corage,
Ne tant coveit pris ne barnage.
Ne fu sorfaiz ne outrajos,
Mais liez e gais e amoros.
Bien fu amez e bien ama,
E maint grant fais en endura.
Bachelers ert e jovenceaus,
De ceus de Troie li plus beaus
E li plus proz, fors que sis frere
Hector, qui fu dreiz emperere
E dreiz sire d’armes portanz :
Bien nos en est Daires guaranz.
Flor fu cil de chevalerie,
E cist l’en tint mout bien frarie ;
Bien fu sis frere de proëce,
De corteisie e de largece.
Paris esteit lons e deugiez
PageV01P285
E mout par ert isneaus des piez.
Les cheveus aveit blois e sors,
Plus reluisanz que n'est fins ors.
Sages esteit e vertuos
E d’empire mout coveitos,
Seignorie mout desirot.
Bien faite chiere e beaus ieuz ot.
Traire saveit merveilles bien,
Si sot de bois sor tote rien :
Hardiz e proz e combatanz,
De ses armes bien aïdanz.
Mout ot en lui bon chevalier
E bien se sot d’arc aïdier.
Eneas fu gros e petiz,
Sages e en faiz e en diz.
Mout saveit bien autre areisnier
E son pro querre e porchacier.
Merveilles esteit beaus parliers
PageV01P286
E en causes dreiz conseilliers.
Mout aveit en lui sapiënce,
Force e vertu e reverence,
Les ieuz ot vairs, le vis joios ;
De barbe e de cheveus fu ros.
Mout ot engin, mout ot veisdie,
E mout coveita manantie.
Antenor fu grailes e lons,
Mout ot paroles e sermons.
Cointe home i ot e veiziié,
Viste a cheval e viste a pié.
Sages esteit e emparlez,
Del rei de Troie mout amez.
Sovent joglot ses compaignons,
Quant il i trovot acheisons.
Un fil aveit, Polidamas,
Dont li Livres ne se taist pas,
Quar merveilles esteit preisiez
PageV01P287
E beaus e genz e enseigniez,
Graisles e dreiz e brun le vis,
De bons afaitemenz apris,
Forz e hardiz e defensables
E en toz estoveirs metables.
Nus de son cors plus ne valeit,
Larges e douz e frans esteit.
Point n’esteit feinz, poi ert iros,
Mais as armes ert vertuos.
Li reis Mennon fu genz e granz,
E chevaliers mout avenanz ;
Si ert, ço conte li Escriz,
Par les espaules bien forniz,
O un dur piz, o uns forz braz,
O un chief cresp e aubornaz,
O un lonc vis, o un traitiz,
O uns gros ieuz e tres hardiz;
Poi enveisiez, poi emparlez
PageV01P288
E as armes desmesurez.
Rien ne dotot, rien ne cremeit,
E par tot bien li aveneit.
Maint dur estor rendi e prist :
Merveillos fu, merveilles fist.
Sa grant proëce e si grant fait
Seront a toz jorz mais retrait.
D'Ecuba ne vueil mie taire
Ce que Daires en voust retraire :
Ensi aveit non la reïne,
Mout esteit de bone dotrine.
Grant fu assez e bele adès,
De cors semblot home a bien près :
N’aveit pas femenin talant
Ne corage ne tant ne quant.
Juste ert e pie e dreituriere,
E sage dame e aumosniere.
Andromacha fu bele e gente,
E plus blanche que n’est flor d’ente.
PageV01P289
Blois fu sis chiés e vair si ueil ;
Franche ert e simple senz orgueil ;
Le col aveit de lonc espace.
En li n'ot rien que bien n'estace ;
En son cors ne en sa semblance,
N'aveit un point de mesestance.
Legerie ne fol semblant
N'aveit en li ne tant ne quant.
Cassandra fu de tel grandor
Que ne pot estre de meillor.
Rose ot la chiere e lentillose.
Merveilles ert esciëntose :
Des arz e des segreiz devins
Saveit les somes e les fins ;
De la chose que aveneit
Diseit tot quant qu'il en sereit.
Les ieuz ot clers e reluisanz.
PageV01P290
Toz ert divers li suens semblanz,
E sis estres e sis pensez
Ert d’autres femmes devisez.
De la beauté Polixenain
Vos porreit l'om parler en vain :
Ne porreit pas estre descrite,
Ne par mei ne par autre dite.
Haute ert e graile e longe e droite,
Par les flans deugiee e estreite ;
Le chief ot bloi, les cheveus lons,
Qui li passoënt les talons ;
Les ieuz clers, vairs e amoros,
Les sorciz deugiez ambedous ;
La face blanche, cler le vis,
Plus que rose ne flor de lis.
Mout aveit de gente façon
Le nes, la boche e le menton.
Le col aveit auques longuel ;
PageV01P291
Gent s'afublot de son mantel.
N'ot pas espaules encroëes:
N'erent trop corbes ne trop lees.
Plus li blancheot ia peitrine
Que flor de lis ne flor d’espine.
Lons braz aveit e blanches mains,
Les deiz traitiz, deugiez e plains.
Onc pucele ne fu meins fole.
Le cuer ot douz e la parole
E bei semblant e bon corage.
Onc fille a rei ne fu plus sage,
Ne plus large ne plus corteise :
D’afaitement ne de proëise
Ne de beauté ne de valor
N’aveit mieuz guarnie en l’onor.
Se la beauté de l’autre gent
Fust trestote en un solement,
Si somes nos de ço certain,
PageV01P292
Plus en ot en Polixenain :
Plus bele ert e mieuz enseigniee
E de totes la plus preisiee.
Autre gent ot a Troie assez,
Riches, sages e renomez,
Dont n’est ci faite mencion
Ne recontee lor façon:
El Livre n’en truis plus escrit,
Ne de nul Daires plus n'en dit.
# | DÉNOMBREMENT DES NAVIRES.
Vait s'en ivers, estez repaire,
E li termes de cest afaire,
Qui ne pot mais guaires targier.
Trestuit, ainz la fin de fevrier,
Furent li Grezeis assemblé
A Athenes la grant cité.
Quant qu'il porent de gent aveir
PageV01P293
Ne par force ne par poëir,
Par gré ne par autre maniere,
Par somonse ne par preiere,
A Athenes fu assemblee :
Onques si grant ne fu jostee,
Ne ja si grant n’iert mais oïe.
Aprestee fu la navie.
Lor nes i orent ajostees
Tuit li riche home des contrees,
Bien aprestees, ços plevis,
Contre lor morteus enemis.
Ne vos en cuit de rien mentir :
De Miceines i fist venir
Agamennon cent nes guarnies,
D'omes e d’armes replenies.
De Parte en i ot Menelaus
Seisante, pleines de vassaus,
E de Boëce e de l’onor,
Entre Archelaus e Prothenor,
En i orent cinquante beles,
Trestotes fresches e noveles.
PageV01P294
Ascalaphus e Almenus —
Li uns ert cuens, li autre dus —
En orent trente a lor partie
De la terre d’Orcomenie.
Epistrophus e Scedius
En orent cinquante, e non plus,
Bien guarnies, jol vos plevis,
De la terre de Phocidis.
Telamonius Aïaus
I vint tres bien come vassaus :
Cinquante en ot en la marine,
Qu’ot fait venir de Salemine.
Teücer ot a compaignon
E Amphimac e Dorion,
PageV01P295
Polixenart e Theseüs :
Li plus povre fu cuens o dus.
De Pile en i aveit oitante
Li vieuz Nestor, totes a cante ;
Cinquante en i aveit Thoas
De la cité de Tolias;
Hunerius, quarante e treis
De la terre d’Essimiëis.
Trente e set en ot li vassaus
Oïleïus Aïaus
PageV01P296
De Logres, sa terre demeine :
N'i aveit celi ne fust pleine
D’omes, d’armes e de vitaille,
Toz volenteïs de bataille.
Trente en aduist de Caledoine,
Senz escondit e senz essoine,
Philitoas e Antipus :
Li uns fu reis, li autre dus.
Idomeneus e Merion
De Crete e de la region
En i amenerent oitante,
Beles e granz, totes a cante.
D'Achaie, granz e forz adès,
PageV01P297
En i ot cinquante Ulixès.
Emelius en i ot dis,
De la contree de Pigris,
De la terre e de la contree
Que Pilaca est apelee
En ot cinquante Potarcaus,
E il e danz Proteselaus.
Danz Machaon, danz Polidri,
Qui furent fil Escolapi,
En i aduistrent trente e dous
De la terre de Tricios.
De Phice, que de mer est près,
En i ot cinquante Achillès.
PageV01P298
De Rode, une isle desor mer,
En fist dis pleines amener
Telepolus, uns riches reis,
Qui mout ert amez de Grezeis,
Euripilus d'Orcomenie,
Uns reis de mout grant seignorie,
En ot cinquante bien guarnies,
Bien chargiees e bien emplies.
D'Elide, une terre sauvage,
En ot o sei onze al rivage
Danz Antipus e Amphimaus :
N’en ert a dire tref ne maus.
Si com la Letre me devise,
PageV01P299
Seisante en i ot de Larise
Polibetès e Leontins,
Qui esteient germains cosins.
Diomedès e Sthelenus
E li beaus Eürialus
I aduistrent oitante barges
De la cité, de l’onor d’Arges.
De la terre de Melibee,
Que donc n’ert guaires habitee,
En i ot set Philotetès,
Qui mout esteit fel e engrès.
Uns reis de Cipe Cuneüs
Onze en i ot e neient plus.
Cinquante en i ot de Manese —
PageV01P300
N'en i aveit nule remese —
Prothoïlus, quin esteit sire,
Riches, poissanz de grant empire.
Agapenor de Capadie
En rot cinquante en la navie,
E de Pise en i ot Crenos
Trestot par conte vint e dous.
Menesteüs, li dus d'Athenes
En i aveit cinquante teles,
Forz e guarnies des meillors.
Ço dit e conte li autors,
Quarante e nuef furent par non,
PageV01P301
Tuit riche rei e fort baron,
Qui mil e cent nes amenerent
E trente : a itant les nombrerent.
# | ACHILLE A DELPHES ; CALCHAS PASSE DU CÔTÉ DES GRECS,
SACRIFICE A DlANE.
Ensi com vos poëz oïr,
De verité e senz mentir,
Fu a Athenes l'assemblee :
Ja mais si grant n’iert ajostee.
Cil qui tant ert sages e proz
E qui la cure aveit sor toz —
Ço ert Agamennon li reis —
Manda les princes des Grezeis,
Les dus e toz les chevetaignes
Fors de la cit eu unes plaignes :
Mout i ot riche parlement,
Quar mout i ot de haute gent.
PageV01P302
La ont conté lor chevaliers,
Qu'en a chascuns e quanz milliers;
Mais tant en i aveit venu
Qu'a peines pot estre seü.
Agamennon lor prist a dire :
« Sire », fait il, « riche concire
« Avez josté en ceste place.
« Trop pesant fais prent e embrace
« Qui vers vos s’aatist de guerre ;
« Petit aime sei e sa terre.
« Tel cent en vei, al mien espeir,
« Dont cil qui a menor poëir
« Devreit bien par force achever
« Ço que nos a fait assembler.
« Li laiz e la honte est mout grant,
« Que nos a fait li fiz Priant :
« Meü somes por la venjance,
« Quar ne volons que reparlance
« Ne vilanie ne hontages
PageV01P303
« Seit reprochiez a noz lignages.
« Onc ne firent nostre ancessor
« Rien que nos tort a deshonor,
« Ne nos ne redevons sofrir
« Noz heirs abaissier ne honir.
« La seignorie e la noblece
« Qu’a Grece eü e la hautece
« Ne deit pas endreit nos baissier,
« Anceis devreit mout essaucier;
« Quar tant somes d’une acordance
« E tant vait loinz nostre poissance
« Qu'il n'est nus reis qui faire osast
« Chose vers nos que nos pesast,
« Ne mais que ceste gent honie,
« Qui mar virent lor grant folie.
« Bien pert que mauvés conseil ont,
« Quar tuit sevent cil qui vif sont
PageV01P304
« Que ne sai quant de nostre gent
« Destruistrent Troie si vilment
« Que un sol vif n'en i laissierent,
« La contree tote eissilierent :
« E ço que porent faire sis
« Ne porront faire cent e dis?
« Puet cel estre ? Qui sil laireit
« E qui venjance n’en prendreit,
« Ancor nos fereient sordeis:
« Sis en devancissons anceis.
« Quar gent qui font honte e contraire
« Ne deit hom pas sor sei atraire,
« Ainz les deit hom si devancir,
« Qu'il n'aient mie grant leisir
« D'eus guarnir ne d'eus enforcier,
« Ne d’ajutoire porchacier.
« Ço sai jo bien tot a estros,
« Que guarni se sont contre nos
« E que granz genz ont assemblees
PageV01P305
« De plusors diverses contrees :
« A lor poëir se defendront
« Tant come il onques plus porront.
« E sos plaiseit, jo loëreie
« E endreit mei conseillereie
« Qu'anceis que de ci meüssons,
« A Apollo enveïssons
« Prendre conseil de cest afaire,
« Saveir a quel en porrons traire.
« Li deus nos en dira bien veir
« Senz faillir e senz deceveir.
« Bon conseillier se fait a lui :
« Quar bien sacheiz, si com jo cui,
« Ja de rien puis ne doterons
« Qu’il nos avra doné respons.
« De ço nos est mout granz bosoinz,
PageV01P306
« Ne n’est mie Delfos si loinz
« Que tost ne puissent repairier
« Cil qu'i iront sacrefiier. »
Ceste parole ont agraee
Tuit cil a cui ei fu mostree.
Par le comun esguart de toz,
I vait danz Achillès li proz.
Patroclus meine ensemble o lui :
En Delfon vindrent ambedui.
Senz eschars faire e senz nul ris
Entrent el temple Apollinis;
O crieme e o devocion
Firent al deu lor oreison.
Un sacrefise apareillié
A Achillès sacrefiié.
La nuit oï e sot de veir
Ço qu’il esteit venuz saveir.
Li respons li a dit en bas :
PageV01P307
« As Grezeis, » fait il, « nonceras
« Que al disme an, senz nule faille,
« lert tote fin de la bataille.
« Ço ait bien chascuns en memoire,
« Que en l'an disme avront vitoire;
« E bien sachent de verité
« Qu'adonc avront tot achevé,
« Quar Troie iert prise e abatue,
« E la gent destruite e vencue. »
Tot ço que li respons a dit
A Achillès mis en escrit.
Le deu aoree sil mercie,
E devant l'autel s’umelie.
Oïr poëz com faitement
A icel jor demeinement
Esteit Calcas iluec venuz,
Sages poëtes coneüz.
Fiz ert Testor, un Troïen,
Trop par aveit Calcas grant sen :
PageV01P308
Dons aportot Apollini,
Al deu veneit criër merci
Por ceus de Troie, qu'il fereient
E coment il se contendreient.
Li reis, li pueples del païs
I aveient Calcas tramis
Por ofrir sor l'autel lor dons
E por oïr devins respons,
E saveir come il lor prendreit
De la gent que sor eus veneit.
Ço distrent li respons devin :
« Guarde », fait il, « que par matin
« Auges tot dreit a la navie
« De la Grezesche compaignie.
« Ensemble o eus a Troie iras :
« Sages iés, sis dotrineras.
« Tis sens lor avra grant mestier :
« Nes en lai mie repairier
« Devant qu’il aient Troie prise
« E de la gent faite jostise.
PageV01P309
« Ensi l'estuet a avenir,
« Quar ensi me vient a plaisir. »
Entre Calcas e Achillès,
Qui ne s'erent veü onc mais,
Se sont el temple entrencontré;
Puis ont entre eus dous tant parlé,
De lor segreiz se descovrirent :
Estrange joie s'entrefirent.
Achillès o sei l’en mena,
A son ostel le herberja;
Mout se pena de lui servir
Et de faire tot son plaisir.
De porter fei e compaignie
Sont otreié par fei plevie.
Tant ont alé e espleitié,
Qu'a Athenes sont repairié.
Achillès conta as barons
Ço que li ot dit li respons ;
Tote lor a dite e retraite
PageV01P310
La pramesse que lor est faite :
« Vitoire avront, ço sachent bien :
Ja mar en doteront de rien. »
Onc tel joie ne fu oïe
Com cil ont fait de la navie.
Calcas lor a dit e conté
Tot en ordre la verité,
Com cil de Troie l’enveoënt
Al deu, cui lor dons presentoënt.
« E por oïr e por saveir
« Que Apollo lor deïst veir
« Com faitement lor avendreit
« Ne se Troie se defendreit,
« Ne s'il se porreient tenir
« Vers vos, qu’i deviëz venir,
« Mei i eslurent e tramistrent
« E sor mei la parole en mistrent.
« Venuz i esteie endreit eus,
« Mout en voleie le pro d’eus.
« Tot mon poëir fait en aveie :
« Dedenz le temple al deu esteie;
« Sor l'autel oi les dons posez,
PageV01P311
« Que de Troie aveie aportez ;
« Fait li aveie sacrefise
« A la maniere e a la guise
« Cui je soi qu'il faiseit a faire.
« Ne vos en quier lonc conte faire,
« Mais ço me dist la voiz devine
« Qu'a Athenes sor la marine
« Venisse ça a vos parler,
« Por dire e por amonester
« Que ne departisseiz ja mais,
« N’as Troïens n’eüsseiz pais,
« Devant que Troie fust fondue
« E la gent ocise e vencue.
« Comandé m'a qu’o vos remaigne
« Por enseignier vostre compaigne :
« O vos m’estuet a Troie aler
« Por vostre gent a dotriner.
« Ço qu'Apollo vient a plaisir
« Me covient faire e obeïr :
« Dès que li plaist que auge o vos,
PageV01P312
« Ne m’en vueil faire refusos.
« Son damage quiert e porchace
« Qui as deus fait que lor desplace.
« Mais une chose vos di bien :
« Blasme en avrai sor tote rien ;
« Tuit li Troïen m’en harront
« E mout par s'en merveilleront,
« Quant il orront qu'o vos serai ;
« Mais ja por ço ne remandrai.
« Mieuz me vient as deus obeïr,
« E lor buen faire e lor plaisir,
« Qu'a ceus de Troie, ço m'est vis.
« Iço que vos avez empris
« Faites senz lonc porloignement :
« Bon oré avez e bon vent.
« Ainz demain nuit, s’en sui creüz,
« Iert li navies toz meüz. »
Mout esteient haitié anceis
E plein de joie li Grezeis,
PageV01P313
Mais or les a Calcas guariz
E mout les a plus esbaudiz.
A grant joie l’ont receü
E a grant joie retenu :
Or sont de l’aler tuit certain.
Ne demora que l'endemain
Qu'il se veilierent en la mer :
Dreit a Troie voustrent sigler,
Mais ne pot estre, qu'uns orages
Lor a defendu les passages.
Une tormente merveillose,
Laide e oscure e tenebrose,
Lor a ne sai quanz jorz duré :
Mout en furent desconforté.
Por poi que tuit n'i sont neié :
Trop en furent desconseillié.
Calcas fist ses esperimenz :
Tost sot par ses auguremenz
PageV01P314
Que cist tempiers senefiot,
Qui de passer les destorbot.
Les barons a mandez a sei :
« Seignor », fait il, « or sai e vei
« Por quei tel tens avons eü :
« Por poi ne somes deceü.
« Mout s’est Diana corrociee
« E mout par est vers nos iriee
« De ço que ne l’avons requise
« E qu'el n'a eü sacrefise.
« Mout le nos a bien demostré :
« Nos n'avrons ja tens ne oré
« Desci que li vienge a plaisir.
« Mais mon conseil e mon avir,
« E ço que nos covient a faire,
« Vos vueil a toz dire e retraire.
« En la grant selve renomee
« Que Alida est apelee,
« Nos covendra a repairier;
« La li estuet sacrefiier.
« Agamennon, qui la maistrie
PageV01P315
« A de nos e la seignorie,
« Fera ceste uevre de sa main;
« Après serons fi e certain
« Qu'o bel oré e a grant joie
« Porrons prendre les porz de Troie. »
D'iço n'i ot rien porloignié :
En Alida sont repairié.
Agamennon sous sacrefie,
Vers la deuesse s'umelie :
Del tot se met en sa manaie;
A li s'acorde, a li s'apaie.
Après sont as nes repairié;
A toz a l'om dit e noncié
Que del passer nus ne remaigne :
Dès or n'i a nul qui s’en f'eigne.
Mout s’esjoïssent li Grezeis :
Lor ancres traient demaneis,
Haut sor les maz traient les veiles ;
PageV01P316
La nuit corurent as esteiles.
Par mi la mer les nes s'espandent :
Itel vent ont come il demandent.
Duitor, meneor e guion
Aveient tel com vos diron :
Philotetès, uns vassaus proz,
Mais vieuz esteit e mout de jorz, —
Cil ot esté premierement
Al premerain destruiement, —
Cil les conduist, quar bien saveit
Par ont li cors esteit plus dreit.
A un chastel sont arivé,
Que Troie aveit en poësté.
Granz fu e riches, beaus e forz,
Mais sempres fu pris par esforz.
Sorpris furent trop malement :
PageV01P317
Defense n'i valut neient;
En poi d'ore l’orent conquis.
De ceus dedenz ont mout ocis;
Assez i ot guaaignié preie,
Or e argent e dras de seie.
# | PRISE DU CHATEAU DE TÉNÉDOS; AMBASSADE D’ULYSSE ET DE DIOMÈDE A TROIE
A Tenedon d’iluec alerent
Maneis, onc plus n'i demorerent.
Mais cil, cui n'en fu mie bel,
Clostrent les portes del chastel.
En crieme sont e en esfrei,
Grant paor a chascuns de sei ;
A defendre s'apareillierent.
Cui chaut? Trop sont cil quis requierent.
Ne se porent guaires tenir :
Quant il se virent assaillir,
Si se defendirent assez.
PageV01P318
Li chasteaus fu mout bien fermez :
Sor les portes e par le mur
S’en monterent li plus seür.
Fort se defendent de chaillous,
A ceus defors donent granz cous;
Des tors lor lancent peus aguz :
Haubers ne heaumes ne escuz
Nel puet guarir, quin est ataint ;
Jus es doves en chieent maint.
A ço que haut sont li terrier,
Cui l’om en fait jus trebuchier
Ne montera ja mais ariere :
Maint en i ot la nuit en biere.
Cil qui trebuchent contre val
Font as montanz merveillos mal,
Quar uns en abat plus de dis,
Qui ja n’en releveront puis.
PageV01P319
Mout sont li tai grant e parfont,
Li terrier roiste e dreit a mont.
As portes fu li assauz maire :
La veïsseiz lancier e traire,
La veïsseiz heaumes croissir
E chevaliers espés morir.
Mout se sont cil dedenz tenu
E chierement se sont vendu,
Mais malement le comparerent,
Quar onc d’iluec nen eschaperent :
Tuit i morurent povre e riche,
Si com l’Estoire nos afiche.
Onc cil defors merci n’en orent,
Quar de lor gent grant perte i orent :
Mout lor en aveient ocis,
Por ço lor en fu mout de pis;
Onc nus n’en vint a raençon,
Mout i ot grant ocision;
Tot destruistrent, tot trebuchierent
PageV01P320
E tote la terre eissillierent.
La contree est mise a dolor :
N’i a vilain ne vavassor
Qui ne guerpisse son maneir;
N’en i ose uns sous remaneir.
Li coreor ne li forrier
N'i laissent rien a peceier;
N'i Iaissent blé, n’i Iaissent preie,
Ne chose que l’on mangier deie.
Cil del païs sont en esfrei,
Grant paor a chascuns de sei :
Ne sevent lor guarissement
Ne mais a Troie solement.
La s’en fuient e la s'en vont ;
La, s’il pueent, se defendront;
La reseront il bien requis
E de durable siege asis.
Quant conquis furent li chastel,
Tenedon et Lauriëntel, —
Assez en a l'om aveir trait,
Trop par i ot grant guaaing fait, —
Agamennon a fait joster
PageV01P321
Tot quant que il en pot trover,
Puis le departi en comun :
Sa dreite part done a chascun.
Après, ne tarda pas grantment,
Josterent Greu un parlement :
Li rei, li prince e li baron
I furent tuit mandé par non.
Agamennon parla premiers,
Qui mout fu sages chevaliers
E de grant sen e engeignos
E de l’afaire curios :
« Seignor », fait il, « mostrer vos vueil
« Que mout deit om haïr orgueil :
« N’i vei nul home guaaignier,
« Par orgueil sort maint encombrier.
« Qui par orgueil vueut s’uevre faire
« A peine en puet a bon chief traire :
« Se l’om s'en loë al començail,
« Si s’en plaint om al definail ;
« Ne ja orgueil ne orgoillos
PageV01P322
« Ne vueil que s’acompaint o nos.
« Li deu n’orent onc d’orgueil cure,
« Ainz le heent a desmesure :
« Mainte feiz en ont pris venjance
« E si aperte demostrance
« Que nus ne deit rien plus haïr
« Qu’orgueil en sei a maintenir.
« Perte e damage e destorbier
« Fait orguieuz sovent comencier.
« Contre un ami o contre dous
« Que ja avra uns orgoillos
« A il cent enemis mortaus.
« De toz vices est li plus maus;
« E qui mal aime e en mal creit,
« Se maus l’en vient, c'est a bon dreit.
« Por ço vos vueil dire e mostrer
« Ço dont nos covient a penser :
« Estre en devons tuit curios.
« Nostre ennemi sont près de nos;
« Entré somes dedenz lor terre,
« Par force les volons conquerre;
« Tant en avons ja comencié,
PageV01P323
« Dont il sont mout vers nos irié.
« Volentiers en prendront venjance,
« S'il en pueent aveir poissance;
« En lor cité se defendront
« De nos tant come il plus porront.
« Ele est mout fort estrangement,
« S’i a mout chevaliers e gent :
« Venu i sont de plusors lieus,
« Chalongier nos cuident lor fieus.
« Grant avantage a, ço m'est vis,
« Qui se defent en son païs ;
« Doble force a, se il rien vaut,
« Envers celui qui lui asaut.
« Une buisnache feible assez,
« Ou n’a granz murs ne granz fossez,
« Se defent tant, ainz que seit prise,
« Qu’a peine est tele hore conquise,
« Ne por ço ne parol jo mie
PageV01P324
« Que jo ja pens ne que ja die
« Qu'al loinz se defendent de nos.
« De ço ne sui jo pas dotos :
« Mais une chose poons faire,
« Ensi come il m’est a viaire.
« Sens e mesure, icest pareil,
« Deivent estre nostre conseil :
« Granz laiz sereit, se faision
« Chose ou n’eüst-sen ne raison.
« Del mont, qui si est granz e lez,
« Avons les plus sages jostez :
« Sages deit estre e buens e dreiz
« Toz li conseuz que ja prendreiz.
« Co est mout; bien chose seüe,
« Coment iceste uevre est meüe,
« Li quel ont dreit e li quel tort,
« Maint bon chevalier en sont mort.
PageV01P325
« Laomedon le comença,
« Qui laidement le compara :
« Mout en fu prise aspre venjance,
« Ancore en ont li heir pesance.
« Prianz nos fïst l'autr’ier requerre
« En fine paiz, senz nule guerre,
« Que li rendissons sa soror,
« Que tenue avions maint jor.
« Ne l’en vousimes rendre mie :
« Ço fu orguieuz e grant folie.
« Tant par lor estions mesfait,
« Voleir en deüssons le plait :
« Ne set mie qui rien ne crient
« Come en poi d'ore maus li vient.
« Se fust Esiona rendue,
« Heleine ne fust pas tolue :
« Ja jor Paris nel se pensast
PageV01P326
« Ne nostre terre ne robast.
« Honte i avons, e il greignor;
« S’avons perdu, e il des lor ;
« S’avons damages, e il dueus;
« De nos se plaignent, e nos d'eus;
« Tort ont eü, e nos greignor :
« De ço se plaignent tuit li lor.
« Faisons en tant, jol lo e vueil,
« Que l'om nel nos tienge a orgueil
« E que nostre n’en seit li torz :
« Quant les avrons destruiz e morz,
« Toz nostre pris en iert doblez,
« Quant nostre torz n'i iert trovez;
« Mout nos sera bien eschaeit,
« Quant nos avrons victoire e dreit.
PageV01P327
« Cui l'om fait tort e il s'en venge,
« Iço li est doble loënge;
« Mais qui tort fait e honte e lait
« Senz ço que l’om l'ait a lui fait,
« S’il l'en meschiet, ja n'en iert plainz,
« Anceis en fait esjoïr mainz.
« Mandons Priant par noz messages,
« Par teus qui seient proz e sages,
« Que Heleine rendre nos face,
« O une chose de fi sace,
« S’il ne nos fait dreit del mesfait
« Que Paris a en Grece fait,
« Donc avra tort, nos avrons dreit :
« Ne puet estre destruiz ne seit ;
« Ja mais a nos ne la guarront.
« S’il la rendent e dreit nos font,
PageV01P328
« Qu'irions nos plus demandant?
« Buen torner s’en fereit a tant.
« Jo voudreie qu’a nostre honor
« Nos fussons ja mis el retor.
« A ma parole n'a mes diz
« Ne cuidez que seie guenchiz;
« Quar, ço sacheiz, tant en ferai,
« Ço cuit, ja blasmez n’en serai. »
En plusors sens i respondirent
Cil qui ceste parole oïrent.
Li un loënt bien l’enveier,
L'autre nel voustrent otreier.
Li un diënt mout a bien dit,
E de plusors fu contredit.
Que vos en fereie lonc plait?
Otreié ont qu’ensi seit fait.
Li messages fu enchargiez
A dous chevaliers mout preisiez :
Li uns ot non Diomedès,
E li autre fu Ulixès.
Por cest afaire bien fornir,
N’i poüssent meillors choisir.
PageV01P329
N'i ot rien plus del porloignier :
Cil s’alerent apareillier.
Mout se vestirent richement,
Quar, se li Livres ne me ment,
De dras de seie de colors
Ovrez a bestes e a flors,
D'or e de pieres esteiez,
Furent vestu e afublez
Ensi tres bel e si tres bien
Qu'il lor avint sor tote rien.
En lor chiés orent dous chapeaus
Faiz de la plume d’uns oiseaus
Qui conversent, ço dit l'Autor,
En Inde la Superior.
Soëf uelent, ços sai retraire,
E si n’est color que n’i paire :
Ceus portent por le chaut d’esté.
D'or furent bien esporoné.
Palefreiz orent genz e beaus,
Soëf amblanz, forz e isneaus ;
Merveilles erent bien taillié
PageV01P330
E de l’eire bien aaisié.
Ne neif ne cignes n’est si blans
Come il aveient toz les flans ;
Ferranz e bais e pomelez
Orent cous, cropes e costez.
Enselé furent gentement
E enfrené si richement
Que por mil besanz moneez
Ne fust li lorains achetez.
Cil monterent delivrement.
Dous vaslez meinent solement :
Ne voleient armes porter,
Quar teus poüssent encontrer
Qui ja a reison nes meïssent,
D’eus ocire ne se feinsissent.
Mais qui quis truisse ne qui non,
Ne lor dira rien se bien non.
Dreit a Troie tote l'estree
Chevauchierent la matinee.
N’ont nul reguart de destorbier:
PageV01P331
Rien ne doterent messagier.
Ainz que midis fust trespassé,
Furent venu a la cité.
Par mi les rues chevauchierent,
Tant com plus porent espleitierent ;
De maint furent le jor miré
E de maint furent esguardé.
Devant la sale aveit un pin
Dont les branches furent d'or fin
Tresgetees par artimaire,
Par nigromance e par gramaire.
Li pins fu faiz de tel semblance :
Poi esteit plus gros d'une lance,
Mais desus fu espés ramuz
E par mi la place estenduz.
Por ço qu'ensi grailes esteit
E par desus tel fais aveit,
Se sont li dui rei merveillié
Com ço pot estre apareillié :
PageV01P332
A grant richece l’ont tenu.
Des palefreiz sont descendu,
As dous vaslez les ont laissiez.
Par mi les degrez entailliez
Sont el palais dreit monté sus :
Mout i aveit contes e dus
E maint bon chevalier gentil.
Li reis Prianz e tuit si fil
Conseil preneient qu'il fereient
Des Greus, qui si les requereient.
A tant li dui message entrerent :
Contre eus li plusor se leverent.
Devant le rei sont aresté.
Ulixès a premiers parlé :
« Reis Prianz, ne te salu mie,
« Quar nostre gent t'est enemie :
« Assez i a eü de quei.
« Nos somes ça tramis a tei :
« Agamennon te mande e dit
« Que senz lonc terme e senz respit
« Rendes Heleine son seignor,
« E de la laide deshonor
« Que fist Paris en nostre terre
PageV01P333
« Te font par nos li Greu requerre.
« Fai vers eus tel adrecement
« Qu'il le prengent graantement.
« Tant a en eus sen e mesure,
« Se tu lor vueus faire dreiture,
« La dame rendes e l’aveir
« E faces dreit a lor voleir,
« Ço te mandent, qu’il le prendront
« E en lor terre s’en riront.
« N’avreiz ja puis de nos dotance :
« Seüre pais, ferme creance
« Vos tendrons mais d’ore en avant.
« N'aiez or mie sen d'enfant,
« Quar, se vos ço ne volez faire,
« Tel damage ne tel contraire
« N’avint onques come en iert fait;
« Jusqu'a mil anz sera retrait.
« Legierement puez adrecier
« Ço que tant te puet damagier :
« Le mal quin puet venir sor tei
« Puez or mieuz covrir o ton dei
« Que a brief terme o mil escuz.
« Se jo de ço ne suis creüz,
PageV01P334
« Ne t'en i vaudront mil que treis.
« Tot ton talent m'en di maneis;
« Conseille t’en e si respon,
« Quar a torner nos en avon. »
Prianz respondi al message :
« Vassaus, ne vos tieng mie a sage,
« Se vos cuidez que me honisse,
« Mien esciënt, tant com jo puisse :
« Honiz me sereie jo bien,
« Se de tot ço faiseie rien.
« S'il m'aveient en buies mis
« O en lor chartre set ans pris,
« Si ne me querreient il plus.
« Ne sui mie si al dejus
« Por quei jo face hontos plait :
« Ne vueil qu'a mes heirs seit retrait.
« Jo lor avreie dreit a querre :
« Primes destruistrent ceste terre ;
PageV01P335
« L’or e l'argent e la richeise
« En porterent. Mais plus me peise
« De ço qu’il m'ocistrent mon pere :
« Ne me remest soror ne frere,
« Ami, parent ne bien voillant.
« Ja n'avrai joie a mon vivant
« Desci qu’en aie restor pris :
« Jo m'en sui bien en mon dreit mis.
« Antenor i tramis l’autre an,
« Qu’il rendissent Esionan :
« Assez vilment me manacierent,
« Lui deboterent e chacierent.
« Ancor la tient en soignantage
« Cil qui l’en mena en servage.
« Ire e pesance en dei aveir :
« Ço puet il bien de fi saveir,
« N'en sera pais n’acorde quise
« Si en sera venjance prise.
« Or me ront ma terre eissilliee
« E ma gent morte e detrenchiee :
PageV01P336
« Après diënt que dreit lor face !
« Agamennon vueil que bien sace, —
« Dites li bien que jo li mant, —
« Tant com j’avrai non rei Priant,
« N'avra a mei triue ne pais.
« Iceste guerre durra mais :
« A toz les jorz que jo vivrai,
« Tot mon poëir en mostrerai.
« Ço sachent il de fi por veir,
« Que jo lor ferai a saveir
« Quel cuer jo ai, ne queus aiües
« Me sont dès un meis acreües,
« Près m’ont requis, mais se jo puis
« Ne se j'en ma terre les truis,
« Jo lor i cuit chalonge metre :
« Ço vueil je voër e prametre,
PageV01P337
« Qu'o eus n'avrei ja concordance
« Ne ferme pais ne bienestance,
« Tant come aie cent chevaliers ;
« E sos ne fusseiz messagiers,
« Trop vos esteüst malement.
« Alez vos en hastivement,
« Quar ja, tant com jo vos verrai,
« Hore senz ire ne serai. »
Diomedès prist a sozrire :
« Par Deu, » fait il, « ja mais senz ire
« Ne sereiz donc, s’ensi vos vait.
« Jusqu'a un meis orreiz tel plait,
« Veeir en porreiz cent miliers
« Toz adobez sor lor destriers :
« N'i a celui qui n'ait enseigne,
« Heaume e hauberc e entreseigne.
« Ja si forz lices n’i avreiz
« Qu’en poi d’ore ne guerpisseiz.
« Es murs de marbre e es portaus
PageV01P338
« Vos avront ues pierres e paus.
« Tant i verreiz des voz morir
« A l’assembler e al partir,
« Tant en verreiz o mortel plaie,
« Grant cuer avreiz, s’il ne s'esmaie.
« Quant ci avez de nos pesance,
« Qui n’i avons escu ne lance,
« Bien la devreiz donc aveir d’eus :
« Longement vos durra cist dueus. »
Grant tomoute sorst el palais
De ço qu’ot dit Diomedès.
Dui cent en saillirent en piez :
Ja fust toz morz e detranchiez,
Quant li reis se mist entredous,
Qui a grant peine l’a rescos.
« Tolez, » fait il, « nel faites mie.
« Se li musarz dist sa folie,
PageV01P339
« Ne devons mie nostre sen
« lci metre contre le suen:
« Conoistre puet om a ses diz
« Qu’il n'est mie de sen guarniz.
« N’en ma cort n'a reguart messages,
« Queus que il seit, o fous o sages :
« Ja n'en avrai jor retraçon.
« Por assez poi se honist om :
« Por mil mars d’or ne vueil jo mie
« Qu’uns d’eus i ait perdu la vie. »
Eneas sist delez le rei :
« Sire », fait il, « en meie fei,
« En toz lieus est droit jugement :
« « Qui dit que fous e que fous prent. »
PageV01P340
« E s’il vuelent dire que fous,
« Bien lor debate l'om les cous :
« La folie sor eus reverte,
« Sin aient mout bien lor deserte.
« Jo porreie ja ci tant dire
« Que vos me feriëz ocire
« O pendre o en un feu ardeir.
« Jo cuit or bien, al mien espeir,
« Que malement lor avendreit
« Se por vos non, e a bon dreit,
« Qui ci vos vienent ramponer:
« N’est mie biens de l’escouter.
« Tiengent lor veie, jol lo bien,
« Quar ci ne guaaigneront rien. »
Diomedès Ii respondi :
« Sire, » fait il, « vostre merci.
« Conter savez e mieuz jugier ;
PageV01P341
« Ci nos porreiz aveir mestier.
« Bien entendons a vostre conte
« Que, qui nos voudreit faire honte,
« De neient nos en pesereit :
« Or sacheiz bien, coment qu’il seit,
« Ne vos mesconostrai mais mie,
« Onques de rien n'oi tel envie
« Com j’avreie de vos trover
« Ou vos poüsse merciër
« De tant bel dit e de tant bon.
« Mout avez trait vilain sermon,
« E en maint lieu sera retrait :
« Mais s'eissir osiëz al plait
« Ou tant avra escuz e lances,
« Chevaus, haubers e conoissances
« E chevaliers de tante terre,
« Se lors voliëz pris conquerre,
PageV01P342
« Sacheiz grant l'avriëz conquis,
« Se me rendiëz mort o pris.
« La me cuit acointier a vos :
« Se n'en avez l’eaume terros,
« Ja puis armes ne porterai
« N'en grant estor ne me verrai.
« Ha ! quel vassal e quel baron !
« Quin avreit treis en sa meison
« Tant par se porreit faire liez :
« Ja ne sereit desconseilliez
« De faire tost un hontos plait. »
Fait Ulixès : « Dès ore est lait;
« Vilanie est : remaigne a tant.
« Sire, » fait il al rei Priant,
« Vostre respons ai bien oï,
« Ne l'aide rien mis en obli :
« Bien le savrai as noz retraire.
« Dès or nos metrons el repaire, »
Mout engrossoënt les paroles :
Sempres en i eüst de foles,
PageV01P343
Quant Ulixès s’en est partiz.
Jus avalent les ars voutiz;
En lor palefreiz sont monté,
Puis chevauchent par la cité.
Totes les rues trespasserent,
Mainte richece i esguarderent,
Maint riche ostel e maint vassal,
Maint chevalier e maint cheval,
Maint bon borgeis, maint marcheant,
Maint orgoillos e maint preisant.
Quant fors furent, si espleitierent,
Lor ambleüres engrossierent.
Tant ont erré e chevauchié
Qu'en l’ost des Greus sont repairié.
Al tref Agamennon alerent :
Onc ainz lor regnes ne tirerent ;
Des palefreiz sont descendu.
La sont tuit li prince venu,
PageV01P344
Li rei, li conte o les barons,
Quar oïr vuelent le respons.
Li message lor ont retrait
Ensi come il l’aveient fait,
Tot lor venir, tot lor aler,
Les respons d'eus e le parler :
N’i ot parole en la cort dite
Une sole grant ne petite
Qu’il ne lor aient reconté.
Après sont as osteus alé,
E si donc fu prez li mangiers :
Il s’i asistrent volentiers.
# | EXPÉDITION D'ACHILLE EN MYSIE
Agamennon e li baron
Furent dedenz son paveillon,
Ou assez ot or Espaneis
E bons pailes riches e freis.
PageV01P345
En plusors sens ont pris conseiz,
Mais tairai m'en a ceste feiz :
N’est mie lieus de tot retraire,
E j'ai avant assez a faire.
Mais ci porreiz oïr après
Com faitement danz Achillès
Ala en Mese porchacier
De quei l’ost eüst a mangier.
La l’orent Ii prince tramis :
Il ne s’en fist de rien eschis.
O lui ala dus Telephus
E chevalier dis mile e plus.
Ço dit e reconte Darès,
Telephus fu fiz Herculès.
En Mese alerent, ço vos dis,
Ou mout aveit riche païs
E planteïf e asazé,
PageV01P346
De bataille tot conreé.
Il le troverent dur e fort,
Mainz chevaliers i reçut mort,
Quar Teütrans, quin esteit reis,
Se combati o les Grezeis :
Defendre lor voleit sa terre.
Nes ala mie trop loing querre,
Mais o la gent qu’il pot joster
S’ala sempres o eus mesler.
De maintenant s’entreferirent,
Mainte colee i departirent :
Ne s'entrespargnierent de rien.
Cil de Mese le firent bien,
Lor cors e lor païs defendent :
Ço sacheiz bien que chier se vendent;
E se ne fust une aventure
Que trop lor avint pesme e dure,
Greu fussent desconfit le jor.
Mais Achillès en mi l'estor
Conut le rei : ferir le vait,
Si que mortel plaie li fait :
PageV01P347
A denz chaï en mi la place.
L'eaume de son chief li deslace :
Sempres eüst le chief trenchié,
Mais Telephus li a preié
Que il eüst de lui merci ;
De son escu bien le covri.
Achillès demande por quei :
« Bien a, » fait il, « dis anz, ço crei,
« Qu’en cest païs me herberja,
« A merveilles m'i honora ;
« Mout se pena de mei servir,
« Por ço nel puis veeir morir. »
Achillès mout joiosement
Li dit qu'en face son talent.
Cil de Mese furent vencu,
Qui lor seignor orent perdu :
Onc puis ne pristrent d’eus retor,
Ne plus ne maintindrent l’estor.
Li Greu cerchierent le païs :
Assez i ot robé e pris ;
Onques ne fu tel manantie
Ne si faite preie acoillie
PageV01P348
Come chascuns en meine e prent.
Li reis fu navrez mortelment ;
Sot qu’a morir l’en estoveit
Ne par el passer n'en poëit :
De Telephus voust son heir faire,
Quar mout sot bien dire e retraire
Que sis pere li ot rendue
Sa terre, qu'il aveit perdue :
« Uns reis, » fait il, « me guerreot,
« Qui deseriter me cuidot.
« Mais Herculès me vint aidier
« La ou j’en oi greignor mestier;
« Le rei ocist e detrencha
« E ma terre me delivra,
« Tote la me rendi en pais.
« Por ço la te guerpis e lais,
« Mon heir te faz, rei e seignor
« E de la terre e de l’onor :
« Mener en porras grant richeise
« De ma mort vei que il te peise :
« Grant gré t'en sai. Sevelis mei
« Ensi com l'om deit faire rei;
« Fai mei faire ma sepouture
PageV01P349
« E mon service e ma dreiture.
« Guarde la terre, aime la gent :
« Ne lor faire destruiement.
« De bon pere seies bons fiz. »
A cez paroles est feniz.
Sevelir Ie fait Telephus
Si richement come il pot plus :
En un sarqueil l’ont embasmé
De vert marbre menu goté.
Quant sis osseques fu feniz,
De la tombe sont toz partiz.
Ses homages a puis toz pris
Des nobles homes del païs ;
Les fortereces fist guarnir,
Tot le regne ot a son plaisir.
Quant ço fu fait, sempres après,
Se mist el repaire Achillès.
Telephus li fait grant preiere
Qu’en l'ost l’en laist torner ariere:
« Ço vueut faire que cil feront
PageV01P350
Qui al grant siege a Troie iront,
E si sera as granz torneiz
Qu'il lor tendront par plusors feiz. »
Mais Achillès li dit e prie
Que il d’iço ne parout mie :
« Vos remandreiz, que bosoinz est.
« De nos socorre seiez prest :
« Faire nos poëz grant aiüe.
« Guardez que l’ost seit socorue
« De vin, de blé, d’uile, de char ;
« Si nel tenez mie a eschar
« Ne en obli, quar mal sereit
« E laiz blasmes vos en vendreit. »
Remés est cil a quel que peine.
Ainz que trespassast la semaine,
Fu Achillès en l'ost ariere.
Mout li ont fait joiose chiere,
Quar mout a l'ost enmanantie
E de vitaille replenie.
Agamennon e Menelaus,
PageV01P351
Nestor li vieuz e Aïaus,
E des autres trei cent e plus,
Reis e contes, princes e dus,
Sont dreit a la tente venu
Ou Achillès ert descendu.
Chascuns d'eus l’est alez baisier :
Grant joie en font, quar mout l'ont chier.
Conté lor a com faitement
Se combati e o quel gent,
Com li reis fu morz e conquis,
E Telephus ot le païs
E tot le regne quitement,
Reis en est riches poissantment :
« Del blé, del vivre del païs
« Nos socorra, ço m’a pramis. »
Tuit ensemble l'ont merciié,
Diënt mout a bien espleitié
E bele chevauchiee faite :
Quant a Troie sera retraite,
Pesera lor, si deit il faire.
PageV01P352
# | DÉNOMBREMENT DES ALLIÉS DE PRIAM
Ici me covient a retraire, —
Anceis que jo trespas avant,
Dreiz est e biens que jol recant, —
Queus aïdes ot Priamus,
Queus reis, queus princes e queus dus
E queus contes e queus barons :
Oïr porreiz d’auquanz les nons
Qui la riche cité guarnirent
E qui lonc tens se defendirent.
De Sezile i vint Pandarus,
Ampon li vieuz e Adrastus.
PageV01P353
Gent amenerent merveillose
E hardie e chevalerose :
De riches armes bien armé,
Icist defendront la cité
Encontre ceus qui l’ont asise,
Qu'el ne seit arse ne maumise.
De Colophon, une contree
Que de mer est avironee,
I vint Caras e Masius,
Nesteus li forz e Phimacus.
Icist erent tuit quatre rei,
E chascun amena o sei
Gent merveillose e bien armee
E por bataille conreee :
Cist defendront l'onor Priant,
E por lui trairont maint ahant.
PageV01P354
De Lice i vint li vieuz Glaucon
E sis fiz o lui Sarpedon.
Cist dui i ont gent amenee,
Trei mile e plus de lor contree :
Por ço i vindrent o tel gent
Qu’al rei de Troie erent parent.
Icist ferront de granz colees
E soferront les granz meslees,
Ainz que Greu aient Troie prise
Ne par force la gent conquise.
E de Licoine, que tant vaut,
Vint Eüfemes l’amiraut.
Mil chevaliers proz e hardiz,
De totes armes bien guarniz,
I amena en son conrei :
Icist maintendront le tornei ;
PageV01P355
Cist feront mainte riche eissue,
Ainz que la vile seit rendue.
Hupoz li granz e Cupesus,
Qui de Larise esteient dus,
N’i vindrent mie povrement.
Cil d'eus qui meins amena gent
En pot aveir set cenz de taus
Qui proz esteient e vassaus
E desirant d'armes porter :
Mout voudront cist ainz endurer
Granz sofraites e granz mautraiz
Que ja Greu aient Troie en paiz.
Li reis Remus de Cisonie
I vint o gente compaignie.
Set contes ot e quatre dus
E chevaliers set mile e plus :
Si lige home erent natural;
PageV01P356
N'i ot un sol n'eüst cheval,
O deus o treis o quatre o sis,
Toz milsoudors e toz de pris.
Armes ont fresches e noveles,
Heaumes, haubers, escuz e seles
Totes d’un teint, d’une color,
Qu'ensi plaiseit a lor seignor,
Por ço qu’il s'entreconeüssent
Es granz batailles ou il fussent,
E que il fust dit e retrait,
Saveir come il l’avreient fait.
Cist briseront ainz mainte lance
E feront mainte desevrance
D'ames de cors, que la cité
Seit ja prise par poësté.
De Trace, une terre pleniere,
Ou la gent est hardie e fiere
PageV01P357
E aduree e combatant
Plus qu’autre gent que seit vivant,
I vint Pileus e Acamus :
Li uns ert reis, li autre dus ;
Si vos di bien qu'en ambedous
Aveit chevaliers merveillos.
Dous mile e cent vassaus Traceis
Amenerent contre Grezeis :
Mout en soferront ainz grant peine
Que la cité seit lor demeine,
E de granz batailles champaus
E forz estors durs e mortaus.
E de Peoine, une contree
Ou mainte merveille a trovee, —
PageV01P358
Quar es forez e es montaignes,
Dont mout i a plus que des plaignes,
Veit l’om foiez e satereaus,
Bestes sauvages e oiseaus
De mil manieres e de plus, —
Li reis quin ert Pretemesus
E Steropeus, uns suens cosins, —
Andui erent jovnes meschins,
Genz, beaus e proz e enseigniez
E en toz lieus bien afaitiez, —
Mil chevaliers i amenerent
Qui onques lances n'i porterent,
PageV01P359
Mais darz trenchanz de fin acier
E granz ascones por lancier,
Forz ars turqueis : gent desarmee
Ne puet aveir a cez duree.
Cist navreront maint chevalier
E ociront maint bon destrier, —
De cel vos sui jo bien devin, —
Ainz que del siege seit la fin.
De Frise i revint Antipus
E Mercerès e Thalamus :
Cist n’erent mie chastelain
Ne vavassor de basse main,
Ainz erent riche rei poissant,
Fort e hardi e combatant.
PageV01P360
Cist amenerent teus maisniees
Qui gent furent apareilliees:
Chascuns en a en sa compaigne
Set cenz : n'i a cel n'ait enseigne,
Heaume d’acier resplendissant
E espee buene e trenchant.
De Boëce i vint Asimas,
Fortis li proz e Sanias.
Conte esteient icist tuit trei,
Mais ne se porterent onc fei :
Toz jorz s'esteient guerreié
Mais or s’esteient apaié
Por guarnir Troie encontre Greus.
Mil chevaliers aduistrent teus,
N’i a un sol qui a tornei
Face ja mauvestié de sei :
PageV01P361
Icist feront de teus eissues
Dont i seront paumes batues,
E del grant regne de Botine,
Terre sauvage outremarine,
Vint Boëtès e Epistroz
O chevaliers set cenz de proz :
Frere esteient icist germain.
Onc en lor terre n'ot fait pain :
Especes buenes e peissons,
Fruiz precios e veneisons
Aveient a mangier apris.
Chascuns aveit cheval de pris,
Espié trenchant, escu e broigne :
Mout avront ainz cist grant essoigne
Que la vile guerpissent mais.
PageV01P362
Jusque de la guerre seit pais.
De Paflagoine, une contree
Que assez est poi renomee, —
Quar si est loinz vers le soleil
Qu'a grant maniere me merveil
Com faitement l’om i ireit
Ne coment rien ça en vendreit, —
Merveille fu e iert toz dis
Coment en vint Philemenis.
C'ert li sire de Paflagoine,
Mais ne cuit pas que soz le troine
Eüst dous chevaliers si granz :
Por poi ne resemblot jaianz.
PageV01P363
Mout esteit forz e vertuos
Fel e hardiz e corajos.
Ne sai mie coment il sot
Le siege qui a Troie alot :
Venir i voust, toz dessemons,
Bien o dous mile compaignons;
E si en traistrent mout granz peines
Dis meis entiers e treis semaines.
Ains qu’a Troie fussent venu,
Ot il de sa gent mout perdu,
Quar assez en teus lieus veneient
Ou por un poi ne perisseient.
Merveille fu com s’i esmurent :
Ja en nul sen venir n'i durent.
Philemenis e sa compaigne,
Que mout par ert fiere e grifaigne,
Vindrent a Troie por defendre
Que Greu ne la poüssent prendre.
PageV01P364
Armé erent en autre sen
Que n'esteient li Troïen :
De cuir boilli escuz aveient
Qui de fin or resplendisseient;
Mieuz en preisot l’om le peior
Que de Troie tot le meillor,
Quar de pierres de Paradis,
D'Eüfratès e de Tigris
Esteient tuit orlé e plein,
E ensement tuit li lorain.
De porpre aveient conoissances
E granz enseignes en lor lances.
Cist feront d’eus sovent parler
Al torneier e al joster :
Por paor ne por coardie
PageV01P365
N'iert ja par eus Troie guerpie.
N’i revint mie de trop près
D'Ethiope li reis Sersès,
Ne Mennon, li fiz sa soror,
Qui mout esteit de grant valor
E riches chevaliers assez,
Quar sire fu de dis citez.
Sersès i vint mout richement
E o noble contenement.
A venir mist set meis e plus :
Mout amena contes e dus
E chevaliers e autre gent,
Mais onques peiz ne arrement
Ne fu si tres neir come il erent.
Estranges chevaus amenerent.
Ne saveient armes porter,
Mais de traire ne de berser
Ne sot onc rien gent avers eus :
PageV01P366
Mout esteient hardiz e feus.
Icist feront de Greus essart,
Quar lor saietes e lor dart
Sont entoschié : ja n'en guarra
Nus hom qui navrez en sera.
De Therace i vint Heseüs,
II e sis fiz Archilogus.
Al rei de Troie erent parent
E si ami de longement;
Fort home erent cist e gentil.
Chevaliers orent plus de mil,
De teus qui ja ne feront faille
En fort estor ne en bataille :
Icist socorront lor parenz
E aideront a ceus dedenz.
D’Agreste, une isle en mer lontaigne.
PageV01P367
Dont la gent est fiere e grifaigne,
Vint reis Fion e reis Edras,
Qui n’amenerent mie eschars
De chevaliers ne de serjanz :
As Troïens seront aidanz ;
Mout en despendront ainz del lor
Que Greu n'en aient le meillor
Del reiaume d'Alizonie,
Qui vers terre est de Femenie,
Ou Ies chieres especes sont
Que l’om porte par tot le mont,
Vint Pistropleus, uns reis veillarz,
Qui mout ert sages des set arz :
Mainte merveille saveit faire.
Cist amena un Saietaire,
PageV01P368
Dont en l’ost fu grant reparlance
E dont Greu orent grant dotance :
Mout i orent pesme enemi,
Tant dementres come il vesqui ;
Mais ne dura pas longement,
Assez orreiz avant coment.
Tuit icist que jos ai nomé
Vindrent a Troie la cité.
Dedenz se mistrent li plusor
Por los, por pris e por amor,
E li auquant por seignorage,
E li autre por parentage :
Dès que Deus voust le mont former,
N’oï onques nus hom parler
Qu’ensi faite chevalerie
Eüst nule cité guarnie.
A trente e treis furent nombré
PageV01P369
Icist que jos ai ci nomé,
Dont li plus povre ert reis o dus
De mil chevaliers e de plus.
De toz ceus qui a Troie vindrent
E qui contre Grezeis la tindrent
Fu Hector sire : al suen plaisir
Les i covint toz obeïr;
De toz i ot la seignorie,
La poësté e la maistrie.
Paris sis frere e Troïlus,
E ensement Deïphebus,
Antenor e Polidamas,
E autresi danz Eneas,
Chascuns d'icez tel gent aveit,
Dont chascuns guarde se preneit ;
Chascuns aveit une partie
De ceus defors en sa baillie.
PageV01P370
Si esteit fait e ordené,
E si l’aveient devisé,
Que ja chevaliers ne montast,
Se lor princes nel comandast ;
Ja fors des murs nus n’en eissist
Desci qu’a l’ore qu’il vousist.
Bien les covint a jostisier,
Qu’orgueil i aveit grant e fier :
Trop folement se contenissent,
S’al jostisier ne s’atendissent.
Ensi firent, ço puis retraire,
Come onques mieuz le porent faire :
De ceus n’aveient esperance,
Paor ne crieme ne dotance
Qu’il as murs fussent asailli.
Por ço ne fu mie establi
Qeus defenses li rei avreient
Ne en quel lieu se defendreient :
PageV01P371
N'en orent onques grant bosoing,
Toz jorz en fu l’oz auques Ioing.
# | ARRIVÉE DE PALAMÈDE
Li Greu, ensi com nos lison,
Erent ancore a Tenedon :
Ainz fu Palamedès venuz
Que nus s’en fust d’iluec meüz.
Trente nes amena chargiees
De chevaliers e de maisniees.
En tote l’ost, si com jo cui,
N’aveit pas treis meillors de lui,
Plus sages ne plus engeignos,
Plus hardiz ne plus corajos.
Blasme aveit grant qu’il n’ert venuz,
Mais il s'en est bien defenduz:
Dist « qu’il aveit grant mal eü,
Dont il aveit longes geü ;
Ne pot a Athenes venir,
Mais si tost come il pot guarir,
PageV01P372
Ensi tost mut a son poëir.
Ne l’en deivent mal gré saveir :
Mout ot grant joie e mout li plot
Quant guariz fu, que venir pot. »
Tuit furent lié de sa venue,
Mout grant merci l'en ont rendue;
Diënt qu’il seit a lor segreiz
E a doner les hauz conseiz.
# | PREMIÈRE RENCONTRE; MORT DE PROTÉSILAS
Assez aveient engeignié
E par plusors feiz porchacié
D’aler de nuit Troie aseeir,
Mais onques aise ne poëir
N’en poëient aveir eüe.
PageV01P373
Mout en cremeient la venue,
Quar ne poëient eschiver
Qu’es nes nes covenist entrer
Por la vile plus aproismier ;
E si ne lor ert pas legier
Des porz ne de la terre prendre
Sor ceus qui la vuelent defendre.
D’eissir des nes ert la dotance :
Mout i cremeient meschaance.
Lonc tens en aveient doté
E maint conseil pris e doné:
A un jor li baron josterent
Por cest afaire dont parlerent.
Ne puis tot dire ne retraire
Ço que chascuns en loë a faire;
Mais ço qu’en dist Palamedès
Porreiz oïr ici après.
Sa parole fu bien oïe,
PageV01P374
Quar en son sen chascuns se fie :
« Seignor, » fait il, « grant deshonor
« Poëz aveir en cest sojor.
« Bien a, ço cuit, un an passé
« Que ici estes arivé :
« Ancor n'avez Troie veüe.
« Assez i a puis gent venue,
« Qui contre vos la defendront
« Tant come il plus soz ciel porront.
« Barres e lices e fossez
« Pueent puis aveir fait assez :
« Grant leisir ont d’eus enforcier
« E d’ajutoire porchacier.
« Avis lor est, si est semblant,
« Que nos n’osons aler avant.
« Cuideriëz les vos sorprendre ?
« A ço ne vos chaut a entendre,
« Quar ja nul jor nes aserreiz
« Desci qu’a eus vos combatreiz :
« A ço ne poëz pas faillir,
« Que que en seit a avenir.
PageV01P375
« De tant com plus lor targereiz,
« Vostre grant damage fereiz ;
« Mout vos doteient plus anceis
« Que il ne feront mais des meis.
« Qui sot or tel conseil doner
« Ques laississeiz aseürer
« E enforcier e querre aïe ?
« Se fust alee la navie
« A la vile tot dreitement,
« N'eüst mie, mien esciënt,
« Grant contredit a l’ariver.
« A ço ne sai conseil doner,
« Mais le matin, sans plus targier,
« Faisons noz nes apareillier.
« Quant les avrons achastelees
« E por bataille conreees,
« E nos serons tres bien armé,
« Si corrons dreit a la cité,
« Ensemble o eus nos combatrons :
« Ne sai por quei le targissons.
« Que qu’en vienge, mal ne contraire,
PageV01P376
« Iço nos en covient a faire :
« Se par force ne sont conquis,
« Ja autrement ne seront pris.
« Alons, chaeles ! si faisons
« Ço que nos a faire en avons.
« Se nos avions prise Troie,
« N’i a un sol qui de grant joie
« Ne s’en tornast en son païs.
« N'i ait ore autre conseil pris,
« Mais faites en mon loëment :
« Matin, senz nul porloignement,
« Seit ceste uevre si envaïe,
« Qui que en plort ne qui qu'en rie,
« Que par force e par estoveir
« Poissons la cité aseeir ».
Tuit otreient senz contredit
Icest conseil, grant e petit.
La nuit laissierent trespasser,
Mais l’endemain, quant jor fu cler,
Anceis que levast li soleuz,
PageV01P377
Orent toz faiz lor apareuz.
Les chasteaus ont es nes dreciez,
Guarniz de lances e d’espiez :
Onques gent si ne s'atorna
Ne si bel ne s'apareilla.
Des nes ont fait lor establies
E lor conreiz e lor parties ;
Porveü ont e ordené
E establi e devisé
Les queus ireient premeraines,
Les queus après, queus dereraines.
El front devant en metent cent,
Les veiles dreciees al vent
Faites de porpre e de cendaus
E de pailes emperiaus :
Mil enseignes i ot dreciees,
Que al vent furent despleiees.
Mout par ont les borz bien guarniz
De darz, d'escuz, d'espiez forbiz,
PageV01P378
De haches danesches, d’espees
E de gisarmes acerees;
E qui si faite uevre esguardot,
Fiere merveille li semblot,
Après cez cent en revont cent,
Les veiles dreciees al vent.
Donc siglerent les granz compaignes,
Ou tant par ot mars e enseignes.
Granz quinze liues d’un tenant,
Ne pareit mer ne tant ne quant.
A la vile corent tot dreit
Veiles levees, a espleit.
S’il truevent qui lor viet les porz,
Ja n'i avra si grant esforz
En ceus de la ne tel poëir,
Ainz que vienge demain al seir,
En i avra mil arivees ;
Mais ainz seront chier comparees,
Quar ço reconte li Escriz,
PageV01P379
Dès que li monz fu establiz,
Ne fu porz pris a tel meschief :
Le jor i perdi mainz le chief.
Quant cil de Troie les choisirent,
Comunaument contre eus eissirent,
A qui ainz ainz, senz nul conrei :
Nus n’i atent prince ne rei,
Per ne seignor ne compaignon.
Sor la marine el bel sablon
Sont assemblé e acoru :
Ja i avra maint coup feru.
Cil des nes virent bien e sorent
Qu'autre conseil aveir ne porent
Ne mais de laissier corre a terre :
Par force lor covient conquerre.
Lor enemi sont tuit guarni,
Dont ja seront bien recoilli.
Chascuns s'arma come il mieuz pot
De teles armes come il ot.
N'i ot si pro qui ne dotast
E cui corages ne muast.
PageV01P380
Proteselaus vint premerains,
Hardiz e proz e segurains :
De Pilache ert cist reis preisiez,
O les cent nes vint eslaissiez.
Forz fu li venz qui les nes meine :
Auques a sec en mi l'areine
Les fait ferir veiles levees,
Peceiees e dequassees.
De teus en ot iluec neiez
Qui assez esteient preisiez,
E si come il des nes eisseient,
Li Troïen les recoilleient,
Quin faiseient mout grant martire :
PageV01P381
Mout se penoënt d'eus ocire.
Nule rien ne porreit conter
Le duel qui fu a l’ariver
Ne le martire ne l’ocise ;
Quar farine que l'om tamise
Ne chiet ensi menuëment,
Ne pluie ne graisle par vent,
Com font saietes barbelees,
Dart e engeignes empenees.
D'espees fierent maintenant :
N'i cuide rien aveir guarant.
Les cent nes esteient vencues,
Que a la terre erent venues.
N'aveient mais defension:
Set cenz en gist par le sablon,
Qui ja mais Troie n'asaudront.
Donc revindrent les cent d’un front:
PageV01P382
Eslaissiees e abrivees,
Corent as porz veiles levees.
Grant noise meinent e granz criz :
La fu dotanz li plus hardiz.
Quant les veiles furent baissiees
E les nes furent essaiviees,
Cil de Troie les asaillirent,
Qui l’eissue lor defendirent.
Cil des nes orent arbalestes
Trei mile e plus, a traire prestes.
A l'espesse traistrent des lor :
Mil en i perdent la color,
Freit e pasmé chieent a denz.
Lors branlerent icil dedenz :
A tant s’en eissi grant partie,
Qui as autres feront aïe;
Ensemble sont serré e trait.
Proteselaus l’ot mout bien fait :
Mout ot sa gent bien socorue
PageV01P383
O la tranchant espee nue ;
Mout lor en i ocist le jor
E mout lor rendi dur estor.
Se sis cors ne fust solement,
Livré fussent tuit a torment :
Ja uns n'en remansist en vie.
Troïen font une envaïe:
Ja i avra trop lait damage.
Cil qui furent sor le rivage
Ne porent endurer tanz cous,
Ne il n'osent torner les dos ;
II ne sevent quel part foïr,
E grant meschief a al sofrir
A set mile homes cent miliers.
Si comença li estors fiers :
Onc si pesmes ne si morteus
Ne pot veeir nus hom charneus.
PageV01P384
O granz haches trenchanz e lees
Se porfendent jusqu'as corees ;
Mort chaeient espessement.
Tuit li rivage en sont sanglent :
Del sanc i aveit granz ruisseaus
De ceus qui muerent a tropeaus.
Cil de Grece se defendeient,
Quar aillors guarir ne saveient :
Mieuz vuelent a terre morir
Qu’en la mer neier e perir.
De totes parz erent enclos.
Grant peril a de tres lor dos :
Grant noise i demeinent les ondes,
Que de la mer vienent parfondes;
Mout sont orribles e dotanz.
Devant eus rest li periz granz,
Quar tant i a des Troïens
Qu'ocis en ont en poi de tens
La siste part e plus assez.
Reüsant les ont amenez;
Par estoveir jusqu'a la mer :
Lors en i covint maint entrer
PageV01P385
Plus parfont que jusqu'as aisseles.
A mainz traïnent les boëles.
La ot grant desbaretement :
Se ço lor durast longement,
N'en eschapast ne laiz ne beaus,
Mais cil qui erent es chasteaus
Qui par les nes erent drecié
Ont ensemble trait e lancié :
Par force les font traire en sus,
Des lor i laissent mil e plus.
A tant ariva Archelaus
E Prothenor o lor vassaus
Veiles levees ont port pris,
Peist o place lor enemis.
De lor cinquante nes guarnies
S'en eissirent les compaignies,
Armé por defendre lor cors;
Mais ainz qu'il fussent as chans fors,
Les orent Troïen gregiez,
Ocis e morz e detrenchiez.
PageV01P386
Mais dès qu’il se furent josté
E o les autres assemblé,
Si lor retindrent la meslee,
Tant que la gent fu arivee
Que Nestor amena o sei,
Qui de Pile esteit sire e rei.
O seisante nes eschipees,
Vindrent as porz veiles levees :
Mout lor est tart que josté seient
Avuec ceus cui combatre veient.
Grant presse ot a l’eissir des nes :
Poi en i a dedenz remés :
Grant desirier ont de combatre.
Qui lores les veïst embatre.
Es greignors presses que il truevent !
Tote la terre des morz cuevrent,
PageV01P387
Tot detrenchent quant qu’il ataignent;
De l'ariver pas ne se feignent.
Archelaus est en mi l’estor,
Qui grant damage fait des lor :
Com bons chevaliers s'i aiüe
O la trenchant espee nue.
Prothenor est de l'autre part,
Fiers e hardiz plus d'un liepart;
Ne dote coup ne mortel plaie,
Troïens de rien ne manaie :
Entre eus s’embat, fiert les sovent.
Mout li rociënt de sa gent.
Reis Ascaloz, reis Almenus
De l’ariver ne targent plus :
O trente nes ont terre prise,
E si sacheiz bien senz devise
PageV01P388
Qu’eissu s’en sont senz demorance.
Mout ont grant duel e grant pesance
De ço qu’il ont tant demoré;
Le petit pas, estreit serré,
Sont venu dreit al chapleïz.
Sans i mua as plus hardiz.
Trei mile sont novel e freis :
O l’autre aïde des Grezeis,
Ont Troïens fait remuër;
Mais chier le durent comparer,
Quar cil sont recovré sor eus,
Qui mout lor sont crueus e feus.
Desci qu’as nes les ramenerent,
Onc jusqu’a la mer n’aresterent :
S’il trovassent large charriere,
Ja mais n’en tornast uns ariere.
Por la presse, que si fu granz,
PageV01P389
Jo ne sai mie queus ne quanz
En i neia, ne pot autre estre :
Li plus hardiz n'i vousist estre.
Trop lor alot ja malement,
Quant Ulixès vint o sa gent :
Des cinquante nes qu'il ameine
Traist sa gent fors en mi l’areine.
Mout furent lor cors bien armé,
Mais de ço furent maumené,
Qu’as autres ne porent vertir :
Bien vos puis dire senz mentir,
Vint mile e plus ot entredous
D’eus destruire toz desiros.
Contre eus guenchissent a eslais.
Cist i sofrirent trop grant fais,
Quar, ainz qu'il eüssent aïe,
Fu lor force mout afeblie.
Mais ne por quant bon seignor ont,
Qui les chadele e les somont
PageV01P390
E les defent a son poëir :
Mout en devra grant pris aveir,
Se il vis en puet eschaper.
Philemenis d'outre la mer
L’arguë mout de grant maniere :
Ne laissera qu’il nel requiere.
A cheval fu e cil a pié,
Mais a dous mains tint son espié.
Philemenis le vait ferir :
Mout l’a ataint de grant aïr ;
Par mi l’escu peint a lion
Li a passé son confanon ;
Le bon hauberc li a fausé,
Por poi que ne l’a mort geté.
Ne pot le grant coup endurer :
A terre l'a fait enverser,
Mais maintenant en piez sailli.
Lancié li a l’espié forbi :
Par sus la pene de l’escu
Li a l’auberc tot derompu;
El col le fiert soz le menton,
Ne sai s'il en vivra o non.
Toz fu sempres ensanglentez,
PageV01P391
De l'angoisse chaï pasmez.
Mout en fu sa gent esbahie :
Chascuns en plore e brait e crie.
Del cors n’i vuelent laissier mie,
Ne lor chaut mais qui les ocie ;
Plorent, criënt, grant noise font,
Plusor de duel neier se vont,
Qui cuidoënt que il fust morz.
Auques l'ont esloignié des porz ;
Sor son escu l'en ont porté
Tot dreitement en la cité.
De lor gent orent mout perdu,
Ainz que del champ fussent eissu.
Ulixès fu sor la marine,
Mais, se ne fust tel la destine
Que avint de Philemenis,
Tuit fussent sempres mort e pris.
Entre tant dis fu arivez
Thoas li proz, li alosez,
Telamonius Aïaus,
Agamennon e Menelaus.
PageV01P392
Cil furent as porz essaivié,
Qu’il n'ot a eus trait ne lancié,
Quar li autre les defendeient,
Qu'o Troïens se combateient.
Des nes traistrent fors les chevaus
Coverz de porpre e de cendaus,
Sors e baucenz e pomelez,
Ferranz oscurs, destre comez.
Bien s’armerent de conoissances,
Lacent enseignes en lor lances,
Sor les haubers vestent bliauz.
Beaus fu li jorz, leva li chauz,
E li escu teint d'or vermeil
Resplendissent contrel soleil.
E quant lor gent fu ordenee,
N'i ot onc puis regne tiree :
Les escuz pris, lances baissiees,
PageV01P393
Lor vont rescorre lor maisniees.
Cil qui par ire se requierent
Par mi les escuz s'entrefierent.
Brisent lances, volent asteles
E chevalier guerpissent seles ;
Traient espees, chaplent fort :
Tant i ot d’eus navrez a mort,
Nus nel sot dire ne esmer.
La oïsseiz hauz criz criër :
Qui la mort sent, cui l’om mahaigne,
Ne puet muër ne braie e plaigne.
Proteselaus se traist ariere :
Mout l'ot bien fait de grant maniere ;
Trop ot sofert e pris colees,
Maintes en rot as lor donees.
Sa gent vit morte environ sei
Lez le rivage, el sablonei :
Mout l'en pesa, si dut il faire ;
PageV01P394
Mais n'ert iluec lieus de duel faire,
Entre tant dis que ço fu fait,
Furent des nes li cheval trait.
O tant de gent come il en ot,
Que de neient aidier se pot,
Monte por son duel esclairier
E por sa maisniee vengier,
Tel mil le sivent en l’estor,
Qui assez ont pris e valor :
N'i a cel n'ait cheval corant,
Heaume e escu resplendissant,
Hauberc e lance e bone espee.
Poignant vienent a la meslee ;
D’ire e de mautalent espris,
Vont encontre lor enemis,
Mais n’alerent mie le pas:
La ou virent le greignor tas,
Lor laissierent chevaus aler.
La oïsseiz un hu lever
PageV01P395
E une noise e uns teus criz,
E crois de lances e d’escliz.
Froissent escuz, fausent haubers ;
La chieent chevalier envers
Morz e navrez, pales e freiz.
Grant fu la noise e li trepeiz :
Trenchanz espees resortissent
Sor les heaumes qui resplendissent.
Bien ont resvigorez les lor.
Li reis Sersès vint en l'estor :
Teus set mile homes meine o sei,
Chascuns l’ama e porta fei.
Mout fu li reis proz e hardiz,
E si ot chevaliers esliz :
En tote l'ost n’ot tel compaigne,
Si hardie ne si grifaigne.
Chevaus de pris ont arabeis
PageV01P396
E saietes e ars turqueis.
Le petit pas, estreit serré,
S’en eissirent de la cité.
Chascuns porta son arc tendu,
E quant il furent la venu,
Si poinstrent tuit e s’escriërent
Que tuit li val en resonerent.
La ot si faite traierece
E de cordes tel croisserece,
E tel ocise e tel damage
De ceus qui sont sor le rivage,
Mil en abatent a cel poindre,
Cui puis ne prist talent de joindre.
Nel porent li Grezeis sofrir :
Vers la mer pristrent a foïr
Tuit desconfit, senz retor prendre.
Ne se poëient mais defendre :
Fiert s’en en mer set cenz e mais.
Se lors ne fust Palamedès,
Ceus qui en la mer ne neiassent,
PageV01P397
Li Troïen les decopassent.
Palamedès vit le martire :
Si grant duel a e si grant ire
Que por un poi toz vis n'enrage.
Mout par ot en lui vasselage :
Soz ciel n’a rien, que il dotast,
Qu'autre chevaliers faire osast.
Armé se furent el gravei
Mil compaignon, qu'il ot o sei
Proz e delivres e vassaus.
Beles armes e beaus chevaus
Orent, coverz de conoissances;
Lor escuz pristrent e lor lances,
Puis chevauchierent par grant ire.
Palamedès lor prist a dire :
« Seignor, » fait il, « veeir poëz
« Com Troïen ont reüsez
« Les noz : n'ont mais defension;
« Trop Iait damage i recevon.
« Onc ne vi mais gent si laidie :
PageV01P398
« Oëz com chascuns brait e crie,
« Socorons les, bien i bosoigne;
« E qui de rien m'a chier, si poigne.
« Si durement les encontrons
« Qu’ariere el champ les retornons,
« Tant que li nostre recovrassent
« E que tuit cil autre arivassent.
« Se faire ensi le poïons,
« Estrange honor i avrions.
« Or me sivez, franc chevalier. »
A tant brochierent lor destrier.
Palamedès avant toz vait
Assez plus loing qu’uns ars ne trait.
Sor un cheval sist d’Alemaigne,
Mais onques teus n'eiss d'Espaigne.
A goles ot escu d'argent.
PageV01P399
Si come il vint premierement,
Si ala joindre a Sicamor,
Frere germain le rei Mennor :
Del rei Sersès teneit sa terre,
E si n’estoveit mie querre
Nul meillor chevalier de lui.
Cil s'encontrerent ambedui :
Ferirent sei de plain eslais ;
Mais la lance Palamedès
Li a percié les dous costez.
Sicamor est morz craventez.
Ço fu granz dueus e granz damages,
Quar mout ert beaus e proz e sages.
Li chevalier i sont venu,
Qui Palamedès ont seü;
Lances baissiees vont joster.
Teus cent en i firent verser,
PageV01P400
Qui onques puis ne redrecierent,
Ne contre Greus ne chevauchierent.
Palamedès sovent lor done :
Maint en ocit, maint en estone,
Maint en abat, maint en mahaigne.
Des suens n'i a nul qui se feigne :
Bien s’i aïdent, ço sacheiz,
Grant pris en ont a cele feiz.
Tant i chaplent e tant i fierent
E si asprement les requierent
Qu’un poi les ont fait traire en sus :
Treis cenz lor en ont morz e plus.
A tant li autre recovrerent,
Qui volentiers lor redonerent :
Granz colees de main tenant.
Menez les ont ensi ferant
Sis archiees o plus de set.
Del recovrer n’i aveit plait,
N’en faiseient nes un semblant,